البس الطرطور

ازيك يا مواطن؟
مبسوط؟
سنة جديدة اهة...عايز ايه اجمل من كدة!؟
ايه؟....بتدعي تكون احسن من اللي قبلها؟
ياراجل حرام عليك تدعي علينا
طيب قول يارب تفضل زي اللي قبلها..
على الاقل الناس لسه بتاكل..بتاكل ايه مش عارفة بس بتاكل..
على الاقل الناس بتعترض و بتحتج..اي نعم اغلبهم مبيخدش اللي هو عايزه..بس اهو..
على الاقل كل حاجة بتتزور بتلاقي اللي يطلع ينكر..حد عارف السنة الجديدة حيطلع اللي يقولك
"آه زورت..اعمل اللي تعمله"هيبقى بتحرج نفسك
يا مواطن يا لذيذ...
احمد ربك انك لسه عايش لا مت من الجوع..
ولا بيتك وقع على نافوخك انت و اهلك..
ولا العشة بتاعتك اتحرقت..
ولا غرقت في عبارة او مركب..
ولا اتقتلت في حادثة قطر..
ولا اتسحلت في مظاهرة او الانتخابات او الاستفتاء..
ولا اتعذبت في قسم شرطة..
ولا جالك مرض تموت من كتر تعب اللف على المستشفيات و تغيظ المرض..
ولا ميكروباص داسك او اتوبيس وقع بيك في ترعة..
ولا اتكهربت في عمود او وقعت في بلاعة...
ولا اعتقلت من على البلاج...
ولا وقع عليك سور مدرسة..
او طعنك حد عشان ياخد السبعة جنيه اللي معاك..
ولا انتحرت..
ولا حد تحرش بيك..
ولا ملقتش مية حتى تشرب..
ولااتدبست في اشاعة ..
ولا مت في طابور عيش..
يا مواطن يا عسل
بوس ايدك وش و ضهر و انشكح و اتمنى ان السنة الجاية تنتهي عليك بنفس الحال اللي انتهت عليك السنة دي..قوم هات كيلو لب و سوداني ...لو معاك حقه....
و اضرب البدلة و البس الطرطور ..
ايه لسه لابسه؟؟
من السنة اللي فاتت كمان..هايل...متقلعوش بقى...و احتفل كدة على ما قسم
و كل سنة و انتم طيبييييييييين
و حسبي الله و نعم الوكيل


آخرصورة التقطهافي2007 ومش عارفة ليه حساها مناسبة لليوم ده

حادث

صديقان لا يفترقان...اخوة
يخرجون و يأكلون و يلعبون سويا من سنين
و في احدى المداعبات الصبيانية
في منزل احدهما
فجرالثلاثاء
دوى طلق ناري
و مات احمد
استيقظ اهالي منطقة الشيراتون على فاجعة
يوم 25-12-2007
صديق قتل صديقه بالخطأ و هو يداعبه بسلاح والده
لم يكن يعلم انه يحوي ذخيرة
لم يقصد قتل اقرب و احب اصدقائه اليه
اعفيكم من اي تفاصيل مؤلمة
انا لا اعرف اي منهم شخصيا و ان كانوا اصدقاء لاخي و دخلوا منزلنا في يوم من الايام
ولكن قررت الكتابة عن الحادثة لتوضيح حقائق شوهتها بعض الصحف
والتحذير من اسلحة قاتلة توضع في البيوت ترخيصها لاينفي عنها الخطورة
و المطالبة للشباب بالتفكير في دعاباتهم و تصرفاتهم لانه لا عودة بعدها
ارجو الدعاء لاحمد بالرحمة و لصديقه الذي يرقد في المصحة بالسكينة
و للاسرتين المنكوبتين بالصبر و الثبات

يا بهية خبريني

لا ادري من اين ابدأ
فالبدء في موضوع نهايته مفجعة غصة في الحلق
حينما يكون الموت احد اختيارات الحياة الكريمة
حينما يكون مصير الشباب و العنفوان و القدرة على البذل
الاختناق بين اربع جدران ومواجهة نظرات الشفقة
والحسرة على عمر و اهل و اموال استنفدوا في الحصول على مؤهل عال
حينما تغلق الابواب و تستعر جحيم الاسعاروتنفرد الواسطة بالميدان
حينما تملأ النفوس برمال عواصف الاحلام التي اغتالتها قطار الحكومة المزعوم فيه الخلاص
حينها فقط يكون السعي خارج الحدود هو الامل الاخير
الامل الاخير في خلق كيان و كرامة و تحقيق ذات تاهت في عتمة الوطن
الامل الاخير في توفير حياة كريمة للستر و التعايش مع الواقع
انهم ليسوا بطماعين الا في لقمة العيش الشريفة
انهم لم يجرموا في تنفيذ ما امرنا الله به من السعي
لقد ماتوا بكرامة لقد غرقوا في وطنهم قبل ان يغرقوا في البحر
والغريق شهيد
انهم يشعرون بمصيبتهم و لكنكم يا اصحاب القرار لا تشعرون
انهم يشعرون لذلك تعلقوا بقارب ظنوا فيه النجاة
لقد بذلوا جهدهم في وطنهم فلم يجدوا ما يسدرمقهم فذهبوا يبحثون عن وطن
ف( الغنى في الغربة وطن...والفقر في الوطن غربة)..
لن اسألك يا بهية لماذا اصبحت طاردة لأهلك
ولكن لا تقذفيهم بالاحجار و هم منك خارجون
لا تلقي بالذنب على من لم يعد له وجود ليدافع عن نفسه
وجرمي المذنب
و يا بهية خبريني عن اللي قتل المصريين

كل سنة و انتم طيبين

كل سنة و انتم طيبين و عيد اضحى مبارك و ان شاء الله ننال جميعا شرف الوقوف على عرفات

و لا تنسوني من الدعاء يوم عرفة..بارك الله فيكم و لكم

اعتذر عن اي تقصير و اشكر كل من سأل و زار مدونتي في غيابي..

انا رجعت في اجازة قصيرة نتواصل فيها باذن الله..و من بعد العيد انتظروا الجديد

وهابي خروف



تحية خاصة



الى كل اسرة يقف عائلها خلف القضبان في المحاكمات العسكرية
و حرمت من لمة الاهل و فرحة العيد لثالث عيد على التوالي
نحن كلنا اهلكم و نشعر بكم
عسى ان يكون هذا هو اخر عيد لكم مع الفرقة والعيد القادم تكتمل فرحتكم
ان شاء الله
كل عام وانتم بخير

لماذا تواضعت احلام المصريين؟

من قديم الازل...عرف المصري معنى الحلم و معنى ان يتحقق...كان واثقا من نفسه و من قدراته حتى انه قد حلم بالخلود المستحيل و حققه....و ترك بصماته في الدنيا واضحة..في شكل حضارة عظيمة..كانت يوما حلما صغيرا...

لقد استثمر المصري القديم طاقة الحلم و حولها الى شىء مادي محسوس

لماذانحن ما عليه الآن؟

لم نعد نعي ما هو الحلم

اصبح حلم المواطن المصري

ان يجد قوت يومه

ان يتعلم

ان يعالج

ان يجد عملا

ان يعيش آمنا

ان يعامل كانسان

نعم ...اصبح المصري يحلم بحقوقه

لقد وأدت الظروف الاقتصادية مخيلته

وتفشى الفساد كالسرطان

و غرزت وحوش السياسة مخالبها في الحناجر

و امتص النظام طاقة الحياة من الاجساد

و تحولت بلد الحضارة الى بلد تأوي الاطياف

يجب ان نتمسك

بانسانيتنا

بكياننا

بمصريتنا

بحلمنا

ولا نستسلم

لقد اتقن النظام لعبة تحطيم الاحلام

ووضع الشعب المصري في موقف سيء يفرض الصمت و عدم البوح بما تختلج به الصدور

لقد زرع الخوف في القلوب و خشي المصري من حلمه لأن الاحلام يعاقب عليها القانون

و اصبح لا يلق لمكنون نفسه بالا فقد شعر بدونيته امام حلمه

هم يعلمون أنه

اذا اردت ان تقضي على شعب..اقضي على حلمه

و نحن نعلم انه

اذا اردت ان تقضي على فساد ..احلم بكابوسه

و نحن لن نذهب دون مقاومة

"يتحقق الحلم..للذين يؤمنون بتحقيقه"

مقولة صينية

وحشتيني

وحشتيني يا مصر

.....وحشتني دوشتك و زحمتك

....وحشتني شوارعك ونيلك

....وحشتني مساجدك و كنائسك

...وحشتني الشحاتين و البياعين و الاكشاك الي على كل ناصية

.....وحشني اطفال الشوارع و السياس في الجراجات

...وحشني القطط و الكلاب الضالة

....وحشتني محلات الورد

....وحشني كبري 6 اكتوبر و صلاح سالم و رمسيس و التحرير

...وحشني شمسك و ضلك

...نهارك و ليلك

وحشني ريحة التراب في الجو و ريحة الزبالة المحروقة و ريحة التبغ في ميدان الجيزة من الايسترن كومباني

....وحشتني المواصلات و بهدلتها

...وحشتني العربيات الفيات و اللادا

..وحشتني نسمة الليل

وحشتني وقفة البلكونة العصر

..وحشني نور الشوارع الضعيف الاصفر

...وحشني شكل القهاوي

...وحشني ملامح الناس

...وحشني محطات الاتوبيسات و الميكروباصات

...وحشني صوت الكلاكسات

...وحشتني التاكسيات و اللون الابيض و الاسود بتاعها

...وحشتني وقفة التشريفات

....وحشني ندى الصبح و لسعة البرد

وحشني رمضانك بزينة المساجد و الفوانيس الصيني و الفوانيس النحاس ام زجاج ملون المنورة على جوانب الشارع و رصة الياميش و اسامي البلح و الاذان بصوت الشيخ محمد رفعت و الفوانيس على باب كل عمارة

وحشني اعلام الاهلي و الزمالك قبل الماتش على الاشارات و فضى الشارع ساعة الماتش

....وحشني عسكري المرور العجوز اللي مش شايف العربيات

....وحشني اسدين قصر النيل

وحشني العيش البلدي السخن

وحشتني محلات عصير القصب

وحشتني الحفر في الشوارع والعربيات الكارو

وحشني صوت بياعين الخضار و ضربة مفتاح البياع على انبوبة الغاز

وحشني منظر الورش و محلات الهدايا

وحشتني الجرايد و الحبر لما يطبع على الايد منها

....وحشوني اصحابي اللي شفتهم و اللي مشفتهمش....

وحشني فيك يا مصر الوحش قبل الحلو

كلك وحشتيني

الطائرة الحكومية

أقلعت الطائرة

التصقت بالنافذة مودعة مصري الحبيبة

و بتحليق الطائرة شيئا فشيئا

اخذت اتأمل تضاؤل المعالم و السيارات و البشر

و توحد لون اليابسة تتخللها بعض البقع القانية موحية بوجود البشر و مراحل حياتهم...و تعلقت في ذهني تلك الحقيقة البديهية

كلما ازداد أفراد حكومتنا ارتفاعا..كلما تضاءلت ملامح الشعب في ذاكرتهم و عيونهم

...و يمر الوقت..ويزدادوا علوا..و نصبح في نظرهم تلك البقع القانية التي تلوث ثوب اليابسة...

ان افراد حكومتنا الاشاوس يتحكمون في مصر من على متن طائرة..فهم يرون مصر جميلة دائما و هادئة..لا يعكر صفوها سوى تلك البقع الداكنة..فيحاولون محوها تماما كمن ينظر الى خريطة و لا يقرأ مفتاحها..يعجبه الرسم و لكنه يتعجب من الدوائر و المربعات و باقي الرموز عليها

انهم يتعجبون فيما بينهم من شكاوى السكن و هم يتنعمون في ما يملكونه من عقارات ومنتجعات واراض واسعة

ويتندرون فيما بينهم من شكاوى العطشى و هم يتأملون النيل من شرفات صروحهم

و يستنكرون من شكاوى البطالة و هم يتفقدون مصانعهم و شركاتهم

و يستغربون من شكاوى الفقر و هم يراجعون ارباحهم و ارصدتهم في البنوك

..ببساطة انهم لا يرون سوى انفسهم

...ولا يسمعون سوى اصواتهم

...ولا يقررون الالصالحهم

..ولا يخافون سوى على مصالحهم

..انهم يلونون مصر بألوانهم هم

..كما يحبون ان يروها من نافذة الطائرة....

الطائرة الحكومية

====================================

افتقدكم جميعا و صدقوني لقد (عملت اللي ميتعملش)حتى اعود لعالم التدوين

(النت صعبة هنا و الله)

اشكر كل من تمنى لي الخير و تذكرني بكلمات رقيقة و دعاء صادق

بارك الله لكم و فيكم و كل عام و انتم بخير

رمضان كريم

الى اللقاء

لظروف السفر...سأغيب لفترة...جل ما اطلبه هو الدعاء بالتوفيق...

في عمري التدويني القصير جدا التقيت بعقول واعية وصادقت شخصيات محترمة وان لم التقي ببعضها شخصيا..

و لكن على امل اللقاء باذن الله...

اشرف بمعرفتكم ..و اشكر كل من قرأ حرفا في مدونتي..
و خاصة اخي الغالي جدا صاحب البوابة
الذي شجعني على انشاء مدونة و التقيت عبر بوابته بمعظم الصداقات...

اشكرك بوابي العزيز من كل قلبي...

فقد قدمت لي الكثير..و تعلمت منك الكثير

و كنت و لا تزال و ستظل نعم الاخ و نعم الصديق

صدقا..اشرف باخوتك و يوما ما ستشرف بك مصر لانك ابن بار بها..

اشكرك ..فلم يتسنى لي ان اشكرك يوما

حفظك الله من كل مكروه

اوصيكم خيرا به..

حاولت ان اكتب لكم عن مصر..و لكن عجزت عن وصف مقدار الالم الذي اشعره لفراقها

الى ان نلتقي..اترككم في حفظ الله و رعايته

لا تنسوني

الى اللقاء

يوم باذنجان

اخواتي في الانسانية...و الفقر و المرمطة دية...اسمع حكايتي يا غلبان و اتعظ...اسمع حكايتي و انت قاعد منجعص...في يوم صحيت زي المجانين...الف الاوضة شمال و يمين...اتأخرت على الشغل يا جدعان..اصلي سهرت جنب ابني العيان..و قبل ما انزل من باب البيت مراتي قالت لي (هات لنا اتنين كيلو باذنجان)...
قلتلها(انا زهقت من المحشي و المسقعة)....قالت لي(اطبخي يا جارية..كلف يا عدمان)...بلعت لساني و نزلت...و على المحطة وقفت...ساعة تجر التانية و انا مستني..شوية و جه الاتوبيس ابو كعب متحني.. نطيت وجريت وراه زي ابوقردان..و لما اتشعبطت فيه فرحت و لا ابوتريكة لما جاب الجون في اليابان...اتحشرت بين البني آدمين زي الشعرة في العجين...لحد ما انتهيت في حضن واحد ملظلظ تخين..قولت في بالي "ده لا يمكن يكون انسان"...اصل ريحته في الحر مع الزحمة خليت دماغي في التوهان.....
وصلت الشغل بعد عذاب...من بختي لقيت المديرمتأخر وواقف على الباب..
بصلي بعصبية و قال لي"و كمان جاي متأخر..مخصوم منك تلات ايام"!!؟....قال يعني مش غلطان.. كتمت غيظي و طلعت لمكتبي في الدور السابع...و نفسي من السلم نازل طالع...لقيت كمية بشر لها العجب و كل واحد ماسك ورقة في ايده فيها طلب....دخلت مكتبي بعد تسع محاولات و اكتر...ملقيتش فيه من الخمس موظفين الا مدام عنايات بتفطر...قلتلها"فين الزمايل؟"...مبصتليش و ردت.."علي مجاش...و محمد ابو سالم مراته بتولد...و محمد توفيق عمته ماتت...سعيد راح يجيب بطاقته من البيت عشان الانتخابات.."....
قلتلها"انتخابات ايه اسمها الاستفتاء على التعديلات".....مصمصت شفايفها
وقالتلي"ياخوية...ما اسخم من سيدي الا سيتي..المهم قوم هش البني آدمين دول من هنا و قولهم اصل احنا رايحين نصوت في اللجان"....
شوية و لف عم متولي الفراش علينا و بيزعق"يالا يا جماعة الاوتوبيس اللي هياخدكم للانتخابات واقف تحت"..قولتله وانا نازل "يا عم متولي اسمها الاستفتاء على التعديلات"....بصلي بقرف و قالي"و هي يعني هتزعل عدلات دي..كله محصل بعضه..روح يا *مسكف*عشان تلحق العدلات"........قولت عشان ميطالبنيش بحساب المشاريب القديم...انزل و انا عامل نفسي مش زعلان.....

و في الطريق المدير قعد يقول"كله يصوت بنعم..و الا هياخد جزا و احنا مش قد الحكومة"...بصيت من الشباك لقيت خروف بيبصلي من نص نقل محملة خرفان!!!

خلصنا و رجعنا بعد ما كل واحد قال صوت الحكومة الجهوري..و لحوس صباعه بالحبر الفسفوري..و اغلبنا مش فاهم بيعمل ايه..بس ادينا بنقلد المدير..وفيها ايه...!؟

و انا مروح افتكرت الباذنجان اليومي...رحت واخد بعضي و جري على عم بيومي ..راجل غلبان من غير سنان..بيبيع خضار في آخر الدنيا..بتبهدل لما اروح له بس ناس كتير بيقولوا خضاره مية مية..و طلع عم بيومي كيس اصفر و حطلي فيه الباذنجان...

و نزلت رمسيس آخد مواصلة...و اول ما نزلت لقيت عساكر و ضباط في كل حتة..سألت هو فيه ايه..قالوا في مظاهرة....قلت اتمشى بعيد عن الدوشة يمكن الاقي حاجة اركبها..و فجأة الحرب قامت...و الضرب اشتغل من الامن المركزي..و من خوفي قلت اجري..بس على مين ..لما جريت افتكروني من الهربانين..و قلت للعسكري "انا مليش دعوة....انا مواطن في حالي..و اغلب من الغلب زيك و اكتر."..قالي"الاوامر اني اضرب كل اللي يمسك اصفر"..اتاري المظاهرة لحركة كفاية و مع اول عصاية ..اتقطع الكيس و اتبعثر الباذنجان...

مضروب في كل حتة..و هدومي متقطعة لمليون حتة...بجرجر في رجلي من كتر العذاب ..و طعم الدم في بقي مخلوط بالتراب...مش قادر اقول بيني و بين نفسي آه...و..."امشي يا حمار"..و صوت الخرزانة رن في ودني.."معقولة لحقوني لهنا؟"..ببص ورايا لقيت عربجي بيضرب حماره.."شي حا""..مش عارف ليه حسيت ان الحمار بقولي"حاسس بيك يا غلبان"!؟

و اخيرا ..هعدي الشارع و اكون قدام بيتنا...بس الحمدلله مش هنتغدى باذنجان...و انا بعدي الشارع خبطتني عربية و رحت في خبر كان..

في المستشفى
"آدي حكايتي...طول عمري جنب الحيط لحد ما وقع عليا...مش عايز من البلد دي حاجة..غير..غير..غير......"

"مرزووووووووووووق...مات و كان نفسه في الباذنجان!!!!!؟"
قالت زوجته


ملحوظة:عشان نبقى متفقين..البوست ده فانتازيا بحتة..يعني لا فيه اهانة لحد..ولا تقليل من حد..ولا شتيمة حد..ده مجرد سخرية من احداث ملخبطة و المعنى بين السطور..و احترامي للجميع

أقوال مكسورة

الحكومة زي مراتك....
منكدة عليك عيشتك...
لا انت قادر عليها...
ولا عارف تطلقها...
و مقشطاك اول بأول...
و في الآخر هتقولها نعم غصبا عنك!!!

............................................................
نظرة حكومية
المواطن في شعبه زي البهيمة في القطيع..
هي بتاكل خضرة...و هو كمان
هي مش فاهمة حاجة...وهو كمان
هي بتتلم مع اللي زيها على اي حاجة...و هو كمان
هي بتندبح على ايد اللي اعلى منها...وهو كمان

....................................................................


انك تشرب المية ...وانت عارف انها ملوثة بالمجاري
انك تاكل الخضار و الفاكهة ...و انت عارف انها مرشوشة بالمبيدات المسرطنة
انك تاكل العيش... و انت عارف ان قمحه مسرطن و فيه حديد و خشب
انك تركب القطاراو العبارة ...و انت عارف انه مفيش صيانة
انك تنقل دم...و انت عارف انه في كيس ملوث
انك تعمل كل ده...يبقى انت عايز تلبس الحكومة تهمة
آه يا فاسد!!!

......................................................................



الانتخابات زي أفراح ولاد الذوات
ترتيبات و مصاريف كتير قبلها..
عليها حراسة...
ومعازيمها محدودة ....
و معاهم كروت الدعوة...
صناديق الاقتراع فيها هي العروسة
و في لجان الفرز...
في عرس الديموقراطية..
بيلاقوا العروسة حامل!!؟

الانحياز بين التعامل و ثقافة الحوار

في نظرة حيادية للحالة المتردية للوطن العربي...و نتيجة الوضع السياسي القاتم و تذبذب الافراد في المجتمع الواحد و زيادة التدخلات الخارجية...هيمنت فكرة الانحياز او الانتماء لفكر او طائفة اوحزب اوكتلة او حركة ما يستخدمها الفرد في تحديد هويته و بكلامي هذا لا أعيب على احد انتمائه أو معتقداته أو افكاره... ولكن رويدا رويدا تصبح هي لغة التعارف و يتم طمس الهوية العربية و تضاؤل القضية المشتركة و نسيان الاهداف التي قامت عليها كل كتلة بين أغلب المنتمين لها..و يصبح الحوار مبتورا و متحفزا او عنيفا لا يرقى الى معايير الحوار الناجح و آدابه و يتحول التعامل فيه الى صراع قبلي مما لا يخدم اي هدف

الحالة الاولى

لم اتوقع ان يكون مشهد النهاية هو بداية مسلسل السلطة في فلسطين...و ان يفقد بريق الحكم صواب حماس و فتح...وانقسام الوطن العربي بين معارض لهذا و مؤيد لذاك و كأننا في مباراة لكرة القدم...و نسينا انها كرة من دم و شرف و كرامة عربية..و نسينا ما للفريقين من تاريخ مدجج بالنضال....و نسينا انه في يوم كانوا يحاربون بهدف واحد الا و هو تحرير فلسطين..و ظهور عناصر منشقة في احدهم لا ينفي النضال عن باقي اعضاء الفريق...و جرائم القتل المتبادلة لا تنتشل أحدهم من بئر الخذلان للقضية الفلسطينية....وكما انحاز كل لفريقه طمعا في الكرسي..انحاز كل منا الى فريق منهم طمعا في تحقيق رغبة سياسية...و تناسينا ان الهيمنة الصهيونية تتزايد..وان هذا الكرسي لو نصب فسيكون منصبا أعلى تل من الجماجم..و ان التعامل الدموي سيصبح تدريجيا هو لغة الحوار بين الفرق و الفصائل...و هو ما لا يقبله اي من الاديان السماوية...
رحمة الله عليك يا ابو عمار

الحالة الثانية

يفقد المئات يوميا ارواحهم في العراق...لا لشىء او جرم سوى انتمائهم الديني...فالسنة و الشيعة تحول حوارهم الى حرب عصابات..كل يحاول تصفية الآخر..و انحدرت تعاملاتهم الى اسفل الجرف...بتفجير الاضرحة و الرموز الدينية...و تناسوا انهم شعب واحد عانى من نفس القهر و المرض و الجوع و الحصار و الظلم لسنين...و تناسوا من هم و من يحتلهم بدعوى التحرير..ولم يعد يشغلهم سوى الانتماء البحت لفئة و اثبات الولاء لها ورفع اسمها عاليا بجوار اسم الدولة حتى ولو على حساب الدولة نفسها و كان الدم و انتهاك حرمة المقدسات هو الثمن...و في ظل هذا الشلل الانحيازي تضمر الاساسات الدينية القائمة عليها كل طائفة ...

الحالة الثالثة

تعاني مصر في الوقت الحالي من كبت سياسي...تسبب في خلخلة الفكر الوطني للشعب و احساسهم بالمهانة و الضعف في الوطن مما ادى الى تعزيز بعض التكتلات أو الاحزاب أو الحركات النشيطة لنفسها ( مع احترامي الكامل لها جميعا)...رغبة في استمداد القوة من المجموعة المتحدة...و ادت رغبة هذه التكتلات في بناء موقف سياسي سريعا و رغبة الافراد في دفعة تشجيع تنتشلهم من المياه الراكدة الى وجود فئة في اي تكتل لا تعي تماما ما القواعد المؤسسة لها والهدف المنشود... و قد لا تتفق معها في الافكار تمام الاتفاق...وتظهر هذه الفئة من طرحها غير الجيد و التحفز في اي حوار بينها و بين فئة من كتلة مغايرة...و ضعف الطرح يضر بالموقف السياسي للكتلة و هذه الفئة مما يعيد شعورهم القديم بالمهانة و الضعف فيتحول الحوار الى مشادة و تطاول بين التيارين المختلفين و دفاع كل منهم عن بيته السياسي ونتحول الى دويلات متناحرة قد يصل سوء التعامل بينها الى حد مؤسف تتداعى امامها وحدة الهدف الا و هو مصلحة الوطن و الرغبة في التغيير...

و على صعيد آخر...تأججت نار الفتنة الطائفية في بلد كان و لايزال يعيش فيها المسلم و المسيحي كأخوة..بغض النظر عن الحالات الفردية المؤسفة..و نظرا( كما اشرت مسبقا الى وجود فئة لا تعي الاساس للفئة المنتمية لها)و الذي تقوم عليها العقيدة(سواء الاسلامية او المسيحية)...و الذي ينبذ اي عنف و يدعو الى التسامح و التعايش كأمة واحدةو لا اعتقد ان اختلاف الدين بين الافراد يضر مادامت الملتين متفقتين في هذا الاساس..و لكن الذي حدث هو فقد لغة الحوار المشترك و غلبة التعصب عليه..مما اضر بتعاملاتنا و جعل الخوف و التنابذ ركيزة لها...

الحالة الرابعة


ضربت لبنان مثالا يحتذى به على مر سنوات في التعايش بين جميع الطوائف على ارضها...و اجتازت رحلة عذاب الحرب الاهلية ببسالة...و لكن من جديد..عاد شبح هذه الحرب ليشيع في انفس الآمنين فيها الرعب...فقد فقدت الطوائف لغة الحوار و ابتعدت عن صالح لبنان العام...و انحازت كل كتلة الى ما تؤيده من سياسة خارجية مما انعكس بالسلب على تعاملاتها الداخلية بشكل سىء..و لعل اغتيال رئيس الوزراء الاسبق رفيق الحريري كان بداية لكشف الاوراق...و تبعه اغتيال النائب جبران تويني..ثم الوزير بيير الجميل..و أخيرا اغتيال النائب وليد عيدو و ابنه ..جميع الاغتيالات تمت في وضح النهار بجرأة...كأنها اسلوب التعامل الجديد و على اللبنانيين ان يألفوه..اسلوب الهمجية و الوحشية...

من وسط المية اللي مغرقة الدنيا فوق دي...
وقبل ما تقرأ اي بوست عزيزي المدون..عزيزتي المدونة..
تاخدلك حاجة حلوة و كان بيبسي و بالونة...تهنئة لصاحب البوابة...
لانفراج كربه..و الحمدلله.. ورجوع والده بألف سلامة...أطال الله في عمره..
و نحب نقول له..
حمدلله على السلامة يا حاج...

ملحوظة:ياريت بلاش حد يحط صباعه في كريمة التورتة لحد ما صاحب البوابة يقطعها

ارفع رأسك يا أخي

لا تيأس...قف بصمود الجنود في المعركة

لا تستسلم لهاجس الوقت ...فغايتك آتية

ثق بالله الرحيم الذي لن يريد لك ضرا

اشحذ همتك...و لا تسمح لساقيك بالتخاذل

انظر الى الافق...و استمتع بتراقص السراب

واجه الرياح..و تحمل سخرية غبار الطريق من عينيك

اصبر....فالقدر هو محطتك

لا تحن رأسك امام شمس الظهيرة...تحداها

و ارفع رأسك يا أخي

عشان تشوف رقم الاتوبيس اللي هيعدي و تلحق تجري وراه!!!؟

مدونون في حب مصر

التاريخ 20/6/2007

لا يهم انتمائك لاي حزب او عدمه
لا يهم جنسك او عملك
لا يهم شكلك او عمرك
ما يهم....

هو انك شاب تعشق مصر حتى الثمالة
هذا ما احسست به في ندوة عن "الحرية الاليكترونية"بقيادة الرجل كبير المقام..شاب القلب..
الاستاذ محمد عبد القدوس..
واخيرا اثبتت مصر لي و للنظام ان بها شبابا جادا يحلم بغد افضل..
شبابا سيغدو يوما أبا يغرس وجودها اوأما ترضع حبها..
شبابا كونوا اسرة بأقلامهم قبل تلاقيهم...
و اذا تم قصف قلم احدهم تداعت له باقي الاقلام بالمساندة و الدعاء....
ولكن من قصف قلمهم لا يعلم انه خلق منهم...
رموزا..
ابطالا ..
قوة تتدفق في اوصالنا..

وجدت اننا

نحن المدونون أخوة من مصر واحدة...
نرى الجنة تحت اقدامها....و نذرف الدم لبكائها...

كفكفي دمعك مصري العزيزة
فهناك من احسنت تربيته



للاستزادة:مؤتمر المدونين بنقابة الصحفيين
وقفة لابد منها
تغطية لمؤتمر المدونين بنقابة الصحفيين
جزء من الصور
































جزء من الفيديو

تااااااااااااااااااااااااااااااااااااااااااااااااااااااج

مرر لي الاخ امام الجيل مشكورا تاج..بصراحة انا اتخضيت في الاول ليطلع طويييييل بس لقيت الراجل ممرر تاج صغنون بس عميق...ربنا يبارك فيك يا امام الجيل و يقدرنا على رد تاجك في الافراح ان شاء الله

بسم الله الرحمن الرحيم

أنت مين؟
انا نقطة مية

انسانة طبيعية جدا..اكتشفت اني طيبة لدرجة السذاجة بصدمة..بهتم بالحاجات الصغيرة اللي ناس كتير ميهتموش بيها بس مؤمنة ان الحاجات الصغيرة مهما كانت تافهة فهي بتعني حاجة كبيرة لغيري زي مثلا افتكر عيد ميلاد شخص و اعيد عليه...حاجة معايا ممكن تسعد حد لو في امكانيتي اني اديهاله باديهاله...حد بيحب حاجة افضل فاكرة انه بيحبها لحد ما يصادف وقت اجيبها له او اعملها له و كل ده اغلب الوقت بعرفه من كلام الشخص و مبيكونش عارف اني عارفة بس اصلي مستمعة جيدة...احب المفاجآت السعيدة طبعا..عمري ما حسيت بالكره رغم ان في ناس في حياتي يستاهلوه بس كل اللي حساه هو عدم قبول و ضيق نحيتهم و مش مسامحة معرفش اسامح خالص اي حد زعلني او سببلي الم مهما حصل دايما ابقى فاكرة لاني بهتم بمشاعر اي حد و مبحبش ادايق او احرج حد فعلى الاقل الغير يهتم بمشاعري..صريحة لدرجة ممكن تضايق حد مني..عقلي مبيبطلش تفكير و تحليل ابدا لدرج اني بنام بالعافية

مين اكتر ست شخصيات بتحبهم؟

فيه كتير فا هتحايل على السؤال
1-افراد اسرتي لكل واحد فيهم شخصية ذات نكهة مختلفة
2-شخصية خالدبن الوليد و ابو هريرة و ابو دجانة و مصعب بن عمير
3-الشيخ زايد بن سلطان رحمه الله
4-اصدقائي مع اختلاف شخصياتهم من الطيب و المسالم و المجنون و الرقيق و المقدام و الطفل وكدة يعني
5-الاعلامي عمرو اديب و اوبرا وينفري
6-الدكتورة عبلة الكحلاوي و الداعية عمرو خالد و الدكتور محمد سليم العوا

أنت سعيد؟

الحمد لله ايه اللي مش هيسعدني.. مسلمة و بشوف و بسمع و بحس و بمشي و بتكلم وعندي بيت انام فيه..
في احسن من كدة ...!؟
الحمدلله

لو اجتمعت أنت وحسنى مبارك فى غرفة واحدة هتقوله ايه؟

ممممم..ايه السؤال ده!؟....ما علينا...هسأله سؤال و اطلب منه رجاء...
السؤال:..ما هي نظرتك للشعب المصري بوجه عام و للشباب بوجه خاص؟
و ما هي معلوماتك عنهم؟
الرجاء:ممكن تخرج ايمن نور من السجن..الراجل كل امله دلوقتي انه يموت وسط اولاده؟
و بعدين هطلع ربع جنيه و هقوله انها اكثرفئة من العملة المصرية شيوعا في جيوب شعبك و اطلب توقيعه عليه!!
بس عارفين..دايما بحس ان اي حد بيعمل حاجة في البلد دي كانه بيكلم الريس
لان كل حاجة بتحصل لنا او علينا هي نتيجة قراراته و افعالنا هي نتيجة للقرارات دي

لو معاك مليون ونص هتعمل بيهم ايه؟

الحمدلله الواحد مش محتاج حاجة بس اذا ربنا اداني هيبقى كالتالي:
نص مليون لبابا و ماما:اهو احس اني قدرت اديهم حاجة في الدنيا مع ان مال الدنيا كله ميسواش حاجة قدام قيمتهم واللي قدموه واللي بيعملوه عشانا كاني قدمت وردة لاصحاب مدينة الذهب
ربع مليون لاخواتي:عشان هم اللي ليا بعد ربنا و بابا و ماما في الدنيا واخواتي يعني...حاجة متتوصفش
ربع مليون لاصدقائي:المقربين جدا و هم مش كتير لانهم في منزلة اخواتي بثقتي فيهم و الحب المتبادل بيننا و انتفاء المصلحة بل بنخاف على مصالح بعض و دول نادرييييين جدا و عشان اخوتنا فاحنا مع بعض على الحلوة و المرة
ربع مليون ليا:عشان نفسي ادرس تصميم سيارات و النوع ده من الدراسة مش موجود في الدول العربية و لكن في ايطاليا و اسبانيا..حلم يعني
و ربع مليون الأخيرة:لمستشفى سرطان الاطفال و دي مش محتاجة تفسير

بتحب مصر؟

لأ طبعا.....انا بعشقها....كلمة الحب دي ضئيلة جدا بالنسبة لاحساسي ناحيتها ..دي مصر يا جماعة!
مصر الارض..ولكن الافراد بخاف منهم ..

بتحب البنات؟

اكيد السؤال ده هيبقى بالعكس يعني "بتحبي الاولاد؟"حاجة كدة..بس هجاوبه من الناحيتين..انا بحب البنات صديقاتي و اكيد مش من النوع بتاع البنوتة الزائفة و هم قلبهم ابيض وبحبهم و للاسف قليلين جدا لسببين الاول انه اكتشفت ان بعض البنات هنا في مصر بيغيروا من بعض وبوجهين وكتير ممكن ميساعدوش بعض و احيانا بيضروا بعض"طبعا انا مش بعمم في بنات زي الفل"والثاني:ان مجال دراستي و الجامعة اللي كنت فيها كان الذكور فيها اكتر بكتير من الاناث ..اما الاولاد او الذكور فيعني الكام صديق اللي طلعت بيهم رجالة جدا و محترمين و ميفرقوش عن اخواتي حاجة غير ان اسم الاب متغير و انا بحبهم..و بوجه عام في الاناث:بحب البنت المحترمة ذات العقلية و الرأي و الشخصية ..و في الذكور:الرجل المحترم المهذب الذي يحترم المرأة و ايضا ذا عقلية و رأي و شخصية

أنت مسلم؟

بكل فخر نعم و الحمدلله على نعمة الاسلام

ليه؟

مقدرش اسأل ليه عشان دي نعمة من ربنا هو وحده اللي يعلم ليه انعم عليا بيها كل اللي اقدر عليه اني احمده عليها و انه جعلني من امة اشرف الخلق عليه افضل الصلاة و السلام و دي الفطرة السليمة

أيه اكتر موقف محرج أتعرضت ليه؟


مرة كنت مروحة من الجامعة و بعدي الشارع و كان زحمة اوي فا و انا بتسحب بين العربيات بنطلوني شبك في حتة حديدة طالعة من تاكسي و التاكسي اتحرك فاتقطع البنطلون من عند منطقة اعلى الركبة حتة كبيرة شوية

اتصرفت ازاى؟

ستر ربنا ان شنطة الجامعة كبيرة و عريضة فغطيت مكان القطعة و الحمدلله مكنتش باينة من الشنطة خالص و جري على البيت

أيه الامنية اللى بتدعى ربنا انه يحققها ليك؟


يا رب احسن خاتمتنا و ادخلنا الجنة مع الانبياء و الصديقين و الشهداء

كسبنا صلاة النبي

صلوا على النبي


"عليه الصلاة و السلام"....


انا عايزة اكلم الشباب من سن 18 ل 83 سنة...!

انفض مولد انتخابات التجديد النصفي لمجلس الشورى و الكل طلع منه بلا حمص..

ليه؟

عشان اللي بيتوزع كان شوكلاتة ميعرفش طعمها الا ولاد الذوات في"بارتي"مش مولد..

عرفتوا بقى ان الباقي بيئة..و ميستاهلوش يدخلوا المجلس!؟..

هيعروا "الوطن"...


ما تصلوا على النبي يا جماعة....


"عليه الصلاة و السلام"


اللي نفسي افهمه بقى...كان ليه بس الدوشة قبلها بكام شهر و ممنوع قيام احزاب على اساس ديني..ولا شعارات دينية..و الناس تغير شعارها..و ناس بتقاطع الانتخابات...و 800 مرشح و 690 معتقل...و نائب ينضرب..و المرشحين اللي عدوا من الفلتر يصرفوا دعاية و يفط و الذي منه...و طفل تدوسه عربية مرشح...وشاب ينضرب بالرصاص..و زحمة..و حراسة....و تجاوزات..و بلطجة قدام اللجان..و صحافة تكتب..وتلفيزيون يذيع

و بعد كل ده تلاقي انهم قرروا ينقلوا المجلس لمقر الحزب الوطني!

مش حرفيا يعني بس تقريبا كدة

"ما تصحصحوا شوية معايا"

طيب كان ليه وجع القلب اللي فات ده كله و لا دي بيروقراطية و خلاص؟
و بكدة مش هيتكلفوا غير ثمن كوبايتين الشاي اللي هيشربهم النائب المستقل و النائب بتاع حزب التجمع اللي كسبوا مع 57 من الوطني....
من باب كرم الضيافة يعني..


صلوا على النبي

"عليه الصلاة و السلام"


و اللي مجنني بقى....ان في مصر تقريبا و الله اعلم 24 حزب وواحد بيحاول..و كانهم مش موجودين...طيب بعد اللي حصل ده اللي مقاطع هيفضل طول عمروا مقاطع..واللي غير شعاره هيرجعه تاني...ماهو مفيش فايدة بقى..
يبقى هيختفوا...!

عشان كدة الواحد مش مؤمن بأي حزب عشان مفيش حياة سياسية او في طريقها للاندثار
اللي غايظني بقى...ان في تصريح النهاردة"15/6" في المصري اليوم

"ان الانتخابات كانت تعبيرا عن ارادة الشعب"...

هو حد فيكم يا شعب انت و هو راح و مقليش!؟


زعلتوا ليه؟

طيب استهدوا بالله و صلوا على النبي كدة و اقعدوا

"عليه الصلاة و السلام"..

كمان زيدوا النبي صلاة..

"عليه الصلاة و السلام"..

شفتوا..المهم كسبنا صلاة النبي..هي اللي هتنفعنا