Wednesday, May 30, 2007

المصرييييييييييييييييييييييييين


المشرف على الرحلة.......

المشرف على الرحلة يعد الطلبة و ينظم الرحلة و يوجه و يشرف بقى.......كتير من الاشخاص في مجتمعنا واخدين الدور ده من غير ماحد يطلب منهم..احكي لكم موقف....كنت في شركة طيران و للي ميعرفش ...انت بتاخد رقم من على الباب و تقعد تستنى دورك لما تشوف رقمك على شاشة قدام الموظف فتروح له تقضي مصلحتك...المهم...لقيت واحد واقف جنب البنش بتاع الموظف و ساند عليه و اي واحد يجي عليه الدور و يروح للموظف و يستفسر عن حاجة تلاقي اخينا المشرف بيشترك في الحوار و يوجه الراجل و يسبغ عليه من خبرته..والعجيب ان الموظف لا يعترض المهم انه طالب الحاجة ده يمشي و يجي اللي بعده......او انه خد على كدة و انه لو اعترض المشرف هيتخانق و يقول"يعني الحق عليا اني حبيت اساعد؟".....موقف تاني....في هارديز مرة شفت واحد نفس العينة دي وواقف نفس الوقفة..وانا بطلب لقيت اللي اتدخل في الحوار بيني و بين الموظف و بيقولي "لأ الساندوتش ده مش حلو"و راح مكلم الموظف و قال له هات لها كذه و طلب هو..طبعا اتحرق دمي و قلت له"بكل ادب و الله" اني عارفة هطلب ايه و اللي يعجبه مش ضروري يعجب غيره فألح و قعد يدافع عن الساندوتش اللي طلبه فدماغي دخنت و قلت له اطلبه لنفسك و ملكش دعوة بيا و اخينا ده زعل و قال طبعا"انا الحق عليا"و طلعت انا الشريرة اللي بترفض التوجيه و النصح !



طولة اللسان........

مش عارفة ليه حاجة كويسة او حاجة وحشة تحصل نشتم.. و الفاظ غريبة.. و أغلبها يخدش الحياء..و المصيبة ان محدش بيهمه الناس اللي حواليه مش هقولك فيه بنات ممكن تسمع بس لان في رأيي محدش لازم يسمع الكلام ده....تبقى راكب تاكسي وواحد قرص على التاكسي بعربيته و سواق التاكسي يسمعك من المنقي خيار و هو بيشتم السواق اللي عمل عملته"يا ابن ...وأم..ويلعن..ويحرق..و يخرب..الخ"لما تحس انك نفسك تخلع ودانك و ترميها من شباك التاكسي!! اديك مثال تاني....واحد الدنيا ضاقت في وشه او بيقضي مصلحة و اتعطلت من البيروقراطية المعهودة فيقول "اصل دي بلد...!؟"و هاتي يا شتيمة..مثال تالت...واحد بيذاكر مثلا و جاب درجة حلوة او واحد ربنا رزقه بحاجة تلاقي اللي يقول "اصل ده ابن.....محظوظ او دحاح"اي حاجة تتقال بس الشتيمة الاول و انت و حظك يا تسمع شتيمة مبلوعة زي انواع الحيوانات مثلا او شتيمة من العيار الثقيل تجيبلك صمم مفاجىء....ايه القباحة دي!!؟؟


السئيل....

وده بقى اللي يتحط على الجرح يجيب غرغرينة!!؟...بني آدم غتيت و دمه يلطش...وبارد لدرجة انك لو بصيت على "لامؤاخذة"قفاه هتلاقي كلمة"اديال"او"كريازي".. دول اكترهم موظفين الحكومة..بتبقى جايب ورقك و مرتبه و هتحطه قدام الامر الواقع عشان يخلصه فيبوصلك ببروده و ابتسامته الهبلة و يطلعلك القطط الفاطسة في الورق...احكي لكم حاجة حصلت لاختي ..راحت تختم استمارة الرقم القومي من كليتها لاقت الست الموظفة قاعدة"ودي حاجة نادرة" فقالت لها"عايزة اختم الاستمارة" فالموظفة بتلامة قالت"استني نص ساعة لحد ما رجلية تنشف اصلي غاسلاهم و مش هقدر اقوم لحد مكتبي"!؟..و مرة موظفة في الشهر العقاري مكنتش عايزة تسجل العقد اللي راحت ماما تعمله عشان صورة توت عنخ آمون اللي على الرقم القومي مش كاملة!؟ آل في حتة من قمة راسه مش واضحة!!!!؟ تقولش زاهي حواس!؟....نوع تاني من السئالة اللي هو الاخ اللي بيمشي بعربيته على الخط الابيض في الشارع ببطء وانت لا عارف تروح الحارة اليمين ولا الشمال و تنور و تزمر لكن كما قال سعد زغلول"مفيش فايدة"!؟..او تلاقي الواحد منهم يجي يقولك نكتة قديمة و بايخة و طويلة و يمسك فيك تسمعها و لازم تبتسم..هو الحقيقة مبتبقاش ابتسامة انما هو بقك اتعوج نتيجة لالتهاب العصب السابع!!؟..واحدة من العينة دي مسكتني و قالت"هقولك نكتة"..و ساعيتها اتمنيت تجيلي سكتة قلبية عشان اكيد ربنا رحيم على عباده بس للاسف مجتليش فاعتبرتها تخليص ذنوب!!...المهم قالت ...ولا بلاش لحد يجراله حاجة فيكم وآخد ذنبه و تتحكي لي نكتة تانية!؟


اكمل لكم في الجزء الثالث ان شاء الله

49 comments:

.:.-=- ELGaZaLy-=-.:. said...

انا اول مرة اقرى الاجزاء دى

عجبتنى اوى بس مش هعلق غير لما اقراهم كلهم

عصفور المدينة said...

حلو مشرف الرحلة ده كنت باسميه رئيس الفصل
بس ابعدي عن التعيين لأشخاص أو فئات
يعني بلاش حكاية موظفي الحكومة عشان متاخديش ذنب فئة كاملة

Alaa said...

ممتازة الفكرة
متاااااااااابع

نقطة مية said...

elgazaly
يا سيدي اقرا براحتك و انا في انتظار تعليقك النهائي و سعيدة ان الموضوع عجبك

شرفتني بالزيارة

نقطة مية said...

عصفور المدينة

ينفع برضه رئيس الفصل و هتلاقيلهم مسميات كتير كمان..اما بالنسبة لموظفي الحكومة فهمة اكتر ناس الواحد بيتبهدل من وراهم و انا اكيد مش بعمم بس بذكر الحالات الفردية و اكيد فيه ناس بتراعي ربنا بس اللي يلاقيهم بقى

اكيد منورني و اتمنى دائما

نقطة مية said...

علاء

اسعدتني فعلا متابعتك و اتمنى دائما و استنى الجزء الثالث

تحياتي اخي

عصفور المدينة said...

نزلت الموضوع الحمضان بتاعي
ياريت تشوفيه وأشرت فيه إلى موضوعك

مشروع انسان said...

فعلا الشخصيات دى موجود منها كتير فى المجتمع خصوصا المشرف ده اللى بيدخل نفسه فى اللى ملوش فيه واللى يتحط على الجرح يجيب غرغرينه ده نعمل ايه بسللاسف الناس فاكرة ان دى شطارة وانهم من غير كده مش هايعرفوا يمشو فى المجتمع ويتعاملوا مع الناس بجد الناس بقت تخنق جدا والشعب ده مبقاش طيب زى زمان للاسف

alshared said...

تحيا مصر

أول مجتمع في التاريخ تظهر فيه النماذج دي يعني أحنا تطورنا يا جدعان تبعا لنظرية الاخ دارون فأحنا بقينا .........
ولا بلاش

رصد رائع لظواهر عديده يمر بها المجتمع المصري من خلال رؤيتك الشخصيه للشخصيات

أحيكي بشده ومنتظر القادم

تحياتي

تامر حسين said...

ههههههه
جامد موت الموضوع ده وعندك حق في كل الي بتقوليه
بس علي فكره السندوتش وحش هههههههه
تحياتي ليكي بشده

ياسر مدني ...دينامو الإخوان said...

علي العموم وفي كل الأحوال إحنا لازم يكون ليه موقف في كل قصة وفي كل موقف المهم نكون إيجابيين وأصحاب رساله حقيقيه وياريت منعديش الموضوع علي كدة
******
ولا ايه؟؟؟

تليفزيون ملون said...

بوست جميل جدا يا نقطة ميه .

اكتر جزء عجبني هو بتاع السئيل ....لان الواحد بيقابلهم كتير ..

تحياتي

مـحـمـد مـفـيـد said...

اسمحي لي لن اعلق علي البوست ولكني اعلق علي اللفته الرائعه بالدعوه لدعاء
اخي صاحب البوابه
اللهم يا حنان يا منان فرج هم اخي

Amr Mohy said...

مش هنسي موقف حصل ليا وانا لسه بقدم ورق التنسيق الداخلى لكلية اداب .. وقتها كنت مصدوم انى مدخلتش هندسة او اعلام وفشلت فى القبول بالكليات العسكرية .. ومكنش ليا امل الا فى قسم اعلام بكلية اداب عين شمس على اساس انه احسن الوحشين

يومها كنت رايح وكلى امل انى هقبل فى القسم علي اساس انى مستوفي الشروط كلها بل جايب فوق المطلوب .. وانا بقدم الورق لاقيت راجل _ معرفش اذ كان موظف ولا ايه _ معرفوش خد باله انى تايه مش عارف اروح لمين , قرب منى وقالى انت عايز ايه قولتله عايز اقدم قسم اعلام , لاقيته لبس النظارة وبص فى الورق وقالى لا انت مجموعك مش هيدخلك القسم لان القسم عليه اقبال كبير والمجاميع عليت .. طبعا اتصدمت اكتر ازاى الكلام ده وانا لسه سائل على الشروط .. المهم الراجل مشي وانا مستمر فى الصدمة قمت رايح سأل راجل تانى _ المرة دى موظف فى الجامعة _ قالى لا الكلام ده غلط وانت مستوفي الشروط

طبعا انا استريحت جدا بس غاظنى جدا الراجل اللى عمل نفسه فاهم كل حاجة وكان هيجبلي احباط فى مستقبلى

ياريت كل واحد يخليه فى حاله عشان شغل الفهلوة وابو العريف والاستاذ المشرف ده فى اوقات بيعمل مشاكل كتير

Anonymous said...

اسلوبك هاااااااااااايل

بالذات التهاب العصب السابع وايديال

الله يضحكك


بجد انتي لمستي نقط في مجتمعنا بتحصل فعلا

تحياااااااتي ليكي

dr-killer said...

هههههههههه
جمدة و معاكي حق فيهم
من يوم ما اجيت على مصر واحد من
المشرف على الرحلة.......
على رايك قالي لا ماتركبش تكسي انا اجيبلك ميكروباص
و الراجل شوية و هيشيلني مع الشنط و يحطيني بالميكرو تاعو
صراحة الاشكال هاي سلبية لابعد درجة
مو بس هيك لا وكمان

طولة اللسان........
انا اخوي الصغير بيقلي غريبة صارلك بمصر 4 سنين و مش عارف تشتم
اصلو التعليم هنا على مستوا عالي
ولو انو الاحترام برضو موجود وان كان مستتر

اما بالنسبة لالسئيل....
ده بقى اغلب خلق الله
من كتر الي شافو بحياتو بتلاقيه مش فاهم اي حاجة في اي حاجة
والله بيقطعو القلب و بيقطعولنا هدومنا

سندباد said...

ربنا يخفف عن صاحب صاحب البوابة
البوست المرادي اقوي الظاهر انك بتحبي تخلي التقيل ورا يالله انا متابع في ايه تاني

نقطة مية said...

امام الجيل
فعلا الشعب ده مبقاش طيب زي زمان...اللي يحير انك متلاقيش حد بيتصرف كدة لما يسافر برة..الناس بتستهتر ببعضها هنا
زيارتك تشرفني دائما

نقطة مية said...

alshared
كويس ان الاخ داروين مات و الا كان اتبسط منا جدا....
اسعدني متابعتك للبوست كثيرا
تحياتي

نقطة مية said...

تامر حسين
ايه الغيبة الطويلة دي يا فنان...
و تلاقيك انت بقى اللي كنت واقف في هارديز
"امسكوووووه"
:-)
سعيدة ان الموضوع عجبك و تابعني للجزء الثالث
نورتني

نقطة مية said...

ياسر مدني
اهلا بك في اول تشريف لك في مدونتي المتواضعة..
و طبعا انا من رأيك..انا بعرض النماذج دي لان ساعات اظهار سلبية التصرف بتزرع نقيضه في عيون الغير...

تحياتي اخي الفاضل

نقطة مية said...

تلفيزيون ملون

زيارتك دائما تشرفني و اشادتك بالبوست تسعدني....اما السئيل ده فا"حسبي الله و نعم الوكيل"!
نورتني كعادتك دائما

نقطة مية said...

الاخ الفاضل محمد مفيد
صدقني انها ليست لفتة رقيقة مني او مجاملة و لكنها واجبي اتجاه شخص في منزلة اخي بالمعنى الحرفي للاخوة و صديق غالي و عشرة عمر و ما يمسه من نفع او ضر يمسني ايضا..و احترم تضامنك معي في الدعاء له فالدعاء بالنسبة لي اهم من البوست..
اللهم يا قوي يا رحيم
فرج كربهم و ازل همهم و الهمهم الصبر
و ابدل حزنهم فرحا
و ثبت قلوبهم
سبحانك اللهم و لا تقال الا لك
ارهم عجائب قدرتك فيمن ظلمهم
فأنت تقدر و لا يقدر عليك
و صلي اللهم على الحبيب المصطفى محمد صلى الله عليه و سلم
اللهم آمين
اللهم آمين
اللهم آمين
اشكرك كثيرا اخي الفاضل و جزاك الله خيرا

نقطة مية said...

شاب مصري
و الله دمي اتحرق من حكايتك ...
النماذج دي دائما بتسبب مشاكل و احباطات و حرقة دم..ربنا يجيرنا منهم
انتظر الجزء الثالث
منورني دائما

نقطة مية said...

مصراوي اوي

اخلتم تواضعنا يا سيد مصراوي..و يفرحني جدا ان البوست عجبك و تابعني عشان الجزء الثالث فيه بقية النماذج الغريبة
:-)
نورت ميتي

نقطة مية said...

sendbad
اشكر لك دعائك الرقيق لاخي صاحب البوابة..آمين
اسعدتني متابعتك جدا و استنى الجزء الثالث لان ما خفي كان اعظم
تحياتي

نقطة مية said...

dr-killer
اضحكتني حكايتك عن الميكروباص و فعلا كويس انه ما شالك بالقوة و ركبك فيه...

طب كويس انك ماتعلمتش تشتم و فعلا معاك حق الاحترام موجود بس مستتر
اما السئيل فا ربنا ينجينا منه من سئالته

اكيد نورتني بزيارتك يا صديقي و تابع معي للجزء الثالث

Unknown said...

صدقينى انتى شرحتى صفات كتيرة محتاجين نغيرها بشكل دقيق وسليم وبخفة دم بس احيانا دة بتبقى بعض الترسيبات النفسية لاشخاص حاسين ان ملهمشى اهمية فى الحياة وبدل ميحاولوا انهم يطوروا فى نفسهم او يشغلوا انفسهم فى شى مفيد انهم يعقدوا بقى الناس او يحشروا نفسهم فى شى ملهمشى فية علشان يحسوا باهمية الى بيعملوة ويحسسوا الناس ان انا من غيرى مش هتقدر تعمل مصالحك
وربنا يهدى

انتظار مؤقت said...

حبيت اشكرك على مرورك عندي و كان نفسي ارد عليك هناك بس اصلا انا ندمان على البوست انو اتفهم غلط ..تحياتي و اشوفك عندي دايما ياجميل

dr-killer said...

اه مريت تاني علشان اشوف الجزء التالت بس باين عليه لسا ما نزل

بس راح نساعدك شوي
اكتر شي بيحسسنا انو احنا بمصر لما نركب مواصلات ...... السواق ايدو على الزمور سواء في حد في الطريق ولا لا
بقالي 4 سنين عمري ما ركبت مواصلة وحدة من غير ما اسمع بييييب
بيييب

بس حبيت احكي هادول الكلمتين
يالله سلاااااااااااااام

نقطة مية said...

ايوية

يا خبر..عقدة النقص دي منتشرة كتيييير بين الناس...الصفات السلبية لازم الانسان ياخد باله منها و الا هتتحول الى سلوك عام....
نورتيني طبعا جدا..و افدتيني كمان شكرا

نقطة مية said...

dr-killer

الجزء التالت بكرة او بعده بالكتييير اوي..و حطيت ملاحظتك في الاعتبار و هتشوفها قريب...و سعيدة جدا بزيارتك و المدونة مدونتك تمر وقت ما تحب...نورت المية
شكرا

نقطة مية said...

انتظار مؤقت

انا بقى مش نادمانة على البوست بتاعك لانه عجبني و حلو جدا..و رديت عندك على فكرة على اسبابي

انت منورني..و مدونتك مش هقطع الزيارة ليها ابدا

تحياتي

زحل الفلكي said...

السلام عليكم
معلش جيت متأخر كتيير

بس عايز اتكلم معاكي اني انا

مشرف رحلة

الشخصية اللي بتتكلمي عليها دي بالظبط انا بعملها
يعني من غير محد يطلب مني اطلع ابقا مشرف الرحلة
وروح هنا وتعالى هناك
وفي القسم في الكلية انا اللي اجمع فلوس الكتب وانا اللي اتفق مع الدكاتره و و و و

لكن
لازم الشخص اللي
بيحب انه يكون مشرف رحلة
زي حالاتي يعني
انه يدور على الوقت اللي ممكن يعمل فيه الدور ده
بمعنى

اننا لو كنا في مكان ومحتاجين حد هو اللي يكون مسئول ولازم حد يتطوع
ومفيش حد اتطوع
ساعتها مشرف الرحلة ده بيكون مفيد
لما بيكون فيه رحلة والناس دماغها عايزه ترتاح وتستمتع بالرحلة
ساعتها بيكون الشخص مشرف الرحلة ده مفيد علشان بيلاقي متعته في انه يقوم بالعمل ده

لكن عيبة ايه بقا وده بقا اللي لقيت نفسي وقعت فيه
ان الشخص مشرف الرحلة ده بيحس في وقت من الاوقات انه ليه فضل على الناس اللي حواليه
واول ميحس كده
بجد بيجيله موقف يخليه يقف عند حده من عند ربنا
لأن نيته بدأت تتغير من انه يكون واحد موجود علشان يساعد الناس او وهب نفسه انه يحاول يساعد الناس
بتتقلب نيته انه من غيره مفيش حاجه تحصل
ووقت لما بييجي للواحد الشعور ده
لازم يتأكد 100% انه خلاص حيروح في داهيه
واخيراً بقولك متضايقيش من مشرف الرحلة علشان كتير من شخصية مشرف الرحلة
بيكون نفسه يكون من اللي بينطبق عليهم

ان لله رجالا يختصهم بقضاء حوائج الناس حبب اليهم الخير وحبب الخير فيهم وهم الامنون

او فيما معناه يعني علشان مش فاكر النص

بجد موضوع هايل
كملي وفي انتظار الجزء الثالث
ومعلش ردي طويل حبتين كالعادة

Anonymous said...

الأخت الفاضلة: نقطة مية
السلام عليكم ورحمة الله وبركاته
هذه العينات السلبية والتى وردت فى مقالك بجزءيه
ماهى سوى تجسيد للحال الذى وصل له المجتمع من إنفكاك وترهل وتخبط فى كل شئ
لم يعد هناك منطقية لأى فعل أو سلوك
هذه الإفرازات السلبية للمجتمع دليل أن هناك خلل مافى بنية المجتمع الأساسية

قد ينظر إليها البعض بسطحية ويتخذ منها نماذج فكاهية مضحكة
ولكن شر البلية مايضحك

تقديرى واحترامى

أخوك
محمد

نقطة مية said...

صديقي زحل الفلكي

انت عارف و الله قريت ردك 6 مرات..مش عارفة اقولك ايه...انا بحييك على صراحتك..اصلا كل واحد فينا فيه من الصفات دي اكيد بس محدش بيعترف بجزء منه فيه صفة كدة..و الهدف من البوست ان كل واحد يقيم نفسه مع نفسه اما انت فعلا مش عارفة اقول ايه..ارفع القبعة احتراما لك...
و فعلا معاك حق ان اللي عنده الصفة دي لازم ينقي وقتها..و الناس بتحتاجها بس مش في كل وقت لان احيانا بتتقلب لتطفل مع اختلاف النية طبعا...
ما تعتذرش على طول الرد لازم تناقش و هو ده الهدف من التعليق

نورت يا بشمهندس

نقطة مية said...

الاستاذ محمد الجرايحي

و عليكم السلام و رحمة الله و بركاته

اتفق معك تماما انه لم يعد هناك منطقية لاي فعل او سلوك..و للاسف انتشرت هذه السلوكيات في المجتمع بصورة واضحة حتى بات الناس يعتادونها...و هدفي من الموضوع ان ارفع الغطاء عن هؤلاء الاشخاص و اسخر من الصفات التي قد تؤدي الى اذى الغير حتى يعيد كل شخص تقييم نفسه و ليس الموضوع للاضحاك فقط و لكني وضعت النصيحة في اطار فكاهي..
تحياتي اخي الفاضل

زحل الفلكي said...

يااه قريتي ردي 6 مرات

ليه بس كده ده سهل وبسيط اهو
:P

بالنسبة لموضوع ان كل واحد يقيم نفسه
انا لي وجهة نظر في الحكاية دي
اني لو معرفتش انا ايه وايه حدودي وايه قدراتي وايه عيوبي

يبقا مش حعرف اتطور ولا حعرف اتحكم في نفسي وتصرفاتي

وعلشان كده انا واللي حوليا
في بورسعيد واحنا اعضاء في موقع بورسعيد اونلاين
يادي النيلة كل شوية اعمل دعاية
المهم يعني المجموعة دي بتحاول تغير نفسها على طول للأفضل بكورسات تنمية بشرية وغيره وغيره
وده بيخلينا نتطور كمجموعة
يعني حتلاقي غيري كتير من المجموعة دي عندهم نفس التفكير

تفكير اعرف قدراتك واعرف نفسك كويس علشان تتغير للأحسن
ودي برضه حاجه انا مقتنع بيها جدا اننا لما نكون مجموعة ليه هدف مشترك
بتكون ناجحة بشكل كبير

ومش حعتذر عن طول الرد تاني علشان المناقشة مفيده فعلا
شوفتي التغيير
:P:P:P

وفي انتظار البوست الجاي على احر من الجمر يمكن يطلعلنا حاجه تانيه
:)

كراكيب عادل said...

هههههههههههههههههههههههههههه

موتيني من الضحك يخرب عقلك

السئيل دة تخيلتة بالظبط

كلنا اتحطينا في الموقف بتاع اختك

فعلا فعلا بيموتني دة من الغيظ

انا كل دول وشخصيتي لسة مجاتش او يمكن حبة من كل دول معرفش

بصراحة موضوع شيق جداااا

كلمة ايديال وكريازي

هههههههههههههههههه

بجد حريفة في السرد احييك منتظر التالت علي نار اتاخرت لاني بدلت اللاب توب ومتكعبل في نظام الفستا الجديد

تحياتي

Radwa said...

نماذج حلوة اوى اللى انتى عرضتيها وبتحصل فعلا
تحياتى الشديدة لكى

Anonymous said...

تعرفي كل واحد ليه سمة بتميزه عن غيره والامر كذلك بينطبق علىالمجتمعات ولعل الصفات هذه من اكثر الصفات التى تميز الشعب مصري وانطباع اتاخد عليه ولعل ما اكد لي هذا ما سمعته امي اثناء تاديتها لمناسك العمرة وان بعض السعوديين قال لها هو انتوا كده يا مصريين كذا وكذا وكذا خلاص بقت في حاحات بتطرا على العقل بمجرد سماع كلمة مصري وربنا يهدي ونغير من نفسنا شوية

شــــمـس الديـن said...

السلام عليكم و رحمة الله

نبدأ

مشرف الرحلة دي بصراحة اول مرة اشوف اللي انت بتقولي عليه دا
بس انا عارفة ان في مصر الناس مش بتحب تتعب اساسا علشان كدا بيحبوا انهم يلعبوا دور المشرف في اي حاجة علشان يريحوا دماغهم !!!

طولة اللسان دي بقي ... مش في الحقيقة و بس و لكن علي النت كمان !!!!

فيه فئة بتفتخر ان النت مفيهوش قيود و به حرية اذا ... نشتم زي ما احنا عايزين !!!!
مش هنسي اساسا الناس اللي طالعة تهاجم المدونات اللي حاطة شعار "تدوين نظيف "و بيدافعوا عن حق و حرية الناس في السب !!!

لا تعليق صراحة

اما بقي بالنسبة لل"ثقيل "
بجد التناحة و انعدام الدم مرض مش عارفة هل له علاقة بجينات الضشعب المصري او سلالة معينه فيه ولا لأ

اما بالنسبة للناس اللي بيبقوا عايزين يقولوا نكن ...بجد الناس دي بتصعب عليا لسبب لانهم مش عارفين ازاي يتواصلوا مع اللي حواليهم و فاكرين ان بخفة الدم المفتعلة الناس هتحبهم ...

مستنية الجزء التالت :) و شكرا علي الدعوة

gohayna said...

يااااااااااااااااااااه

المشرف دا عندي احساس اني عايزه اقتله

فيه ناس كدا بتحشر نفسها في الي ملهاش فيه

الشخصيات دي موجوده حولينا في كل الدنيا

انا متابعه ومستنيه الجزء التالت متتأخريش بقي

نقطة مية said...

gohyna
شكلك اتعاملتي مع مشرفين كتير..و متغاظة منهم...
تابعيني للجزء الثالث
نورتي المية

نقطة مية said...

الفاضلة شمس الدين
و عليكم السلام ورحمة الله و بركاته
الحمدلله انك مقبلتيش نوع المشرفين ده..اما طولة اللسان ففعلا للاسف وصلت للنت و بيهاجموا المدونات النظيفة مع اننا مش بنهاجمهم!!
ربنا يهدي الحال
اما الثقيل فدي شخصيات منتشرة جدا و لو في جينات الشعب المصري تبقى مصيبة..الناس بقى اللي بتقول نكت دي والله في منهم كويسين بس لما يقولوا نكتة بيبقوا عايزين ضرب النار
منورة المية و يارب دائما

نقطة مية said...

قلوب حائرة
ايه اسم المدونة الجميل ده...
للاسف فعلا معاكي حق الصفات دي بقينا مشهورين بيها..مش عارفة هي شهرة ولا فضيحة؟!
نورتيني بالزيارة

نقطة مية said...

radwa
يا اخت رضوى منورانا جدا ويارب دائما و سعيدة ان البوست عجبك
تحياتي

نقطة مية said...

كراكيب عادل
يا سيدي مبروك على الاب توب الجديد و عقبال البوتاجاز!!
والله انا سعيدة جدا ان البوست عجبك..و احمد ربنا ان شخصيتك مش في دول انت زعلان ليه؟و بعدين كلنا فينا حتة من كل النماذج دي

منور المية
تحياتي

نقطة مية said...

زحل بك الفلكي
انا قريته 6 مرات عشان صراحتك و معرفتك لنفسك الجيدة صدموني و دي ميزة نادرة اكيد غطت على المشرف اللي جواك..
اتفق معاك ان الانسان لازم يعرف حدوده و امكانياته عشان يتطور و اعمل دعاية زي ما انت عايز فكرة بورسعيد اونلاين و اللي انت و اصحابك عاملينه حاجة تستحق الاحترام و والله لو كل جروب عمل كدة منا احنا الشباب هتنقرض سلبيات النفوس دي..و انا مقتنعة بفكرة اعرف قدراتك تعرف نفسك و انصحك بمجموعة د.ابراهيم الفقى لانها ممتازة في المجال ده
و يارب البوست الجاي متقوليش انا ده
:-)
شرفتني بالزيارة جدا و دائما
احترامي لك