Thursday, June 28, 2007

الانحياز بين التعامل و ثقافة الحوار


في نظرة حيادية للحالة المتردية للوطن العربي...و نتيجة الوضع السياسي القاتم و تذبذب الافراد في المجتمع الواحد و زيادة التدخلات الخارجية...هيمنت فكرة الانحياز او الانتماء لفكر او طائفة اوحزب اوكتلة او حركة ما يستخدمها الفرد في تحديد هويته و بكلامي هذا لا أعيب على احد انتمائه أو معتقداته أو افكاره... ولكن رويدا رويدا تصبح هي لغة التعارف و يتم طمس الهوية العربية و تضاؤل القضية المشتركة و نسيان الاهداف التي قامت عليها كل كتلة بين أغلب المنتمين لها..و يصبح الحوار مبتورا و متحفزا او عنيفا لا يرقى الى معايير الحوار الناجح و آدابه و يتحول التعامل فيه الى صراع قبلي مما لا يخدم اي هدف

الحالة الاولى


لم اتوقع ان يكون مشهد النهاية هو بداية مسلسل السلطة في فلسطين...و ان يفقد بريق الحكم صواب حماس و فتح...وانقسام الوطن العربي بين معارض لهذا و مؤيد لذاك و كأننا في مباراة لكرة القدم...و نسينا انها كرة من دم و شرف و كرامة عربية..و نسينا ما للفريقين من تاريخ مدجج بالنضال....و نسينا انه في يوم كانوا يحاربون بهدف واحد الا و هو تحرير فلسطين..و ظهور عناصر منشقة في احدهم لا ينفي النضال عن باقي اعضاء الفريق...و جرائم القتل المتبادلة لا تنتشل أحدهم من بئر الخذلان للقضية الفلسطينية....وكما انحاز كل لفريقه طمعا في الكرسي..انحاز كل منا الى فريق منهم طمعا في تحقيق رغبة سياسية...و تناسينا ان الهيمنة الصهيونية تتزايد..وان هذا الكرسي لو نصب فسيكون منصبا أعلى تل من الجماجم..و ان التعامل الدموي سيصبح تدريجيا هو لغة الحوار بين الفرق و الفصائل...و هو ما لا يقبله اي من الاديان السماوية...
رحمة الله عليك يا ابو عمار


الحالة الثانية


يفقد المئات يوميا ارواحهم في العراق...لا لشىء او جرم سوى انتمائهم الديني...فالسنة و الشيعة تحول حوارهم الى حرب عصابات..كل يحاول تصفية الآخر..و انحدرت تعاملاتهم الى اسفل الجرف...بتفجير الاضرحة و الرموز الدينية...و تناسوا انهم شعب واحد عانى من نفس القهر و المرض و الجوع و الحصار و الظلم لسنين...و تناسوا من هم و من يحتلهم بدعوى التحرير..ولم يعد يشغلهم سوى الانتماء البحت لفئة و اثبات الولاء لها ورفع اسمها عاليا بجوار اسم الدولة حتى ولو على حساب الدولة نفسها و كان الدم و انتهاك حرمة المقدسات هو الثمن...و في ظل هذا الشلل الانحيازي تضمر الاساسات الدينية القائمة عليها كل طائفة ...

الحالة الثالثة


تعاني مصر في الوقت الحالي من كبت سياسي...تسبب في خلخلة الفكر الوطني للشعب و احساسهم بالمهانة و الضعف في الوطن مما ادى الى تعزيز بعض التكتلات أو الاحزاب أو الحركات النشيطة لنفسها ( مع احترامي الكامل لها جميعا)...رغبة في استمداد القوة من المجموعة المتحدة...و ادت رغبة هذه التكتلات في بناء موقف سياسي سريعا و رغبة الافراد في دفعة تشجيع تنتشلهم من المياه الراكدة الى وجود فئة في اي تكتل لا تعي تماما ما القواعد المؤسسة لها والهدف المنشود... و قد لا تتفق معها في الافكار تمام الاتفاق...وتظهر هذه الفئة من طرحها غير الجيد و التحفز في اي حوار بينها و بين فئة من كتلة مغايرة...و ضعف الطرح يضر بالموقف السياسي للكتلة و هذه الفئة مما يعيد شعورهم القديم بالمهانة و الضعف فيتحول الحوار الى مشادة و تطاول بين التيارين المختلفين و دفاع كل منهم عن بيته السياسي ونتحول الى دويلات متناحرة قد يصل سوء التعامل بينها الى حد مؤسف تتداعى امامها وحدة الهدف الا و هو مصلحة الوطن و الرغبة في التغيير...

و على صعيد آخر...تأججت نار الفتنة الطائفية في بلد كان و لايزال يعيش فيها المسلم و المسيحي كأخوة..بغض النظر عن الحالات الفردية المؤسفة..و نظرا( كما اشرت مسبقا الى وجود فئة لا تعي الاساس للفئة المنتمية لها)و الذي تقوم عليها العقيدة(سواء الاسلامية او المسيحية)...و الذي ينبذ اي عنف و يدعو الى التسامح و التعايش كأمة واحدةو لا اعتقد ان اختلاف الدين بين الافراد يضر مادامت الملتين متفقتين في هذا الاساس..و لكن الذي حدث هو فقد لغة الحوار المشترك و غلبة التعصب عليه..مما اضر بتعاملاتنا و جعل الخوف و التنابذ ركيزة لها...

الحالة الرابعة


ضربت لبنان مثالا يحتذى به على مر سنوات في التعايش بين جميع الطوائف على ارضها...و اجتازت رحلة عذاب الحرب الاهلية ببسالة...و لكن من جديد..عاد شبح هذه الحرب ليشيع في انفس الآمنين فيها الرعب...فقد فقدت الطوائف لغة الحوار و ابتعدت عن صالح لبنان العام...و انحازت كل كتلة الى ما تؤيده من سياسة خارجية مما انعكس بالسلب على تعاملاتها الداخلية بشكل سىء..و لعل اغتيال رئيس الوزراء الاسبق رفيق الحريري كان بداية لكشف الاوراق...و تبعه اغتيال النائب جبران تويني..ثم الوزير بيير الجميل..و أخيرا اغتيال النائب وليد عيدو و ابنه ..جميع الاغتيالات تمت في وضح النهار بجرأة...كأنها اسلوب التعامل الجديد و على اللبنانيين ان يألفوه..اسلوب الهمجية و الوحشية...

Wednesday, June 27, 2007


















من وسط المية اللي مغرقة الدنيا فوق دي...
وقبل ما تقرأ اي بوست عزيزي المدون..عزيزتي المدونة..
تاخدلك حاجة حلوة و كان بيبسي و بالونة...تهنئة لصاحب البوابة...
لانفراج كربه..و الحمدلله.. ورجوع والده بألف سلامة...أطال الله في عمره..
و نحب نقول له..
حمدلله على السلامة يا حاج...

ملحوظة:ياريت بلاش حد يحط صباعه في كريمة التورتة لحد ما صاحب البوابة يقطعها

Sunday, June 24, 2007

ارفع رأسك يا أخي


لا تيأس...قف بصمود الجنود في المعركة

لا تستسلم لهاجس الوقت ...فغايتك آتية

ثق بالله الرحيم الذي لن يريد لك ضرا

اشحذ همتك...و لا تسمح لساقيك بالتخاذل

انظر الى الافق...و استمتع بتراقص السراب

واجه الرياح..و تحمل سخرية غبار الطريق من عينيك

اصبر....فالقدر هو محطتك

لا تحن رأسك امام شمس الظهيرة...تحداها

و ارفع رأسك يا أخي

عشان تشوف رقم الاتوبيس اللي هيعدي و تلحق تجري وراه!!!؟

Thursday, June 21, 2007

مدونون في حب مصر

التاريخ 20/6/2007

لا يهم انتمائك لاي حزب او عدمه

لا يهم جنسك او عملك

لا يهم شكلك او عمرك

ما يهم....

هو انك شاب تعشق مصر حتى الثمالة
هذا ما احسست به في ندوة
عن "الحرية الاليكترونية"بقيادة الرجل كبير المقام..شاب القلب..
الاستاذ محمد عبد القدوس..

واخيرا اثبتت مصر لي و للنظام ان بها شبابا جادا يحلم بغد افضل..
شبابا سيغدو يوما أبا يغرس وجودها اوأما ترضع حبها..
شبابا كونوا اسرة بأقلامهم قبل تلاقيهم...
و اذا تم قصف قلم احدهم تداعت له باقي الاقلام بالمساندة و الدعاء....
ولكن من
قصف قلمهم لا يعلم انه خلق منهم...
رموزا
..
ابطالا
..
قوة تتدفق في اوصالنا..


وجدت اننا

نحن المدونون أخوة من مصر واحدة...
نرى الجنة تحت اقدامها....و نذرف الدم لبكائها...

كفكفي دمعك مصري العزيزة
فهناك من احسنت تربيته



للاستزادة:مؤتمر المدونين بنقابة الصحفيين
وقفة لابد منها
تغطية لمؤتمر المدونين بنقابة الصحفيين
جزء من الصور

































جزء من الفيديو


Tuesday, June 19, 2007

تااااااااااااااااااااااااااااااااااااااااااااااااااااااج





مرر لي الاخ امام الجيل مشكورا تاج..بصراحة انا اتخضيت في الاول ليطلع طويييييل بس لقيت الراجل ممرر تاج صغنون بس عميق...ربنا يبارك فيك يا امام الجيل و يقدرنا على رد تاجك في الافراح ان شاء الله

بسم الله الرحمن الرحيم

أنت مين؟
انا نقطة مية

انسانة طبيعية جدا..اكتشفت اني طيبة لدرجة السذاجة بصدمة..بهتم بالحاجات الصغيرة اللي ناس كتير ميهتموش بيها بس مؤمنة ان الحاجات الصغيرة مهما كانت تافهة فهي بتعني حاجة كبيرة لغيري زي مثلا افتكر عيد
ميلاد شخص و اعيد عليه...حاجة معايا ممكن تسعد حد لو في امكانيتي اني اديهاله باديهاله...حد بيحب حاجة افضل فاكرة انه بيحبها لحد ما يصادف وقت اجيبها له او اعملها له و كل ده اغلب الوقت بعرفه من كلام الشخص و مبيكونش عارف اني عارفة بس اصلي مستمعة جيدة...احب المفاجآت السعيدة طبعا..عمري ما حسيت بالكره رغم ان في ناس في حياتي يستاهلوه بس كل اللي حساه هو عدم قبول و ضيق نحيتهم و مش مسامحة معرفش اسامح خالص اي حد زعلني او سببلي الم مهما حصل دايما ابقى فاكرة لاني بهتم بمشاعر اي حد و مبحبش ادايق او احرج حد فعلى الاقل الغير يهتم بمشاعري..صريحة لدرجة ممكن تضايق حد مني..عقلي مبيبطلش تفكير و تحليل ابدا لدرج اني بنام بالعافية

مين اكتر ست شخصيات بتحبهم؟

فيه كتير فا هتحايل على السؤال
1
-افراد اسرتي لكل واحد فيهم شخصية ذات نكهة مختلفة
2-شخصية خالدبن الوليد و ابو هريرة و ابو دجانة و مصعب بن عمير
3
-الشيخ زايد بن سلطان رحمه الله
4-اصدقائي مع اختلاف شخصياتهم من الطيب و
المسالم و المجنون و الرقيق و المقدام و الطفل وكدة يعني
5
-الاعلامي عمرو اديب و اوبرا وينفري
6-الدكتورة عبلة الكحلاوي و الداعية عمرو خالد و الدكتور محمد سليم العوا

أنت سعيد؟

الحمد لله ايه اللي مش هيسعدني.. مسلمة و بشوف و بسمع و بحس و بمشي و بتكلم وعندي بيت انام فيه..
في احسن من
كدة ...!؟
الحمدلله

لو اجتمعت أنت وحسنى مبارك فى غرفة واحدة هتقوله ايه؟

ممممم..ايه السؤال ده!؟....ما علينا...هسأله سؤال و اطلب منه رجاء...
السؤال:..ما هي نظرتك للشعب المصري بوجه عام و للشباب بوجه خاص؟
و ما هي معلوماتك عنهم؟

الرجاء:ممكن تخرج ايمن نور من السجن..الراجل كل امله دلوقتي انه يموت وسط اولاده؟
و بعدين هطلع ربع جنيه و هقوله انها اكثرفئة من العملة المصرية شيوعا في جيوب شعبك و اطلب توقيعه عليه!!

بس عارفين..دايما بحس ان اي حد بيعمل حاجة في البلد دي كانه بيكلم الريس
لان كل حاجة بتحصل لنا او علينا هي نتيجة قراراته و افعالنا هي نتيجة للقرارات دي

لو معاك مليون ونص هتعمل بيهم ايه؟


الحمدلله الواحد مش محتاج حاجة بس اذا ربنا اداني هيبقى كالتالي:
نص مليون لبابا و ماما:اهو احس اني قدرت اديهم حاجة في الدنيا مع ان مال الدنيا كله ميسواش
حاجة قدام قيمتهم واللي قدموه واللي بيعملوه عشانا كاني قدمت وردة لاصحاب مدينة الذهب
ربع مليون لاخواتي:عشان هم اللي ليا بعد ربنا و بابا و ماما في الدنيا واخواتي يعني...حاجة متتوصفش
ربع مليون لاصدقائي:المقربين جدا و هم مش كتير لانهم في منزلة اخواتي بثقتي فيهم و الحب المتبادل بيننا و انتفاء المصلحة بل بنخاف على مصالح
بعض و دول نادرييييين جدا و عشان اخوتنا فاحنا مع بعض على الحلوة و المرة
ربع مليون ليا
:عشان نفسي ادرس تصميم سيارات و النوع ده من الدراسة مش موجود في الدول العربية و لكن في ايطاليا و اسبانيا..حلم يعني
و ربع مليون الأخيرة:لمستشفى سرطان الاطفال و دي مش محتاجة تفسير

بتحب مصر؟

لأ طبعا.....انا بعشقها....كلمة الحب دي ضئيلة جدا بالنسبة لاحساسي ناحيتها ..دي مصر يا جماعة!
مصر الارض..ولكن الافراد بخاف منهم ..

بتحب البنات؟

اكيد السؤال ده هيبقى بالعكس يعني "بتحبي الاولاد؟"حاجة كدة..بس هجاوبه من الناحيتين..انا بحب البنات صديقاتي و اكيد مش من النوع بتاع البنوتة الزائفة و هم قلبهم ابيض وبحبهم و للاسف قليلين جدا لسببين الاول انه اكتشفت ان بعض البنات هنا في مصر بيغيروا من بعض وبوجهين وكتير ممكن ميساعدوش بعض و احيانا بيضروا بعض"طبعا انا مش بعمم في بنات زي الفل"والثاني:ان مجال دراستي و الجامعة اللي كنت فيها كان الذكور فيها اكتر بكتير من الاناث ..اما الاولاد او الذكور فيعني الكام صديق اللي طلعت بيهم رجالة جدا و محترمين و ميفرقوش عن اخواتي حاجة غير ان اسم الاب متغير و انا بحبهم..و بوجه عام في الاناث:بحب البنت المحترمة ذات العقلية و الرأي و الشخصية ..و في الذكور:الرجل المحترم المهذب الذي يحترم المرأة و ايضا ذا عقلية و رأي و شخصية

أنت مسلم؟

بكل فخر نعم و الحمدلله على نعمة الاسلام

ليه؟

مقدرش اسأل ليه عشان دي نعمة من ربنا هو وحده اللي يعلم ليه انعم عليا بيها كل اللي اقدر عليه اني احمده عليها و انه جعلني من امة اشرف الخلق عليه افضل الصلاة و السلام و دي الفطرة السليمة

أيه اكتر موقف محرج أتعرضت ليه؟


مرة كنت مروحة من الجامعة و بعدي الشارع و كان زحمة اوي فا و انا بتسحب بين العربيات بنطلوني شبك في حتة حديدة طالعة من تاكسي و التاكسي اتحرك فاتقطع البنطلون من عند منطقة اعلى الركبة حتة كبيرة شوية


اتصرفت ازاى؟


ستر ربنا ان شنطة الجامعة كبيرة و عريضة فغطيت مكان القطعة و الحمدلله مكنتش باينة من الشنطة خالص و جري على البيت


أيه الامنية اللى بتدعى ربنا انه يحققها ليك؟



يا رب احسن خاتمتنا و ادخلنا الجنة مع الانبياء و الصديقين و الشهداء



Friday, June 15, 2007

كسبنا صلاة النبي


صلوا على النبي


"عليه الصلاة و السلام"....



انا عايزة اكلم الشباب من سن 18 ل 83 سنة...
!

انفض مولد انتخابات التجديد النصفي لمجلس الشورى و الكل طلع منه بلا حمص..


ليه
؟


عشان اللي بيتوزع كان شوكلاتة ميعرفش طعمها الا ولاد الذوات في"بارتي"مش مولد..


عرفتوا بقى ان الباقي
بيئة..و ميستاهلوش يدخلوا المجلس!؟..

هيعروا "الوطن"...



ما تصلوا على النبي يا جماعة....



"عليه الصلاة و السلام"



اللي نفسي افهمه بقى...كان ليه بس الدوشة قبلها بكام شهر و ممنوع قيام احزاب على اساس ديني..ولا شعارات دينية..و الناس تغير شعارها..و ناس بتقاطع الانتخابات...و 800 مرشح و 690 معتقل...و نائب ينضرب..و المرشحين اللي عدوا من الفلتر يصرفوا دعاية و يفط و الذي منه...و طفل تدوسه عربية مرشح...وشاب ينضرب بالرصاص..و زحمة..و حراسة....و تجاوزات..و بلطجة قدام اللجان..و صحافة تكتب..وتلفيزيون يذيع


و بعد كل ده تلاقي انهم قرروا ينقلوا المجلس لمقر الحزب الوطني!


مش حرفيا يعني بس تقريبا كدة

"ما تصحصحوا شوية معايا"

طيب كان ليه وجع القلب اللي فات ده كله و لا دي بيروقراطية و خلاص؟
و بكدة مش هيتكلفوا غير ثمن كوبايتين الشاي اللي هيشربهم النائب المستقل و النائب بتاع حزب التجمع اللي كسبوا مع 57 من الوطني....
من باب كرم الضيافة يعني..



صلوا على النبي


"عليه الصلاة و السلام"



و اللي مجنني بقى....ان في مصر تقريبا و الله اعلم
24 حزب وواحد بيحاول..و كانهم مش موجودين...طيب بعد اللي حصل ده اللي مقاطع هيفضل طول عمروا مقاطع..واللي غير شعاره هيرجعه تاني...ماهو مفيش فايدة بقى..
يبقى هيختفوا...!


عشان كدة الواحد مش مؤمن بأي حزب عشان مفيش حياة سياسية او في طريقها للاندثار

اللي غايظني بقى...ان في تصريح النهاردة"15/6" في المصري اليوم

"ان الانتخابات كانت تعبيرا عن ارادة الشعب"...

هو حد فيكم يا شعب انت و هو راح و مقليش!؟



زعلتوا ليه؟

طيب استهدوا بالله و صلوا على النبي كدة و اقعدوا

"عليه الصلاة و السلام"..

كمان زيدوا النبي صلاة..

"عليه الصلاة و السلام"..

شفتوا..المهم كسبنا صلاة النبي..هي اللي هتنفعنا



Monday, June 11, 2007

المصرييييييييييييييييييييييييين




طلبة المدارس.....

طبعا انا مش بتكلم على المدارس الخاصة اللي بشىء و شويات و الطلبة بيروحوا و يرجعوا في باص مكيف و لا اجدعها فوج سياحي في الهرم!!...انا بتكلم عن المدارس الحكومية....والله انا بخاف من العيال دي في الشارع..بيبقوا مجرمين ..مش عارفين هما كبار ولا صغيرين بيقلدوا تصرفات الشباب السيء جدا في الشارع من معاكسات بذيئة و مضايقات مستفزة قد تصل لمد الايد مش بس على البنات بيضايقوا كل الناس..و ممكن يؤذوا حد....فئة اخرى من الطلبة هم طالبات اعدادي او الثانوي...تلاقي البنت من دول ضاربة شعرها اكسجين و مش غسلاه بقالها شهر و فاتحة قميص المدرسة عشان يبان البدي اللي تحته و مضيقة الجيبة او المريول الكحلي لدرجة انها بتمشي بصعوبة و فاتحة فتحتين من الجنبين عشان الجينز اللي لبساه تحته يبان..كل ده كوم و الافندي اللي هي ماشية معاه و مزوغه من المدرسة عشانه كوم تاني خالص...واد مستحماش من تلات سنين بالمستريح كدة...وشنبه لسة بيخط على وشه..و شكله صبي ميكانيكي او مزوغ من محل الفول اللي بيوصله الطلبات"
مع احترامي للمهنتين طبعا"..و ملزق شعره بالفازلين و لابس سلسلة سودة عليها جمجمة.. و عليه آثار مجاعة الصومال..انا مش عارفة بيحب فيها ايه و لا هي بتحب فيه ايه..ده عشان يبان عايز يتنقع في كلور اسبوع و ياخد محلول الجفاف...و بيبقوا ملطعين في كل حتة كدة زي الدبان..

فضيلة المفتي....


النوع ده من البشر بيتخذ الدين وسيلة تعارف و تباهي و مع الوقت بيصدقوا الحالة اللي عملوها لنفسهم و يعيشوا في دور اولياء الله الصالحين و بيبتدوا يفتوا في امور الدين و هم ابعد ما يكون عن الفتوى فبيختلط في كلامهم الدين بالدجل و المصيبة ان فيه ناس بتصدق.....تلاقي الواحدمنهم يبوصلك و يقولك"
ده انت محسود تعالى اماارقيك مفيش حد رقيته الا و ربنا كرمه"كرمه في ايه متعرفش و انت محسود في ايه برضه متعرفش بس اكيد المفتي عارف مش هو مكشوف عنه الحجاب!؟ و اذا اعترضت هيقولك ده الحسد و السحر مذكور في القرآن..المشكلة انك بتعترض عشان انت مش بتشكي من حاجة... واحدة مرةفي المواصلات حكيتلي ان جوزها طلقها تالت مرةفي لحظة غضب فراحت لواحدة من دول و قالتلها"ارجعي لجوزك يا بنتي مفيش حاجة حصلت..اصل انتوا معمول لكم عمل مربوط في ورقة شجرة كل ما الهوا يهفهف عليها تتخانقوا"!؟....و الله الكلام ده اتحكى لي..افرض دودة كلت الورقة ولا عصفورة و قفت فوق الفرع بتاع ورقة الشجر..او حتى ورقة الشجر وقعت في الخريف تولع هي و جوزها في بعض بقى..!؟...
يارب نجي امتنا يا رب


ابو العربي...


ده بقى فشار جدا..و بيبقى مصدق نفسه...و عايزك تصدقه و لو تمثيل حتى مع ان كلامه مش منطقي..و الهلس فيه عالي اوي...مثال...يقولك" ده انا كنت هعمل حادثة فظيعة لولا اني خدت بالي و شديت فرامل اليد فالعربية عملت درفت بس مكنتش لابس الحزام فكتفي اتخلع و نزلت من العربية و قعدت اخبطه في الباب عشان يتعدل"والله القصة دي سمعتها من واحد و المفروض انك تقول"ياااااه هو ده الفرعون المصري"..اعرف محامي في شؤون قانونية بتاعة شركة دايما يقول انه مستشار مع ان معهوش حتى كارنيه النقابة!؟ و لما اسمع منه كدة بشاور عقلي ابلغ عنه...




في الآخر احب اقول لكم ان مصر ليها نكهة تانية بالشخصيات دي..اكيد ظروف المجتمع الحالي افرزتها بس فيه نماذج تانية لسة مجرفهاش التيار "الدنيا لسة بخير يا جماعة"...بس كل واحد فينا فيه صفة من دول او خليط من اجزاء من الشخصيات و محدش كامل ده الكمال لله ...و كل المجتمعات فيها شخصيات سلبية مش بس مصرنا الفرق ان احنا عارفين اللي فينا و نقول للاعور انت اعور في وشه...ياريت نحاول نغير من نفسنا..ربنا يصلح الحال..طبعا انا مجبتش كل الشخصيات كفاية عليكم كدة... عن اذنكم بقى الحق اركن المدونة و"توت..توت"ده صوت الانذار"الالارم يعني"...
و دمتم مصريييييييييييييييين


تمت بحمدالله

Thursday, June 7, 2007

المصرييييييييييييييييييييييييين




الشباب الروش...


اكيد كلنا شفنا الواد ابو جل في شعره اللي مبلط في الشارع!؟او ابو شعر منكوش...ولابس قميص او تي شيرت روز عليه ورد او مطرز و البنطلون واقع منه و آل يعني الواد مفيش زيه اتنين و يا ارض اتهدي و كله ماشي على الموضة و يا سلام بقى لما تلاقي واحد لابس كدة و عنده عضلات آل يعني كدة الواد راجل مية مية وروش جدا....ولا البنات اللي تلاقيها لابسة بدي ستومك"
يعني بطنها باينة لا مؤاخذة" او البنطلونات ال"لو ويست".."يعني توصل لحد تحت الوسط..لا مؤاخذة برضه"الضيقة و بتبقى ماشية مش قادرة تتنفس...او مثلا تلاقيها لابسة ضيق جدا زي بنطلون الليكرا او الاسترتش الضيق"بتاع كارينا" و فوقيه فستان قصير و محجبة!!؟؟؟او الاقي واحدة لافة راسها لفة هدايا بايشاربات كتير و حاجات بتلمع وتقريبا ناقص تعلق نور او ترش "جليتر" و آل هي كدة محجبة!؟..طبعا متخلونيش اتكلم عن الشبشب ابو صباع"الزنوبة"اللي تلاقي الولد او البنت لابسينه و ماشيين يطرقعوا بيه و يجرجروه على الارض كأنهم داخلين الحمام مش نازلين الشارع و لا الشرابات اللي بصوابع انا بخاف من رجلين الناس اللي لابساه بحس كأن عندهم رجلين فراخ او عندهم اربع ايدين.."الظاهر اني تقلت من افلام الرعب فبيتجيلي الهلاوس دي"....!؟


الصوت العالي...


مش عارفة ليه احنا المصريين بنحب الصوت العالي...اكيد فيه حاجة حصلت في ودان الشعب...تلاقي واحد سايق عربيته و معلي الاغاني على الآخر..او واحد تاني بيحب يدوس الكلاكس كتير بسبب او من غير و يا سلام بقى لو بينده واحد صاحبه..تلاقي الشارع كله بيرد عليه و بيترجاه يبطل يدوس على الكلاكس ده اذا مكانش بيزعق"يامحمااااااد"...حاجة تانية...تلاقي شلة بنات قاعدين و عادي بس صوتهم عالي ملفت جدا في كلامهم و ضحكهم...عندنا جارة كل ما تنده بنتها اللي في الغرفة اللي جنبها اسمعها"يا نوووووريييييييييين"..مش عارفة ليه كل ما اسمعها احس انها هتقول بعد كدة"التمساحة يالاه"زي سناء جميل في الراية البيضاء!؟..مثال آخر...ناس قاعدين بيتناقشوا تلاقي واحد صوته علي عشان يثبت رأيه او يفرضه"كأنه في برنامج الاتجاه المعاكس"...ده غير البياعين المتجولين واللي مكتفوش بصوتهم بل بقوا بيجيبوا عربيات و ميكرفونات و ينادوا على بضاعتهم..امعانا في تعذيبك!!؟


البلطجة....



ودول ناس واخدينها عافية و بالدراع...زي سايس الجراج...تبقى ماشي جنب مول و عايز تركن وتلاقي ده طلعلك مش عارف منين زي مارد المصباح و يشاورلك على الركنة "
مع انك شايفها"و يديك ارشادات و توجيهات عن كيفية الركنة "مع انك مادام وصلت المول بعربيتك يبقى اكيدبتعرف تسوق"..تقدر متديلوش حاجة!!؟لأ طبعا عشان هترجع تلاقي عربيتك مكسورلها فانوس او مراية او مخبوطة او مخدوشة بطول العربية.......نوع تاني ...تلاقي طالب الثانوية خارج من مدرسته يوم النتيجة و مبسوط بنجاحه و تلاقي اللي يتلم عليه عشان عايزين"الحلاوة"هم ذاكروا مكانه و نجحوه ولا ايه!؟.....مثال تاني..ناس بتشتري شقة في مكان و بعد ما يتفقوا مع اصحاب الشقة تلاقي البواب ملاحقهم و بيطاردهم عشان"الحلاوة"و لو مخدهاش مش هيساعدهم في نقل حاجتهم او يكسرها لهم لو نقلها..
نكمل في الجزء الخامس و الاخير ان شاء الله

ملاحظة:المفروض ده كان الجزء الاخير بس عشان البوست ميبقاش طويل اوي عملت جزء خامس

Monday, June 4, 2007

المصرييييييييييييييييييييييييين




الفضول............

طبعا الفضول صفة بشرية مفيدة بس مش دائما..لما بتكون زيادة عن الحد احيانا بتتحول الى قلة ذوق و حشرية....زي مثلا تكون في البنك و هتسحب او تودع فلوس تلاقي واحد بيسألك هتسحب كام او هتودع كام!!؟.....او واحد يسألك بتقبض كام!؟...او وحدة تسأل عروسة او امها عن المهر اوثمن الشبكة!!؟.....او تبقى واقف بتاكل ساندوتش و تلاقي واحد معدي بيبصلك في اللقمة و بيدقق عايز يعرف انت بتاكل ايه....مرة كنت بفتح شنطتي و لقيت واحدة جنبي مدلدلة دماغها في الشنطة تعرف فيها ايه!!؟؟..او قاعد بتذاكر في احدى المواصلات و تيجي تقلب الصفحة فتلاقي اللى يقولك ثانية واحدة اكمل قراية!!؟ الموقف ده حصل معايا في رمضان..كنت قاعدة في المواصلات اقرأقرآن و جيت اقلب الصفحة لقيت اللي واقف جنب الكرسي بتاعي حط صباعه على الصفحة قبل ما اقلبها و بيقرا معايا..طبعا اللي ربنا فتح عليه ده من الجزء الاول هيقول"اديكي خدت ثواب"..هقول ماشي بس الموقف ده صعب تقييمه لان فيه حتة قلة ذوق...او مثلا الناس اللي بتتلم على واحد عامل حادثة و بدل مايساعدوه يتلموا عليه يفطسوه و يتفرجوا عليه و هو بيسبح سباحة الفراشة في دمه ولا رانيا علواني عشان كل واحد لما يرجع بيته يقول"يااااه ده انا شفت حتة حادثة كانت مغرقة الدنيا دم"!؟...اديك مثال تاني..تبقى في هايبرماركت او كارفور بتشتري لوازم بيتك و تلاقي اللي يبص في عربيتك بيشوفك انت اشتريت ايه!؟.او لما بتبقى في اشارة و تلاقي اللي في العربية اللي جنبك بيتأمل فيك و في عربيتك...مش هقولكم طبعا عن الموبايل اللي يرن في التاكسي او في محل انت واقف فيه فتلاقي امة محمد كأن على رؤوسهم الطير و مركزين معاك اوي...ولا حتى البواب لما يفتح الاكياس اللي انت جايبها و هو شايلها معاك عشان يعرف فيها ايه......والله اتنرفزت و انا بحكيلكم!؟


الاستنطاع.....


الناس من اللي عندها الصفة دي بيبقى عندها على رأي سعاد حسني"برود أعصاب اسم الله و لا جراح بريطاني"...شعارهم"ابو بلاش كتر منه"..انا الصفة دي بتقرفني جدا...طبعا اللي ربنا فتح عليه ده هيسألني ليه؟"يا جماعة حد يشيله يرميه بره بقى!!".....علشان في ناس مبتبقاش محتاجة الحاجات اللي بتستنطع و تاخدها.....هقولوكم منظر اكيد معظمكم شافه...تبقى داخل كارفور او هايبر ماركت"برضه" او سبينيس"اهو حاجة جديدة" و تلاقي ام بتتسوق مع ابنها تقوم فاتحه له كيس شيبسي و ازازة عصير ...بتغذيه كده ببلاش مع ان عندها القدرة الشرائية..انا مرة وقفت اراقب عيلة فتحوا علبة كرواسان ووقفوا ياكلوها وكل اللي في دماغي انه ايه القيم اللي بيرسخها رب الاسرة دي في اولاده!؟؟......اديك مثال آخر على السنتحة و الاستنطاع....تبقى واقف بعربيتك في الاشارة و تلاقي الكناس يجي يكنس الحتة اللي قدام العربية لحسن عربيتك تتكعبل في التراب و تقع تتعور و يبصلك و يقول"كل سنة و انت طيب يا بيه او يا هانم"..و مبيبقاش في مناسبة عشان يعيد عليك..يمكن عيد ميلاد الشارع!؟...طبعا انت لازم تديله حاجة مش هو سوبرمان اللي انقذ عربيتك من ان رجلها تتوسخ و هي ماشية حافية!!!؟.....او مثلا العيال الصغيرة اللي بتبيع مناديل يتشعبطوا فيك كأنهم قرود وانت شجرة موز و يتحايله عليك تاخد منهم و اذا رفضت و بشدة يقولولك"طب هات ربع جنيه"اي حاجة تطلع منك و السلام المهم ياخدوا حاجة ويا سلام بقى لو كنت ساعتها ماسك علبة عصير...هيبقى عندك اختيار تالت ..يا اما تشتري منه يا اما تديله ربع جنيه يا اما هتلاقيه يقولك "هات بق عصير"!!؟

البنوتة الزائفة....

ودي بقى بتتصنع الدلال و تتحول الى مسخ انثوي..و البنات اللي من النوع ده كتير و لما بتندمج في الحديث بتنسى تمثل الدلال و تلاقيها بنت عادية طبيعية و صوتها طبيعي"اصل فيه منهم حسهم الفني عالي فبيغيروا حتى صوتهم بما يتلائم مع طبيعة الدور"..تقابل الواحدة من دول تلاقيها بتتنطط و تصوت و تقول لك"ازيك يا توتي؟عاملة ايه يا لولو؟وحشتيني خالص يا كوكي...بتعملي ايه هنا يا كوتوموتو..و يا بوتي بوتي..و يا لولا"وغيره من اسماء القطط...و تحس انك طفل عنده سنتين او من متحدي الاعاقة....افتوني في امري افادكم الله.. دي ارد عليها اقولها ايه؟!"كويسة" مثلا و لا اغني"فتحي يا زهور فتحي"!؟

اكمل لكم في الجزء الرابع ان شاء الله
انا في المصري اليوووووووووم...حد يسمعني زغروطة