سنة اولى تدوين

النهاردة تكمل مدونتي سنة...يااااااه ....مكنتش متخيلة اني هكمل سنة...

.ده حتى مكنتش عايزة اعمل مدونة بس مصطفى (صاحب البوابة)لعب في دماغي و اهو حصل اللي حصل....

.اكتشفت ان المدونة هي باب مفتوح بين القلب والقلب..وروح كل انسان بتتلبس مدونته...

احيانا بحس وانا بزور مدونة اني اعرف صاحبها او صحبتها من زماااان ..

و احيانا بزور مدونة احس بفرح مش عارفة مصدره..

و مرات احس بنور ايماني بيغلف المدونة...

مرات احس بطفولة وبراءة...

و مرات بحس بروح مرحة متفائلة...

و مرات احس بالحرية....

مرات احس بالاتزان و الرزانةو احيانا الجنون..

بحس بصداقة واخوة.....تقارب افكار و مشاعر....حب صادق و نفوس طيبة..وطنية نابعة من القلب.....

و دايما بحس بموهبة فذة...و دايما بطلع من اي مدونة مستفيدة

احنا اسرة كبيرة ساكنين جنب بعض...بنسأل على بعض و بنفتقد بعض و بنحس بفرح و حزن بعض...

كونت صداقات جديدة و قيمة و اعتز جدا بيهم اللي شفتهم شخصيا و اللي لسه مشفتهمش..ورغم قلة تواصلي في الفترة الاخيرة للسفر..لكن عارفة انهم مقدرين....

احتفالا بقى بعيد ميلاد نقطة مية هاعمل نيولوك

واشكر كل من قرأ حرف واحد من المدونة او علق ...

و كل من سأل عني او تواصل معايا..

و لسه على تواصل دائم ان شاء الله

مصر فرحانة

اجمل حاجة في الدنيا لما الناس تفرح مع بعض او على الاقل تتفق مع بعضها على حاجة واحدة....حتى لو كانت الكورة هي السبب... المصريين عايزين يفرحوا ببلدهم حتى لو كانت في لعبة...لحظة واحدة اتفقوا انهم يفرحوا و يحتفلوا و يرفعوا علم مصر و يغنوا ليها و يهنوا بعض....لحظة واحدة الناس نسيت مشاكلها.. نسيوا الغلاء و البطالة و الجوع و السياسة ...شعور رائع جدا مهما اوصفوا انك تفرح مع الناس...المصريين عطشانين فرحة....محدش بيضر حد ولا بيضايق حد..كله لمصر..
نقطة مية بتقدملكم تغطية حصرية لما كانت عليه الشوارع و بالتحديد مصر الجديدة(الكربة) عشية فوز مصر على كوت دي فوار..و معايا فيديو حصري للسيد علاء مبارك بعد ان تفاجأ الجميع بوجوده بين الشباب بسيارته و هو يقودها بنفسه فاتحا النافذة و بجواره زوجته بصحبته حراسة خفيفة تنحصر في سيارة بي ام دبليو رمادي خلفه....و كان احد معاونيه يجلس في المقعد الخلفي يوزع الاعلام على الناس في الشارع... لفتة رائعة....كلنا مصريين و قدام مصر بنتساوى جميعا في حبها....
مبروك يا مصر

السيد علاء مبارك



المساعد الذي يوزع الاعلام..و علاء مبارك يلوح بالعلم








يقف بسيارته يشاهد سيارة يرقص فيها الشباب فرحا



هنا حيث غادر من شارع جانبي و تظهر خلفه سيارة الحراسة



مش مهم السن..المهم انك مصري





4 و الجاي 3




يلا نرقص





العائلة السعيدة




المصريين اهم




ام تحمل رضيعها و زوجها يلوح بالعلم

أفيقي

اننا تائهون...
نعم الشعوب العربية تائهة..
مضللة...
خائرة القوى قبل ان تبارز...
تبحث عن قائد منتزع من التاريخ...

ألا نشعر بالمهانة.....ام لأننا من نهين بعضنا البعض..
ألا نشعر بالعار.....ام لأننا من اجتث اشجار التوت فلم نجد ما نستتر به...
ألا نشعر بلهيب الدم الحر في عروقنا.....ام لأننا أرقناه قربانا لاعدائنا...

أفيقي

شعوبنا العربية....
فقد بلغت من العمر أرذله...
وقد حلقت أعلامك منكسة...
وقد اغتصبت مكانتك...

كفاك تمثيلا بجثةالعروبة فالغربان تحلق فوقك

دار الكتب.......حلم مصطفى

ِ
شاب مصري جدا......

.... 25 سنة...

..حلم...فكر...نفذ...

و الحلم تحقق....

دار الكتب

طريقة مبتكرة للتشجيع على القراءة...و نظام بسيط لتوثيق الكتب و الجمع بين دور النشر و المكتبات في موقع واحد

الكل هيقرأ

يلا نحتفل مع مصطفى و نشاركه حقيقة حلمه و فرحته بدار الكتب

يوم الخميس 10-1-2008
في مكتبة البلد-ميدان التحرير -امام الجامعة الامريكية-31 شارع محمد محمود
الساعة السادسة مساءا

مبروك يا مصطفى
مبروك يا صاحب البوابة

تحديث
اللينك مبيفتحش عند البعض بسبب اعطال فنية صاحب البوابة بينظر في الموضوع و هقولكم اول ما يتصلح
تحديث2
اللينك بيفتح ياريت تزورو الموقع

البس الطرطور

ازيك يا مواطن؟
مبسوط؟
سنة جديدة اهة...عايز ايه اجمل من كدة!؟
ايه؟....بتدعي تكون احسن من اللي قبلها؟
ياراجل حرام عليك تدعي علينا
طيب قول يارب تفضل زي اللي قبلها..
على الاقل الناس لسه بتاكل..بتاكل ايه مش عارفة بس بتاكل..
على الاقل الناس بتعترض و بتحتج..اي نعم اغلبهم مبيخدش اللي هو عايزه..بس اهو..
على الاقل كل حاجة بتتزور بتلاقي اللي يطلع ينكر..حد عارف السنة الجديدة حيطلع اللي يقولك
"آه زورت..اعمل اللي تعمله"هيبقى بتحرج نفسك
يا مواطن يا لذيذ...
احمد ربك انك لسه عايش لا مت من الجوع..
ولا بيتك وقع على نافوخك انت و اهلك..
ولا العشة بتاعتك اتحرقت..
ولا غرقت في عبارة او مركب..
ولا اتقتلت في حادثة قطر..
ولا اتسحلت في مظاهرة او الانتخابات او الاستفتاء..
ولا اتعذبت في قسم شرطة..
ولا جالك مرض تموت من كتر تعب اللف على المستشفيات و تغيظ المرض..
ولا ميكروباص داسك او اتوبيس وقع بيك في ترعة..
ولا اتكهربت في عمود او وقعت في بلاعة...
ولا اعتقلت من على البلاج...
ولا وقع عليك سور مدرسة..
او طعنك حد عشان ياخد السبعة جنيه اللي معاك..
ولا انتحرت..
ولا حد تحرش بيك..
ولا ملقتش مية حتى تشرب..
ولااتدبست في اشاعة ..
ولا مت في طابور عيش..
يا مواطن يا عسل
بوس ايدك وش و ضهر و انشكح و اتمنى ان السنة الجاية تنتهي عليك بنفس الحال اللي انتهت عليك السنة دي..قوم هات كيلو لب و سوداني ...لو معاك حقه....
و اضرب البدلة و البس الطرطور ..
ايه لسه لابسه؟؟
من السنة اللي فاتت كمان..هايل...متقلعوش بقى...و احتفل كدة على ما قسم
و كل سنة و انتم طيبييييييييين
و حسبي الله و نعم الوكيل


آخرصورة التقطهافي2007 ومش عارفة ليه حساها مناسبة لليوم ده

حادث

صديقان لا يفترقان...اخوة
يخرجون و يأكلون و يلعبون سويا من سنين
و في احدى المداعبات الصبيانية
في منزل احدهما
فجرالثلاثاء
دوى طلق ناري
و مات احمد
استيقظ اهالي منطقة الشيراتون على فاجعة
يوم 25-12-2007
صديق قتل صديقه بالخطأ و هو يداعبه بسلاح والده
لم يكن يعلم انه يحوي ذخيرة
لم يقصد قتل اقرب و احب اصدقائه اليه
اعفيكم من اي تفاصيل مؤلمة
انا لا اعرف اي منهم شخصيا و ان كانوا اصدقاء لاخي و دخلوا منزلنا في يوم من الايام
ولكن قررت الكتابة عن الحادثة لتوضيح حقائق شوهتها بعض الصحف
والتحذير من اسلحة قاتلة توضع في البيوت ترخيصها لاينفي عنها الخطورة
و المطالبة للشباب بالتفكير في دعاباتهم و تصرفاتهم لانه لا عودة بعدها
ارجو الدعاء لاحمد بالرحمة و لصديقه الذي يرقد في المصحة بالسكينة
و للاسرتين المنكوبتين بالصبر و الثبات

يا بهية خبريني

لا ادري من اين ابدأ
فالبدء في موضوع نهايته مفجعة غصة في الحلق
حينما يكون الموت احد اختيارات الحياة الكريمة
حينما يكون مصير الشباب و العنفوان و القدرة على البذل
الاختناق بين اربع جدران ومواجهة نظرات الشفقة
والحسرة على عمر و اهل و اموال استنفدوا في الحصول على مؤهل عال
حينما تغلق الابواب و تستعر جحيم الاسعاروتنفرد الواسطة بالميدان
حينما تملأ النفوس برمال عواصف الاحلام التي اغتالتها قطار الحكومة المزعوم فيه الخلاص
حينها فقط يكون السعي خارج الحدود هو الامل الاخير
الامل الاخير في خلق كيان و كرامة و تحقيق ذات تاهت في عتمة الوطن
الامل الاخير في توفير حياة كريمة للستر و التعايش مع الواقع
انهم ليسوا بطماعين الا في لقمة العيش الشريفة
انهم لم يجرموا في تنفيذ ما امرنا الله به من السعي
لقد ماتوا بكرامة لقد غرقوا في وطنهم قبل ان يغرقوا في البحر
والغريق شهيد
انهم يشعرون بمصيبتهم و لكنكم يا اصحاب القرار لا تشعرون
انهم يشعرون لذلك تعلقوا بقارب ظنوا فيه النجاة
لقد بذلوا جهدهم في وطنهم فلم يجدوا ما يسدرمقهم فذهبوا يبحثون عن وطن
ف( الغنى في الغربة وطن...والفقر في الوطن غربة)..
لن اسألك يا بهية لماذا اصبحت طاردة لأهلك
ولكن لا تقذفيهم بالاحجار و هم منك خارجون
لا تلقي بالذنب على من لم يعد له وجود ليدافع عن نفسه
وجرمي المذنب
و يا بهية خبريني عن اللي قتل المصريين