بيقولوا النوم سلطان....بس مفيش سلطان بيجي لواحد في الشارع الساعة اربعة العصر يوم الخميس قدام سيتي ستارز!!!؟؟اي والله...انا شفت المنظر ده و السيناريوهات اشتغلت في دماغي...الراجل ده باين من هدومه انه عنده بيت و شغل مش متشرد يقوم يقلع الجزمةو يحط ازازة مية جنبه"عشان لو جاله كابوس ولا صحي عطشان" و ينام كدة في الشارع قدام مخاليق ربنا المصريين و الاخوة العرب و السياح الاجانب!!؟؟ مفتكرش ان فيه حاجة ولا مشاكل في بيته مثلا عشان بصراحة كدة جاب منين هدوء الأعصاب و الروقان في وسط شارع السيارات ريحة جاية فيه و ناس ماشية بتعدي عليه و قطط بتشمشم فيه و زيطة في الشارع يوم خميس بقى...لأ مكنش مغمى عليه و لا حد قتله...يا جماعة الراجل ده كان نايم و بيتقلب كأنه نايم في سريره!!؟؟...طيب ده مش خايف يتسرق ولا كلب ضال يعضه؟!..مهما كان تعبان اوي مينمش في الشارع..الحلو كمان انه عساكر المرور اللي كانوا واقفين يكلبشوا السيارات المخالفة محدش فيهم عمل حاجة...و الله حاجة حلوة قوي
42 comments:
شرفتيني في فكرتي قلت اجي ازورك في ميتك عجبتني مدونتك حالة خاصة والبوست بتاعك يديك احساس اننا خلاص تعبنا وبقينا مش قادرين نتحكم في تصرفاتنا المعادلة اختلت وكل واحد ماشي بمزاجه ربنا يرحمنا
احييكي
انا صاحب اول تعليق ليا هدية عندك
يبدو لي أنه نايم من الهم فهو يخشي انه يرجع للبيت وفي انتظاره قائمه من المطالب الضروريه التي يعجز مرتبه, الذي لا يتناسب مع الارتفاع الجنوني للسلع, ان يستوعب هذه المطالب
شكلك بتمشى بكاميرا
على العموم البوست رائع
انتى بتفكرى كويس بس كان ممكن تلعبى على المشاكل المنزليه كان هيبقى متوقع اكثر.هحاول اقرا البلوج كله واعلق تانى
البلوج فيه حاجات كويسه
رأيك مش متشابه مع حد
وده شئ جيد فى البدايه اتمنى دايما انك تهتمى برأيك وبس تعرضيه
وربنا يوفقك
sendbad
شرفتني بزيارة المية بتاعتي و هديتي انك خدت شوية طراوة في الحر ده...عجبتني نقطة اننا مش قادرين نتحكم في تصرفاتنا..احنا فعلا كدة بس ليه..ياريت تيجي بس على حد النوم في الشارع...شكرا
MASRY
يا راجل الهم بيطير النوم من العين زي كلاكسات السيارات اللي حواليه..بس عارف ممكن يكون من النوع اللي بيهرب من مشاكله بالنوم..عندك وجهة نظر...شكرا على الزيارة الكريمة
بياترتس
اشكرك جدا على الاهتمام بالمدونة ككل مش البوست ده بس مما يضع ملاحظاتك نصب العين..انا بمشي بكاميرا اعترف و الموبايلات مخلتش كمان...الراجل ده جنني انا كل المشاكل اللي في الدنيا حاولت احطها عذر مش بس المشاكل المنزلية..اللي هو فيه ده غير متوقع فازاي التمس له عذر متوقع!!؟؟
اسعدتيني بالزيارة و الاهتمام
حلوة فكرتك...و رايقة ميتك يا صديقتى..بس اهمها الاحساس
هاي
مدونة جميلة وشكرا قوي علي تعليقك
و عايز اقولك ان فيه ملايين المصريين بينامو في الشارع حتي وهما في بوتهم
انتى جبتى عنوان البلوج ده منيين
دا انتى عبقريه يابنتى
وبالنسبه للراجل
فانا بقولك النوم فى الشارع ده مزززاااااج
ماتسيبوا الناس فى حالها بقه
ولا اقولك روحى ابتزيه بالصوره
الجميل بقه قزازه الميه دى كانت ليييييييييه؟
الفيلسوف
شكرا جدا و اسعدتني بالزيارة
خواطر شاب غاضب
انا معاك ان ناس كتير بتنام في الشارع بس محدش عارف يقولي ليه؟؟ربنا رزقنا ببيوت ننام في الشارع ليه؟؟نرفس النعمة!!؟؟
شكرا على الزيارة الجميلة
كرانيش
يسعدني جدا ان البلوج عجبك و انتي نورتي المية كلها..مفتكرش هانجح في اني ابتزه بالصورة اصلي هاوريها لمين ما كل الناس كانت شايفاه و هو نايم!!؟؟
شكرا على الزيارة جدا
مممممممممممممممم ، بحقد عليكي (شوية) لأنـك على الأقل ااالـص قدرتي تصوريه ، أنا فيه حاجات كثيير بتستفزني أصورها كده !
.
.
بي منين يا حسـرة !!!
ــــــــــــ
بالمناسبـة مدونتـك لظيظة ، وعجبتني فكـرة نقطة مية جدًا
وأول مـرة أعدي ، بس أكيد مش آخـر
تحيااااااااااتي
*****
ابراهيم ...معايا
سعيدة ان نقطة مية حازت اعجابك و انت شرفتها بالزيارة و هانتظر الزيارة التانية..اما موضوع الكاميرا ده فا انا قررت تبقى معايا من موقف استفزني لدرجة البكاء في الشارع..انوي انت بس و ربك بيرزق..:-)
يا سلام لما الواحد ينام في الشارع ههههههههههههههه
هو فعلا شكلة خايف يرجع للبيت
وشكلنا كلنا هنسطح جنبه
فيه ناس كثير بتنام في الشارع ولو بتنزلي الفجر زي عصفور المدينة تشوفي أشكال وأنواع من دول
وإلا تلاقي جنب واحد منهم مخلفات بيتزا هت أو كنتاكي وأعقاب السجاير
وبعدين هوكان حافي ولا لابس جزمة؟
اولا عنوان المدونة جامد
وكمان شكل البانر تحفة
احييكي على ذوقك وشكراً انك شرفتيني في زحل الفلكي بتاعتي
ندخل في مضمون البوست
حاجات كتير دلوقتي بقا الواحد بيعملها من غير ميعمل حساب للناس
يمكن الراجل اللي نايم ده بنستنكر اللي عمله مع انه عمل اللي هو عايزه من غير ميعمل حساب للناس
بس لو بصينا على حاجات كتير بنعملها
حنلاقيها تستدعي الاستنكار
لكن بما اننا اتعودنا نعملها
ومبقيناش نعمل حساب للناس
فالناس اتعودت عليها
اديكي شوية امثله
اللي بيشرب سجائر مهو مش بيعمل حساب للناس والمفروض عمله ده خطأ
اللي بيشرب مخدرات وخمور و و الخ ده غلط وبرضه مش بيعمل حساب للناس
اللي بيمشي يغني بأعلى صوته في الشارع او يشغل كاسيت العربية بصوت جهوري مهو برضه غلط ومش بيعمل حساب للناس
دي شوية امثلة غلط
لكن فيه برضه امثله صح
اللي بيصلي في مكان فيه لهو وانشغال وبيكون شكله غريب لكنه بيعمل صح وميعملش حساب للناس
اللي بيسيب اصحابه في خروجه حلوة علشان ميتأخرش على بيته علشان اهله محتاجينه يعملهم مشاوير او يقضي حاجه اهو بيعمل صح وبرضه مش بيعمل حساب لإستنكار الناس
يمكن ردي طويل حبتين لكن فعلا البوست خلاني افكر
اوي
شكراً بجد على البوست ده
عمرو غريب
شكلك جربت النوم في الشارع او نفسك تنام في الشارع ياريت تقولي اسبابك في الحالتين افادكم الله
شكرا للزيارة
الوردة السوداء
ممكن يكون خايف يرجع البيت فعلا..طب احنا هنتسطح جنبه ليه؟؟ايه اسبابنا؟؟
ربنا يلطف بعباده
نورتيني بالزيارة
عصفور المدينة
انا معاك ان الشارع مبقاش مقتصر على المتشردين بس انا مش لاقية اسباب مقنعة تجبر اللي عنده بيت انه ينام في الشارع!!؟؟
هو على فكرة كان قالع الجزمة و الشراب و حطهم جنبه قبل ما ينام كان ناويها يعني
اشكرك على الزيارة
زحل الفلكي
اسعدتني بالزيارة فعلا لانك الوحيد اللي حاولت تديني سبب مقنع و معاك حق فعلا ان الناس مبقتش تعمل حساب لبعضها في التصرفات..و ده يخليني اسأل ليه؟؟و هو الصح اننا منراعيش حد كدة في التصرفات بغض النظر عن كون التصرف ده صح او غلط؟؟ طب فين الادراك الانساني من ده بمعنى ليه كل واحد ميقيمش تصرفاته قبل ما يعملها..و اذا كان تقييمه غير صحيح مين ممكن يوريه الصح؟؟ممكن كمان تقول ان التصرفات الغلط زي اللي في البوست دي تندرج تحت بند اللا مبالاة و المشكلة اننا اتعودنا فعلا على بعض التصرفات دي تحت نفس البند...
سعيدة ان المدونة عجبتك..واسعدني تعليقك فعلا لانه حسسني ان فكرة البوست وصلت..و مستنية الزيارة التانية
شكرا
مسكين اكيد ليه اسبابه
تحياتي
اممممممم
انا عندي فرضية يمكن مجتش في بالك قلت اساعد ... مش يمكن دا بيشتغل في مدينة نصر وبيته بعييد وكان عنده استراحة مثلا وقال ينام ...ولا يمكن واحد فاقد الذاكرة في احتمالات متجيش في البال صحيح
sampateek
اكيد اللي يعمل كدة يبقى مسكين معاكي حق
شكرا للزيارة
batresya
ممكن فعلا بيشتغل في مدينة نصر بعيد عن البيت ممكن يكون مندوب مثلا..اما فقدان الذاكرة مفتكرش هيجبله نوم ..اكيد هيبقى عايز يعرف هو مين..شكرا على الاحتمالات و شكرا اكتر على الزيارة
احب دائماً الأشخاص الذين يسجلون كل ما يثير انتباههم بالكاميرا
لأن توثيق اللحظان هام للغاية
أما عن الرجل
فمصر أصبح فيها الكثير والكثير منه
والفضل لنظام الحكم الفاسد
لكن أكثر ما اضحكني صراحة
هو قولك
طيب ده مش خايف يتسرق ولا كلب ضال يعضه؟!
يا آنستي الغالية
انه نائم في الشارع
الفكرة وحدها تحتاج الى قلب جبار لا يخاف
لا من الكلاب ولا من السرقة
تحياتي لكِ عزيزتي
صاحب البوابة
اخي الغالي
الصورة بألف كلمة و بصراحة كدة الراجل ده كان يستاهل يتصور..انا كنت بس بسرد مخاوف الانسان الطبيعي من مخاطر الشارع الدارجة زي السرقة او عضة كلب عشان تفكير اللي يشوف الصورة يتسع خارج نطاق المعقوليات و اضفت حتى احتمال الاغماء او القتل كأقصى حد..و معاك حق الفكرة لوحدها محتاجة قلب جبار و اضيف عليك او مخ طاقق..و على فكرة القلوب الجبارة دي كبيرها النوم في الشارع فمتستغربش ان النظام الحاكم على حاله و الدول بتبيع و تشتري فينا..للاسف سلوك المصريين يعاني من لا مبالاة و همجية شديدة..اكيد مش محتاج تسمع مني انك شرفتني بالزيارة لانك متأكد انك فعلا كدة
:-)
يا ستى انتى ظلمتى الراجل ...لو دققتى شوية حاتلاقى عربية خبطته و جريت ..و بدل ما تندهوله الاسعاف ..قاعدين تدونوا على جتته ؟ده اسمه كلام برضه؟بطلوا بوليتاريا بقى؟؟
الفيلسوف
لا و الله انا اتأكدت انه مش مقتول او ميت او خبطاه عربية ده كان فلة و بيتقلب يمين و شمال و حاجة جميلة خالص
:-)
العزيزة نقطة مية
مررت لكِ تاج
إذهبي لتستلميه من مدونتي
:)
تحياتي
سعيد جداً بالتفاعل في هذا الموضوع
وبالنسبة لسؤالك
ليه منقيمش تصرفاتنا قبل منعملها
هو ده الصح والمفروض انه يتعمل ان محدش يعمل حاجه من غير ميكون مقتنع بيها
ولكن فيه ناس بتقنع نفسها ان اللي نفسها عايزاه يبقا ده اللي هم مقتنعين بيه
يعني واحد عايز يمشي حافي في الشارع
واخده بالك
عايز
يعني رغبته في كده
يبدأ يعتقد في نفسه انه مقتنع باللي حيعمله
زيه زي اللي بيعلي كاسيت العربية عايز يعليه ولكن لو فكر في اللي بيعمله
مش حيعمل كده علشان هو بييجي عليه ايام مش بيستحمل الصوت العالي ده
اديلك مثال كمان
واحد اعرفه
والده توفاه الله
امر الناس وهم بيركبوا الصوان انهم يوجهوا السماعات لداخل الصوان وانهم يوطوا صوتها
اهو فكر في التأثير قبل ميتم وفعلا كان الصوان هادئ والصوت مش مزعج ومحدش تأذي
التفكير في الحاجه قبل مالواحد يعملها واجب والمفروض يبقا كده
ولكن هنا نيجي للسؤال التاني حيعرف ازاي ان تقديره صح واللا غلط
الموضوع ده نسبي
يعني ممكن ب3 طرق
الطريقة الاولى انه يحط نفسه مكان المتضرر من اللي حيعمله
يعني اللي بيعلي صوت الكاسيت لو حط نفسه مكان واحد كبير عيان حيعرف ويدرك ان اللي بيعمله غلط
والطريقة التانيه انه يبص لنظرة المجتمع ليه فحيعرف ان اللي بيعمله ده ميصحش ولكن موصلش لحد الخطأ
الطريقة الثالثة وهي الاساس انه يرجع للدين حيلاقي تصرفة ده ليه حكم او يعرف ده صح واللا غلط وساعتها هنا حيبقا عارف بالظبط ان كان تقديره صح واللا غلط
سعيد بالنقاش جداً ومنتظر نقاشك مع وجهة نظري
أنا مررتلك تاج
:)
شادي فايد
الف شكر على التاج صاحب البوابة زي ما دبسك فيه دبسني برضه و الله هاجوبه
:-)
شكرا للزيارة
زحل الفلكي
ان اللي سعيدة جدا بالنقاش و ان الموضوع فيه حد بيفكر فيه بجد لان الموضوع مش مجرد واحد نايم في الشارع الموضوع علاج سلوك متفشي بيننا بنسبة كبيرة..كل واحد بقى حاسس انه عايش لوحده او بيتعمد الاحساس ده لما يكون عايز زي ما قولت يعمل حاجة كنوع من راحة الضمير و قفل باب النقاش مع النفس في شرعية اللي هيعمله ده و ساعتها لا هيحط نفسه مكان حد و لا هيهتم بنظرة المجتمع ليه..اما نقطة الدين فأغلب الناس للاسف بتستخدم الدين في تسيير امورها نتيجة لضعف الاساس الديني في النشأة..الانسان المصري احترف التحايل حتى على نفسه..
اشكرك جدا و بصدق على النقاش و الاهتمام و احييك على طريقة التفكير و دائما سأنتظر زيارتك
تعرف انا بحسد الراجل ده والله..باله مستريح
متغيرة شوية
ما هو ده اللي بقوله الراجل ده رايق جدا
نورتيني بالزيارة
طيب انا عايز اعرف مين الي صورة ؟؟
انتي؟؟
طب لو صحي فجاءة دة وشافك بتصورية
وهو ممكن يكون خلل اصلا كنتي هتبقي
فين دلوقتي
:)
بصي الناس بعتبرهم انا خزائن مقفولة
وكل خزنة فيها الي فيها وكل خزنة كمان لها مفتاح وحجات تاني كتير
كراكيب عادل
تعليقك اضحكني جدا
و الله انا اللي صورته و بعدين كنت عاملة
حساب لو صحي فصورته من الناحية التانية من الشارع من ورا باب العربية كمان عشان اجري على طول بس مقدرتش اقاوم مصوروش
الناس ربنا يلطف بيها
نورت المدونة
دايما بشوف المنظر ده لكن بيكونوا عمال تراحيل ارهقهم انتظار فرصة للعمل فى اي شغلانة تحت الشمس الحارقة فيلجأوا للنوم داخل الجنينة تحت اى شجرة اللى بتكون على الرصيف لاستعادة النشاط
اما راجل ده ممكن يكون سواق تاكسي ومستنى زميله عشان ياخد منه التاكسي ويبدأ هو دوريته الليلية مثلا فحب يريح فى الجونينة شوية :)
شاب مصري
الراجل باين من هدومه انه ابن ناس و مكنش فيه تاكسي ولا حاجة و تقريبا كان جوة المول كمان!!؟؟
Post a Comment