الفضول............
طبعا الفضول صفة بشرية مفيدة بس مش دائما..لما بتكون زيادة عن الحد احيانا بتتحول الى قلة ذوق و حشرية....زي مثلا تكون في البنك و هتسحب او تودع فلوس تلاقي واحد بيسألك هتسحب كام او هتودع كام!!؟.....او واحد يسألك بتقبض كام!؟...او وحدة تسأل عروسة او امها عن المهر اوثمن الشبكة!!؟.....او تبقى واقف بتاكل ساندوتش و تلاقي واحد معدي بيبصلك في اللقمة و بيدقق عايز يعرف انت بتاكل ايه....مرة كنت بفتح شنطتي و لقيت واحدة جنبي مدلدلة دماغها في الشنطة تعرف فيها ايه!!؟؟..او قاعد بتذاكر في احدى المواصلات و تيجي تقلب الصفحة فتلاقي اللى يقولك ثانية واحدة اكمل قراية!!؟ الموقف ده حصل معايا في رمضان..كنت قاعدة في المواصلات اقرأقرآن و جيت اقلب الصفحة لقيت اللي واقف جنب الكرسي بتاعي حط صباعه على الصفحة قبل ما اقلبها و بيقرا معايا..طبعا اللي ربنا فتح عليه ده من الجزء الاول هيقول"اديكي خدت ثواب"..هقول ماشي بس الموقف ده صعب تقييمه لان فيه حتة قلة ذوق...او مثلا الناس اللي بتتلم على واحد عامل حادثة و بدل مايساعدوه يتلموا عليه يفطسوه و يتفرجوا عليه و هو بيسبح سباحة الفراشة في دمه ولا رانيا علواني عشان كل واحد لما يرجع بيته يقول"يااااه ده انا شفت حتة حادثة كانت مغرقة الدنيا دم"!؟...اديك مثال تاني..تبقى في هايبرماركت او كارفور بتشتري لوازم بيتك و تلاقي اللي يبص في عربيتك بيشوفك انت اشتريت ايه!؟.او لما بتبقى في اشارة و تلاقي اللي في العربية اللي جنبك بيتأمل فيك و في عربيتك...مش هقولكم طبعا عن الموبايل اللي يرن في التاكسي او في محل انت واقف فيه فتلاقي امة محمد كأن على رؤوسهم الطير و مركزين معاك اوي...ولا حتى البواب لما يفتح الاكياس اللي انت جايبها و هو شايلها معاك عشان يعرف فيها ايه......والله اتنرفزت و انا بحكيلكم!؟
الاستنطاع.....
الناس من اللي عندها الصفة دي بيبقى عندها على رأي سعاد حسني"برود أعصاب اسم الله و لا جراح بريطاني"...شعارهم"ابو بلاش كتر منه"..انا الصفة دي بتقرفني جدا...طبعا اللي ربنا فتح عليه ده هيسألني ليه؟"يا جماعة حد يشيله يرميه بره بقى!!".....علشان في ناس مبتبقاش محتاجة الحاجات اللي بتستنطع و تاخدها.....هقولوكم منظر اكيد معظمكم شافه...تبقى داخل كارفور او هايبر ماركت"برضه" او سبينيس"اهو حاجة جديدة" و تلاقي ام بتتسوق مع ابنها تقوم فاتحه له كيس شيبسي و ازازة عصير ...بتغذيه كده ببلاش مع ان عندها القدرة الشرائية..انا مرة وقفت اراقب عيلة فتحوا علبة كرواسان ووقفوا ياكلوها وكل اللي في دماغي انه ايه القيم اللي بيرسخها رب الاسرة دي في اولاده!؟؟......اديك مثال آخر على السنتحة و الاستنطاع....تبقى واقف بعربيتك في الاشارة و تلاقي الكناس يجي يكنس الحتة اللي قدام العربية لحسن عربيتك تتكعبل في التراب و تقع تتعور و يبصلك و يقول"كل سنة و انت طيب يا بيه او يا هانم"..و مبيبقاش في مناسبة عشان يعيد عليك..يمكن عيد ميلاد الشارع!؟...طبعا انت لازم تديله حاجة مش هو سوبرمان اللي انقذ عربيتك من ان رجلها تتوسخ و هي ماشية حافية!!!؟.....او مثلا العيال الصغيرة اللي بتبيع مناديل يتشعبطوا فيك كأنهم قرود وانت شجرة موز و يتحايله عليك تاخد منهم و اذا رفضت و بشدة يقولولك"طب هات ربع جنيه"اي حاجة تطلع منك و السلام المهم ياخدوا حاجة ويا سلام بقى لو كنت ساعتها ماسك علبة عصير...هيبقى عندك اختيار تالت ..يا اما تشتري منه يا اما تديله ربع جنيه يا اما هتلاقيه يقولك "هات بق عصير"!!؟
البنوتة الزائفة....
ودي بقى بتتصنع الدلال و تتحول الى مسخ انثوي..و البنات اللي من النوع ده كتير و لما بتندمج في الحديث بتنسى تمثل الدلال و تلاقيها بنت عادية طبيعية و صوتها طبيعي"اصل فيه منهم حسهم الفني عالي فبيغيروا حتى صوتهم بما يتلائم مع طبيعة الدور"..تقابل الواحدة من دول تلاقيها بتتنطط و تصوت و تقول لك"ازيك يا توتي؟عاملة ايه يا لولو؟وحشتيني خالص يا كوكي...بتعملي ايه هنا يا كوتوموتو..و يا بوتي بوتي..و يا لولا"وغيره من اسماء القطط...و تحس انك طفل عنده سنتين او من متحدي الاعاقة....افتوني في امري افادكم الله.. دي ارد عليها اقولها ايه؟!"كويسة" مثلا و لا اغني"فتحي يا زهور فتحي"!؟
اكمل لكم في الجزء الرابع ان شاء الله
45 comments:
هههههههه
انا اول مرة ابدأ اكتشف بجد صفات للمصريين
عجبتني اوي حكاية اني ابقى واقف باكل ساندوتش و الاقي واحد معدي بيبصلي في اللقمة و بيدقق عايز يعرف انا باكل ايه
بتحصل كتير و بيبقى نفسي احكيلو تعال كل معاي احسن
بالنسبة للالبنوتة الزائفة
دي بقى موضوع تاني
انا و صحابي بنسميهم بابيي
او فافي
دول بقى علشان تتفرج و تضحك شوي
بس يارب ما اكونش مدايق حد برايي
اما الاستنطاع و ياعيني على الاستنطاع
خصوصا لما تجي مثلا عربية و توزع بيبسي عندنا بالجامعة ببلاش
بتلاقي الناس بتلف و تقف تاني بالدور لا ومش بس كدة ده في منهم الي بيتصل على قرايبو ..... تعالو الحقو بيبسي ببلاش
ماتقولش انهم بيوزعو عفو ملكي
ياساتر يارب
بانتظار الحلقة الرابعة
ربنا ما يحرمنا من نقط المية
ana fahamt w mowaf2aky f kol ely 2olteeh bas ya3ny eh santa7a??
ايه التحليل العميق ده لشخصية المصرية بس ايه حكاية الهايبر ماركت وكارفور والعربيات براحة علينا احنا غلابة بس عاجبنى اوى حكاية لما التليفون بيرن الناس على ررؤسها الطير فعلا بتحصل الكل بيسكت هووووووس ويبقى اللى بيتكلم صوته عالى ساعتها اوى شعب لذيذ
لا ده غير مواقف الاستطناع بين الشباب و بعضهم .. كل واحد ينزل باراشوت على التاني عشان ياخد سيجارة من زميله او ازازة الحاجة الساقعة بحجة انه مكسل يروح يشترى او معووش فلوس :))
اما حكاية الفضول دى عادية جدا ومحدش واخد باله انه فضول زى مثلا تكون قاعد فى البيت وتلاقى صوت زغاريط فى الشارع الكل يجرى على البلكونة يشوف فيه ايه والعروسة لابسه ايه وكام عربية واقفة فى الشارع .. ولو سمعوا صوت زعيق يجروا تانى على البلكونة يشوفوا مين اللى بيتخانق وايه الاسلحة المتواجدة وكل واحد يقول للتانى ايه ده احمد هو اللى بيتخانق مع بلية الميكانيكى طب انا هنزل اظيط وسطهم
ياريت تكتبي فى الجزء الاخير عن الظيطة اللى بمعنى الكل بيمشي مع الموجة
بس عايز اعلق على تعليق دكتور كيلر انا ملاحظ انه واخد فكرة وحشة قوى على المصررين وصفاتهم رغم انه عايش فى مصر .. مش معنى اننا بنقول اننا شعب فضولى وعارف كل حاجة واستنطاع يبقى كل الناس كده لان زى ما فى الوحش في الحلو ومعتقدش ان المصريين هم بس اللى فيهم الصفات دى .. مش عارف ليه حسيت اننا لازم نبرز المميزات زى ابرازنا للعيوب
اسف طولت عليكم :)
بوست جامد جدا كالعادة
وعايز بقا اقولك بالتفصيل فيه
بالنسبة للشخصية الاولى ودي قابلتها كتير في حياتي وبلاقيها في البنات اكثر من الولاد لسبب مهم
وهو ان البنات بيتحرجوا يقولوا لبعض انتي فضوليه
انما الولاد ماشاء الله لا قوة الا بالله الواد الفضولي ده بياخد كمية تريقة تخليه يبطل فضول
المهم بقا البنت الفضولية بما اننا اتفقنا انها صفة موجوده في البنات اكثر يعني
البنت دي بيكون نقطة ضعف جامده اوي الفضول
لدرجة انك ممكن تخليها تعمل اي حاجه علشان تعرف اللي هي عايزاه
وكلمه اي حاجه اقصدها حرفياً
ممكن تستغليها مثلا تجيبلك اللي انتي عايزاه علشان تعرف
ممكن تشتغليها لو متضايقة منها
عامة كلمة بقولها على طول وبحبها زي مسمعتها زمان
الفضول قتل القط
وفطس البنت
:))
----------------------
بالنسبة بقا لشخصية الاستنطاع
فده يعني موجود هنا في معارفي
بس قليل اوي
عامة النوع ده او الحالة دي بتيجي للإنسان ساعات
زي مثلا مانشت يشدك في جرنال تبصي تقريه
بس عامة لازم الواحد يقاوم الموضوع ده في نفسه
---------------------
بالنسبة للبنت اللي بتتصنع انها بنوتة دي
او بتتصنع الانوثة
فدي سهل اوي تتكشف
علشان الانوثة صفة المفروض موجوده في البنت بدرجة متفاوته
فاللي بتعمل كده
بكل هدوء
قوليلها
وتخني صوتك
الحمد لله كويسة يا عنيا
اهو اتصنعي عليها الخشونة يعني
:)
وعلى فكره النوع ده موجود كتير اوي
وربنا يرحمنا
تحياتي على البوست الجامد
وفرحان اني رديت بدري المره دي والحمد لله
هههههههه
موضوع جميل
بس ليا تعليق بسيط بخصوص موضوع الهايبر وكده في ناس بعلا بتعمل كده بس مش لازم يكون بيسرق او بيستنطع بعد ما بيخلص الحاجه اللي فتحها بيحاسب عليها لما بيجي يخرج.
هو اللي يغيظ مثل انك تلاقي عرض تذوق لمنتج ما مثلا وتلاقي مجموعه واقفين يتذوقوا الحاجه خمشتاشر مرة عشان يتأكدوا من انها فعلا كويسة وتستحق التذوق مره اخري وهكذا...
واحب اضيف برضه عشان الناس ماتخدش فكرة غلط عن كل المصرييييييين ان دي عينات من المجتمع وليس كل المجتمع .
وبانتظار الجزء الرابع.
لسة بدري
واوعي تنسي شخصية الفشار
جميل اوي التحليل مع خفة الدم انا ابتديت انتظر بوستاتك بفارغ الصبر
تحياتي ومتابع
هي لســــــــــه فيها جزء رابع
حرام عليكي
انتي بتتكي بجد ع الجروح
انا وانا عمال اقرا البوستات بتاعتك عمال افتكر في احداث متابقة مع اللي انتي كتباه دة
مش معقول انتي كنتي معانا ولا ايه؟
وبعدين معنتيش تروحي اي هايبر ماركت تاني واضح انه بيقلب عليكي وعلينا المواجع
بالمناسبة
مبروك الحتة بتاعة المصري اليوم النهاردة
حتة في الجون.....عملتيها ازاي دي
كل مااقابل حد اقولهم المدونة ادي انا عارفها
القرعة بقى اللي بتتباها بشعر بنت اختها
وانتي بقى سيادتك تبقى بنت اختها
تحياتي واحتراماتي
بوست روعة
dr-killer
هي صفات بعض المصريين الحقيقة و كل الدنيا فيها الصفات دي بس بتختلف نسبها من شعب لآخر..
متعزمش على حد كدة في الشارع عشان ممكن يقولك طب هات حتة!!
عربية البيبسي دي انا شفت الحكاية دي في الجامعة فعلا مرة واستغربت جدا من الزحمة على الناس اللي كانت بتوزع!!
تحياتي
queen erazer
منورة المية بأول زيارة و يارب متكونش الاخيرة..السنتحة بقى هي هي الاستنطاع بس بلغة الشباب اليومين دول
تحياتي
امام الجيل
اخجلتم تواضعنا ده تحليل كدة على ما قسم..و فعلا لما الناس بتلاقي واحد بيتكلم في الموبايل بتسكت وتركز معاه اوي و الراجل تلاقي صوته عالي يمكن عشان الناس سكتت و يمكن عشان عجبه الناس و هم بيبصوله و هو بيتكلم و خاصة اذا كان معاه موبايل غالي...
نورت المية
شاب مصري
الحمدلله اني مش شاب عشان لو حد برشط عليا بتنرفز اوي...
فعلا الفضول فينا كلنا بس فيه منه فضول حميد و بعيد عنك الفضول المؤذي...
اقتراحك عن الظيطة قيد البحث شكلكوا مش عايزين تختموها بأربع اجزاء..
اما تعليق دكتور كيلر فا هو مش واخد فكرة وحشة ولا حاجة اكيد قابل نماذج كويسة و اكيد كمان لو هو قعد يحكيلنا عن الصفات اللي بتضايقوا في بعض الاشخاص من بلده اكيد هيقول حاجات تشبه دي ما احنا عرب كلنا و باهتين على بعض..نطلب منه يعملنا اجزاء هو كمان..
متعتذرش على التطويل ده هدف التعليق
منور المية جدا
زحل الفلكي
الصفة دي انثوية جدا بس والله في ولاد كدة..بتحس ان فيهم حاجة غريبة لان ممكن الحديث ياخد منحنى انثوي شوية فبتحس انه بدل ما انت بتكلم شاب كأنك بتكلم جارتكم مثلا!!
الفضول قتل القط و فطس البنت
ههههههه مش هقدر اقولك ان مفيش نسبة فضول في اي بنت
طبعا الاستنطاع لازم الواحد يقاومه لانه اكتر صفة بتتلاحظ
انا مش محتاجة اتخن صوتي و انا بكلمها لانها بتصطنع الدلال اوي فببان قدامها بشخصيتي العادية والحمدلله..يعني كأني اخوها مثلا!!
بس هفتكر نصيحتك المرة الجاية بس مش هقول "ياعنيا"
:-)
مبسوطة ان البوست عجبك
منورني دائما بدري او متأخر
تحياتي
احمد الدرعة
اكيد في ناس بتعمل كدة و دي الفئة اللي بتحترم نفسها و مبتكولش حاجة حرام..انا بتكلم عن الفئة اللي مستهبلة فيها و احيانا بحس ان ربنا هيحاسبني اني شفتهم عملوا كدة و مبلغتش..
عروض التذوق دي بقى نكتة و الفئة دي بتبان ساعتها قوي
و طبعا انا بأكد على ان دي عينات من المجتمع و كل مجتمع فيه عينات منها لانها صفات بشرية..و في ناس زي الفل ماشاء الله
نورت ميتي
عصفور المدينة
هو انا شكلي اخرت البوست المرة دي بس اغفروهالي..
مش هنسى الفشار...متكةنش انت كاتب حاجة عنه بس...منور المدونة المتواضعة
sendbad
اسعدني تعليقك جدا و ياريت اكون قد الشرف ده و اشكرك كثيرا
تحياتي
a.samir
اكيد كلنا قابلنا النماذج دي عشان كدة كل واحد حاسس ان في حاجة منها حصلت في حياته..و شكلك شفت الناس بتوع هايبر ماركت كمان....
يا سيدي الله يبارك فيك و الله لو اعرف هي اتعملت ازاي كنت اقول على طول..و ربنا يخليك المدونة مدونتك مادام انا عندي شعر!!:-)
سعيدة ان البوست عجبك
نورت شوية المية اللي عندي
ههههههههههههههههههههههههههههههههههههههههههههههههههههههههههههههه
معلش انا اتأخرت عليكى بس عشان الامتحانات بالنسبه للفضول فانا عمال افتكر المناطق العشوائيه واللى بيحصل فيها وانتوا عارفين ان فى بعض المناطق البلكونات بتبقى جوه بعضها ومتلاقيش حد سايب التانى فى حاله
كان فى جملة للامام ابن القيم بتقول اذا انشغلت بما لا يعنيك فاتك ما يعنيك
اما بالنسبه للاستنطاع فانا بشكرك جدا على انك وضحتيلى معناها انا مكنتش اعرف يعنى ايه استنطاع
ومبرووك على نزولك فى المصرى اليوم بس مش بعرف ازغرد
ما اروعها تلك السلسله
تحتاج الي قراءه متأنيه والاستفاده منها
جزاكي الله خيرا
الصديق العزيز حزين
انا مقدرة ظروفك و المدونة مدونتك اهلا بيك في اي وقت و ربنا معاك في الامتحانات...المناطق الشعبية بتبقى عاملة زي بيت العيلة كدة كل الناس عارفة غيرها بيعمل ايه...
اديك عرفت الاستنطاع ابقى خد بالك من الناس دي في الشارع..
الله يبارك فيك بس انت كمان مبتعرفش تزغرد...شكلي لازم اتعلم ازغرد بجد!!
:-)
منور المية دائما
الاخ الفاضل محمد مفيد
سعيدة جدا ان الاجزاء عجبتك و يارب فعلا اكون افدت اي شخص قراها
زيارتك شرف للمدونة
تحياتي
الفضول
اللي بنسميه
الحشرية
هو السبب
اوروفوار
طهقانة
منورة المدونة في اول زيارة ليكي و يارب دائما...
ممكن يكون الفضول فعلا هو اساس الصفات دي كلها..
شرفتي المية
السلام عليكم و رحمة الله و بركاتة
يا عيني عليكي يا نقطة مية
بجد سلسلة شديدة
انت بتتناولي بالتحليل صفات بذاتها
نمسكهم بقي واحدة واحدة كما هو المعتاد
:)
الفضول
هو طبعا الامر الاول راجع ان مفهوم الخصوصية اساسا ضايع عند اغلب الناس و لو الواحد حب يعمله صعب جدا علي ناس مش متعودة علي كدا ...فمن الاول علشان الواحد يريح دماغة بيبتعد ان نوعية الناس اللي مش عندهم ذوقيات في انه يتكلم ادامهم اساسا ...[س طبعا بما انه من تكوين الشعب فصعب تتفاداه كليا
مرة حصلت معايا في المترو و كنت بقرأ في كتاب للطب البديل و اتبعتت مسج و كنت بكتب الرد لاقيت اللي ادامي بتطلب الكتاب مني !!!
و بعد ما خلصت انا مديت لها ايدي اني عايزة الكتاب ... ولكن نظراتها لم تهدئ و لما عرفت تمنة حسيت انها عايزة تاكلني و الكتاب !!!!
بجد انا اتنزفزت و انا بقرأ :)
الاستنتطاع
دي بقي صفة مكملة لصفة الفهلوة ...يعني لو عايز واحد يبقي فهلوي الازم يجيب القرش مع غير ما يتعب ... و دا اللي انت قولتيه في امثلة الكناسين بس دول طبعا انا بتجاهلهم تماما و طبعا انت نسيتي تقولي المنادي بتاع العربيات البلطجي بمعني اصح اللي مبيكونش عمل اي حاجة و لكن لان المنطقة دي تبعة فبياخد العربيات اللي راكنة مقاولة _ طبعا انا كويس اني معنديش عربية و الا كانت مجازر اقيمت بسبب الموضوع دات و انا اللي هبقي خاسرة :))
اما بق العيال الصغيرة التنحة ... دا مسلسل شبة دائم لما بروح عند فرغلي بتاع العصير بلاقيهم بيشدوا هدومي انهم عايزين بق! طبعا مش بيصعبوا عليا زي البنات العبط و بشخط فيهم فبيختفوا من امامي
اما بقي البنتوتة الزائفة ...
دي بقي اكتر مخلوق في الدنيا بيجنني
انت نسيتي اساسا انها بتحب تلبس لبس عجيب جدا لا يتناسب مع جسمها ( مرة كانت واحدة ماشية لابسة بدي احمر عليه جاكت برتقالي و الاتنين فاقعين )
بس عارفة .. طريقىة كلام البنات دي بتبقي واضحة اوي ...و هما تلاقيهم بيحبوا يعيشواف يا لدور ادام الولاد علشان يظبتوا ...ميعرفون ان نوعية الولاد اللي بتقع بالطريقة دي نوعية معوقة هي كمان ...و تملي بقول ...ربنا يهني سعيد بسعيدة :)))
مستنية الجزء الرابع ...و تحياتي للبوستات الشديدة و الف مبروك وجودك في المصري اليوم
دمتي بكل الخير
Alive the people of Palestine, against the fascism of Israel and the terrorism of the North America
Peace for Palestine
العزيزة شمس الدين
تعليقك ليه مكانة كبيرة جدا...
فعلا مفهوم الخصوصية ضايع او الناس بتتجاهله لما تبقى عايزة تعرف حاجة تخص غيرها و لما تيجي تسأليهم عن حاجة تخصهم يكدبوا...تناقض غريب
كويس ان حصلت معاكي على كتاب انا حصلت معايا على قرآن!!..نصيحة لو مثلا هتقري جرنال بلاش تفتحي صفحة الرياضة خالص....
اكيد الاستنطاع مكمل للفهلوة بس في الفهلوة الواحد بياخد حق حد من غير ما يحس اما في الاستنطاع بياخد حق حد عنوة..البلطجة جاية في الجزء الرابع متقلقيش
:-)
و لبس البنوتة كمان في الجزء الرابع
:-)
و انا بقى بقول على الولاد اللي بتقع في الدلال الزائف مثل سوري بيقول"كل قمحة مسوسة ليها كيال اعور"!!
اكيد مبسوطة ان البوستات عجبتك و الله يبارك فيكي
:-)
نورتي شوية المية اللي على ما قسم يعني
david santos
i realy admire your situation from palestinian case
peace for palestine
Amen
thanks
الله يجازيكي يا نقطة
ربنا يستر ومتكونش المدونة دي بيدخلها اجانب لحسن دا احنا كدة ضعنااااااااا:)
منتظرين الجزء الرابع
وياريت بقي لو سلسلة متوازية لظواهر ايجابية اكيد فيه عندك يا نقطة علشان منغمقهاش اوي كده يا ست نقطة:)
جميل أوي البوست ده ..أحسن حاجة انك عارفة توصفي كل صفة بالأمثلة و هي موجودة كتير في مجتمعنا للأسف
الفضول...ده في منه كتير اوي عند المصريين فعلا ..
الاستنطاع ...ده يساوي السنكحة ...أي أبو بلاش كتر منه زي ما قلتى و للأسف الناس اللى بالشكل ده بيكونوا فاكرين نفسهم أنصح من كل الناس و أذكي منهم لأنهم عرفوا ياخدوا حاجة من غير ما يدفعوا فيها فلوس و ميعرفوش ان ما أخذ بسيف الحياء فهو باطل...
أما بقى البنت المتصنعة ...للأسف موجودين بردو كتير أوي و للأسف ساعات بنتغش فيهم ...انتى عارفة ان ممكن واحدة مش حلوة خالص من كتر ما بتعمل الحاجات دي الناس تاخد عنها فكرة انها حلوة و جميلة الجميلات ....
على العموم مدونة جميلة و انا سعيدة انى جيت عندك
و مستنيين الجزء الرابع و السلسلة بتاعت الصفات الكويسة بقى علشان احنا بردو مش وحشين أوي..
تحياتي
هممممممممممم
تحليل جميل جدااا
بجد تعرفى انى بعشق وبدرس علم النفس
وكلامك صح جدااا
صحيح مالة صاحب البوابة؟؟
جزء ثالث جميل انا فى انتظار الجزء الرابع فعلا على راى دكتور كان بيدرسلنا فى الجامعة بيقول احنا شعب محتاجين مصحة نفسية كبيرة نتعالج فيها كلنا مع انى مش معاه فى نظرتة التشائومية بلس بجد يمكن يمون عندة حق
اولا انا عايز اقولك يا نقطة ميه .. ان طول مانا بقرا البوست عمال اضحك .. بجد ما شاء الله اسلوبك فى البوست ده دمه خفيف جدا ..
و بالنسبة بقى للموضوع نفسه .. فاكتر صفة من الصفات دى ثقلا على قلبي .. هى الشخصية الفضولية ... دى موجودة بكثرة ..
احييكى على هذه السلسلة التشريدية .. و مستني الجزء الرابع ..
تحياتي
هههههههههههههههههه
يا سلام .. طب بس بالراحة لحسن أطلع حد من اللي جت سيرتهم هنا او في الأجزاء الماضية .
ما هو صحيح انا على رأي أحمد حلمي مش من مصر .. ولا من منيا القمح كمان بس من المنصورة . ودي لحسن حظي مصر .. شفتوا بقى ..
جميل يا نقطة .. ومن أول السطر .
دا بيسموه الاستظراف ( ورد ذكره ولا لسة !)
هههههههههه
no Comment
تحياتي
مصراوي اوي
مش عارفة ليه خايفين ان الاجانب يقروا الكلام ده صدقني هم عارفينه و ملاحظينه..جه دورنا اننا نلاحظه و بعدين كل المجتمعات بتفرز انواع مختلفة من الشخصيات لان لسه مجتمع يوتوبيا مش موجود..اقتراحك عن الصفات الكويسة قيد البحث...
منور دائما
الحلم العربي
اولا انا سعيدة جدا انك نورتيني و سعيدة ان الموضوع عجبك و اكيد سلسلة الصفات الكويسة قيد البحث و احنا فعلا مش وحشين اوي كدة احنا فينا نماذج تشرف و اللي مش مصدقني يدخل مدونتك و يعرف...
الفضول بقى فعلا موجود فينا كلنا بس بنسب متفاوتة..الاستنطاع انا بعتبره كسب غيرمشروع..اما الهانم الزائفة..انا بزعل اوي لما اشوف بنت بتهين نفسها و متفقة معاكي ان فيه منهم مش حلويين بس الناس خدت عليهم كدة و بتبصلهم على انهم جميلات و دي صورة مشوهة
شرفتيني بالزيارة جدا و سبحان الله كنت هزورك امبارح فعلا لما عرفت الحملة بتاعتك من مدونة الاخ مصراوي اوي بس انتي سباقة بالخير
تحياتي
elgazaly
انا مبسوطة ان البوست عجبك و انا كمان بحب علم النفس و السلوك الانساني لو تعرف كتب كويسة ياريت تقولي عليها...
عن صاحب البوابة..
هو و الحمدلله سليم و بصحة جيدة و لكن زي ما قال في مدونته ظروف قهرية المت بالاسرة و مش مصرحلي اني اقول اكتر من كدة بس ادعو له ربنا يفك كربه و يثبته و اسرته لان دعائكم ليه بيديله دافع معنوي جيد ..الف شكر على سؤالك و اكيد هيوصله بس متنساهوش من دعائك
جزاك الله كل خير
شرفتني جدا
الجميلة ايوية
و الله انا مبسوطة ان البوست عجبك..و انا مع الدكتور بتاع الجامعة كل واحد محتاج دكتور نفسي في جزء منه اكيد...
منورة المية
تلفيزيون ملون
الحمدلله اني قدرت اطلع اي حد من زحمة الدنيا و ضغوطها و خليته يضحك و يفكر و اشادتك بالبوست اسعدتني جدا...و جميل مسمى السلسلة التشريدية
نورتني فعلا
محمد العدوي
اول تشريف ليك في مدونتي المتواضعة و ان شاء الله دائما
كلنا فينا حتة من الصفات دي و مش هسألك لقيت الصفة ولا لسة بس لاقيت انك قايل في مدونتك"لو استطعنا حقيقة ان نصف انفسنا فما حاجتنا لسوانا"
و يا سيدي تابعني من اول السطر الجاي جملة في الجون و هبقى افتكرهالك لما اكتب عن الاستظراف
:-p
تسعدني اشادتك بالبوست و تابعني للجزء الرابع
شرفت المية
alshared
يا سيدي ربنا يسعدك كمان و كمان
شرفتني
مالهم المصريين يا عين خالتك مش احسن منكو يالي الوحدة تبقي خارجة من بيتها وحطة مكياج عملة زي العفريت شبة الجن هتتمسخروا علينا يا حيلة ابوك وامك انت كمان
Post a Comment