المصرييييييييييييييييييييييييين

المشرف على الرحلة.......

المشرف على الرحلة يعد الطلبة و ينظم الرحلة و يوجه و يشرف بقى.......كتير من الاشخاص في مجتمعنا واخدين الدور ده من غير ماحد يطلب منهم..احكي لكم موقف....كنت في شركة طيران و للي ميعرفش ...انت بتاخد رقم من على الباب و تقعد تستنى دورك لما تشوف رقمك على شاشة قدام الموظف فتروح له تقضي مصلحتك...المهم...لقيت واحد واقف جنب البنش بتاع الموظف و ساند عليه و اي واحد يجي عليه الدور و يروح للموظف و يستفسر عن حاجة تلاقي اخينا المشرف بيشترك في الحوار و يوجه الراجل و يسبغ عليه من خبرته..والعجيب ان الموظف لا يعترض المهم انه طالب الحاجة ده يمشي و يجي اللي بعده......او انه خد على كدة و انه لو اعترض المشرف هيتخانق و يقول"يعني الحق عليا اني حبيت اساعد؟".....موقف تاني....في هارديز مرة شفت واحد نفس العينة دي وواقف نفس الوقفة..وانا بطلب لقيت اللي اتدخل في الحوار بيني و بين الموظف و بيقولي "لأ الساندوتش ده مش حلو"و راح مكلم الموظف و قال له هات لها كذه و طلب هو..طبعا اتحرق دمي و قلت له"بكل ادب و الله" اني عارفة هطلب ايه و اللي يعجبه مش ضروري يعجب غيره فألح و قعد يدافع عن الساندوتش اللي طلبه فدماغي دخنت و قلت له اطلبه لنفسك و ملكش دعوة بيا و اخينا ده زعل و قال طبعا"انا الحق عليا"و طلعت انا الشريرة اللي بترفض التوجيه و النصح !



طولة اللسان........

مش عارفة ليه حاجة كويسة او حاجة وحشة تحصل نشتم.. و الفاظ غريبة.. و أغلبها يخدش الحياء..و المصيبة ان محدش بيهمه الناس اللي حواليه مش هقولك فيه بنات ممكن تسمع بس لان في رأيي محدش لازم يسمع الكلام ده....تبقى راكب تاكسي وواحد قرص على التاكسي بعربيته و سواق التاكسي يسمعك من المنقي خيار و هو بيشتم السواق اللي عمل عملته"يا ابن ...وأم..ويلعن..ويحرق..و يخرب..الخ"لما تحس انك نفسك تخلع ودانك و ترميها من شباك التاكسي!! اديك مثال تاني....واحد الدنيا ضاقت في وشه او بيقضي مصلحة و اتعطلت من البيروقراطية المعهودة فيقول "اصل دي بلد...!؟"و هاتي يا شتيمة..مثال تالت...واحد بيذاكر مثلا و جاب درجة حلوة او واحد ربنا رزقه بحاجة تلاقي اللي يقول "اصل ده ابن.....محظوظ او دحاح"اي حاجة تتقال بس الشتيمة الاول و انت و حظك يا تسمع شتيمة مبلوعة زي انواع الحيوانات مثلا او شتيمة من العيار الثقيل تجيبلك صمم مفاجىء....ايه القباحة دي!!؟؟


السئيل....

وده بقى اللي يتحط على الجرح يجيب غرغرينة!!؟...بني آدم غتيت و دمه يلطش...وبارد لدرجة انك لو بصيت على "لامؤاخذة"قفاه هتلاقي كلمة"اديال"او"كريازي".. دول اكترهم موظفين الحكومة..بتبقى جايب ورقك و مرتبه و هتحطه قدام الامر الواقع عشان يخلصه فيبوصلك ببروده و ابتسامته الهبلة و يطلعلك القطط الفاطسة في الورق...احكي لكم حاجة حصلت لاختي ..راحت تختم استمارة الرقم القومي من كليتها لاقت الست الموظفة قاعدة"ودي حاجة نادرة" فقالت لها"عايزة اختم الاستمارة" فالموظفة بتلامة قالت"استني نص ساعة لحد ما رجلية تنشف اصلي غاسلاهم و مش هقدر اقوم لحد مكتبي"!؟..و مرة موظفة في الشهر العقاري مكنتش عايزة تسجل العقد اللي راحت ماما تعمله عشان صورة توت عنخ آمون اللي على الرقم القومي مش كاملة!؟ آل في حتة من قمة راسه مش واضحة!!!!؟ تقولش زاهي حواس!؟....نوع تاني من السئالة اللي هو الاخ اللي بيمشي بعربيته على الخط الابيض في الشارع ببطء وانت لا عارف تروح الحارة اليمين ولا الشمال و تنور و تزمر لكن كما قال سعد زغلول"مفيش فايدة"!؟..او تلاقي الواحد منهم يجي يقولك نكتة قديمة و بايخة و طويلة و يمسك فيك تسمعها و لازم تبتسم..هو الحقيقة مبتبقاش ابتسامة انما هو بقك اتعوج نتيجة لالتهاب العصب السابع!!؟..واحدة من العينة دي مسكتني و قالت"هقولك نكتة"..و ساعيتها اتمنيت تجيلي سكتة قلبية عشان اكيد ربنا رحيم على عباده بس للاسف مجتليش فاعتبرتها تخليص ذنوب!!...المهم قالت ...ولا بلاش لحد يجراله حاجة فيكم وآخد ذنبه و تتحكي لي نكتة تانية!؟

اكمل لكم في الجزء الثالث ان شاء الله

وجهة نظر اخرى:الذوق العام ده كان زمان

المصرييييييييييييييييييييييييين

من ممارستي لهواية قديمة الا و هي مراقبة خلق الله في الشارع..و ده مش لشىء الا لمراقبة السلوك و التصرف الانساني..طبعا حد ربنا هيفتح عليه و يقولي فيه ناس كمان بتتفرج على تصرفاتك....هقولوا و ماله يمكن يتعلم مني حاجة او يشوف مني تصرف هو كمان بيعمله و لما شافني بعمله حس انه غلط فهيبطل يعمله..حد فهم حاجة؟؟..مش مشكلة اكيد اللي ربنا فتح عليه ده فاهم....حد تاني غير الاولاني ربنا فتح عليه برضه هيقولي من راقب الناس مات هما..هقوله يا سيدي عارفة ياعني انت جبت التايهة!!؟؟؟انا بس بتعلم او اتعظ...ما علينا...هقولوكم بعض الصفات او التصرفات او الشخصيات اللي كانت بتثير حفيظتي"حلوة تثير حفيظتي دي" في المجتمع المصري............



أبو العريف.........


و الصفة او الشخصية دي موجودة في ناس كتير..و ده واحد ميعرفش يقول معرفش...اديكم مثال انا جربته شخصيا في ساعة صفا و روقان و طولة بال....كنت راجعة من جامعتي اللي في آخر الدنيا بدري و دي حاجة كانت نادرة الحدوث...المهم لاقيت واحدة جات تسألني عن رقم اتوبيس "أعزكم الله"تروح بيه حتة اسمها غريب فقولتلها معرفش اصل انا مش من هنا انا من هناك...فقالت لي اصل انا كنت هنا في الموقف الصبح و جاية من البلد و سألت واحد على رقم الاتوبيس فدلني على واحد و كان متأكد فركبته وداني القاهرة الجديدة!!!؟؟فركبت فيه و هو راجع و رجعت الموقف تاني اسأل...و بلاش اقول لكم هي دعت على الراجل ده بايه.........أختكم مكدبتش خبر و تفتقت قريحتي"حلوة دي كمان"عن فكرة اتسلى بيها و انا واقفة...قررت اسأل الناس عن شارع"محمد حمدي حسن"!!؟؟المشكلة ان ناس كتير جاوبوني و ادوني اتجاهات و اروح ازاي بالمواصلات و ولا اجابة زي التانية مع ملاحظة ان اكتر اللي ادعو معرفة الشارع كانوا رجالة و اكتر اللي قالو منعرفش من البنات و الستات فلقيت ان الصفة دي ذكورية بحتة..على فكرة"محمدحمدي حسن "ده كان اسم واحد زميلي في الجامعة!!!!!؟



العلامة"بتشديد الام"..........


و ده بقى دماااااااااغ....بيعرف كل حاجة عن أي حاجة و يختم حديثه بجمل يتواضع فيها و يحسسك انه بيشكر ربنا على العلم الفياض ده و انه بعد اللي قالو ده كله لسه يجهل الكثير و ان العلم ده هبة من الخالق خصه بيها عشان نيته صافية زي زيت الذرة..جمل زي "هذا و الله أعلم"..." و الله المستعان"..." ربنا يقدم اللي فيه الخير".....تقعد جنب الواحد من دول يدوس في اي موضوع يتفتح..سياسة يتكلم..كورة ميضرش....فن و ماله....طب ميخسرش....هندسة اسهل من شرب المية....يعني الراجل عليم ببواطن الامور...نفس اللي ربنا فتح عليه ده في اول البوست هيسألني"ميمكن الراجل مثقف؟ و انتي اللي مش فاهمة حاجة" هقول له ان فيه حاجات بتكون واخدينها في المدرسة او حاجات معلومات عامة هو بيغلطها و النوع ده بيتفقس بسرعة و بعدين ميقفلوا الكليات بقى وواحد زي ده يعلمنا.. المشكلة بقى ان النوع ده بيبقى أغلبه من كبار السن او يعني الاكبر منك في القعدة الحوارية و لو فتحت بقك و غلطته تبقى قلة ادب و قلة ذوق من ساعدتك و حتى الجالسين لو عارفين انك صح برده هيلوموك و يقولولك"ده انتم جيل ميعلم بيه الا ربنا..انتم مش فاهمين حاجة..مبقاش غيرك اللي تعدل على فلان يا اللي مطلعتش من البيضة!!؟"فالمفروض من سيادتك متطلعش من البيضة و تفضل قاعد تسمعه و تستفيد من علمه فهتلاقي ودانك بتطول و يطلعلك ديل ونصيحة قوم من القعدة دي بأي شكل قبل ما تنهأ عشان كتير من اللي وصلوا لكدة مش عارفين يرجعوا!!!؟
الغريب ان اللي بيبقوا متأكدين من جهل هذا الرجل بييجوا يسألوه عن حاجات ويفتحه معاه مواضيع و يسمعوه..مش عارفة ليه!؟



الفيلسوف......


ده الشخص اللي يفلسف اي حاجة يعملها سواء صح او غلط لصالحه و مش هتاخد معاه حق ولا باطل و مش هينوبك من المناقشة معاه الا ارتفاع ضغط الدم"نسأل الله لناو لكم العفو و العافية"......اديك مثال...طالب مش بيذاكر تقول له ذاكرلك كلمتين ينفعوك يوم السؤال يقولك انا اتعب نفسي و اعصابي ليه الصحة اغلى..تقول له اتعب عشان تدخل كلية عدلة واذا كان في الجامعة يبقى عشان تنجح بتقدير..يقول لك اللي في الجامعة مادام نجحت يبقى فيه تقدير مش مهم يبقى ايه بس المهم اني عديت و خلاص و اللي مش في الجامعة هيقولك لو كل الناس فكرت انها تدخل كلية كبيرة الوظائف البسيطة مش هتلاقي ناس تشتغل فيها مع انها وظائف شريفة....تقول للي في الجامعة التقدير بيفرق ساعة الوظيفة و تقول للي مش في الجامعة ليه متحلمش بوظيفة كبيرة..هيردوا الاتنين هو فيه حد لاقي شغل اليومين دول يبقى اتعب نفسي ليه!؟؟ و ترجع لنفس النقطة كأنها دايرة فاشتري صحتك انت و بلاش تتعب نفسك و تجادل و الا هتلاقي نفسك في مستشفى المجانين بتغني"البيضة عند الفرخة..والفرخة عايزة القمحة...و القمحة عند القماح..."!!؟؟؟



الفهلوة.......


الصفة دي بقى مستفزة جدا و منتشرة للاسف جدا برضه....و الفهلوة انك تجيب الفلوس من بذر العنب او تاخد اللقمة من بق العو...المهم انك تعمل حاجة تاخد بيها حق حد من غير ما يحس..فيها حتة نصب....زي مثلا انك تكون واقف في طابور بقالك ساعة و فجأة يجي واحد و يتسحب و يقف جنب الراجل اللي واقف تاني واحدقبل الشباك و يفتح معاه حوار و يضحك معاه و يجر ناعم كأنه يعرفه من زمان...و لما يجي الدور على الراجل ده يقرب الفهلوي معاه ناحية الشباك و ممكن يسأل الموظف باهتمام عن حاجة الراجل اللي عمره ما شافه كأنه جاي معاه..و لما الموظف ينهمك في عمله يميل الفهلوي على الراجل اللي عمره ما شافه و يطلب منه يوقفه مكانه بعدما يخلص عشان وراه شغل او عنده ظروف مش هتسمحله يقف في الطابور...و فعلا ده اللي يحصل و انت يا عيني اللي واقف في الطابور تخبط دماغك في الحيط و اذا حاولت تكلم الفهلوي او تعنفه مش هيرد عليك المهم خلص مأموريته.........مثال تاني.....تبقى ماشي بعربيتك في امان الله و في الحارة اللي تطلع فيها على الكوبري وتلاقي واحد راح خارج من وراك للحارة اللي مش طالعة الكوبري و ماشي لحد مطلع الكوبري و راح راجع للحارة اللي تطلع الكوبري و يطلع الكوبري و يمشي و انت قاعد في عربيتك و ملتزم و منقوط...او مثلا تشتري بطيخة حمرة و البياع قطعلك حتة عشان تتأكد و لما تروح تلاقيها قرعة...بلاش دول كلهم هحكيلكم حكاية غريبة جدا و حقيقية.."حكاية الكتكوت اللي بيرقص على الصنية!!؟"...كان فيه واحد قاعد في الشارع و معاه صندوق كتاكيت و قدامه صندوق خشب حاطط عليه صنية حديد..ياخد الكتكوت من دول و يحطه على الصنية و يغني و يسقف فيقوم الكتكوت يرقص !!؟و يقول للناس انه درب الكتاكيت دي على الرقص و يبيع الكتكوت بعشرة جنيه..و في يوم واحد شراني جه و اتخانق مع بتاع الكتاكيت عشان الكتكوت مرقصش لما خده البيت و مات
و مع الخناقة وقع الصندوق الخشب اللي عليه الصنية و طلع تحتيه وابور جاز ..اتاري ياعيني الكتكوت مكنش بيرقص ده كان بيتنطط من الصنية السخنة!!!؟؟

اكمل لكم في الجزء التاني ان شاء الله

رسالة من تحت الماء

بسم الله الرحمن الرحيم

نتقدم بخالص الشكر و العرفان الى مجلس الشعب الموقر باغلاق ملف ما يسمى بكارثة العبارة"السلام 98"......بعد ان ارقنا طويلا..
و التسليم بالقضاء و القدر وان النفع و الضر هو رزق من العليم بمخلوقاته...
و يعلم الله انها حكومة تعمل على راحة من على ارضها وفي بحرها فهي بذلك تعمل على تخفيض الكثافة السكانية والحفاظ على الكائنات البحرية....فمصائب قوم عند قوم فوائد
ونتوجه بجزيل الشكر للسيد ممدوح اسماعيل على مجهوده
كما نتوجه بالامتنان لكل من ساهم في افشال مشروع الجسر الذي يربط بين السعودية و مصرنا الحبيبة لما فيه من اضرار بالحياة البحرية لعدم غرق العبارات المحملة بما لذ و طاب
نشكرك حكومتنا في توفير مصدر الرزق فانت حكومة تعمل الخير و ترميه في البحر
ملحوظة:في الخدمة اذا اردتم المساعدة في اهالي قلعة الكبش او من طالب باقالة الحكومة في المجلس

و تفضلوا بقبول فائق الاحترام

التوقيع:
سمكة قرش
العنوان:
البحر الأحمرامام حديقة خيار البحر بجوار مسجد المرجان

.....مادلين.....و.....أميرة.....

اليوم:الخميس..الوقت:الثامنة مساءا التاريخ:2007/5/3

مادلين طفلة تبلغ من العمر ثلاث سنوات..ذهبت في عطلة مع والديها الى البرتغال في احدى المنتجعات..كانت الاسرة تقضي وقتا ممتعا و الطفلة تلهو سعيدة بين والديها و تتعالى ضحكاتها... حتى انهكها اللعب... و داعب النعاس جفونها الصغيرة..فاستسلمت للنوم بين ذراعي والدها الذي اخذ يهدهدهاو يربت على ظهرها حتى نامت مطمئنة فحملها والدها بحنان وو ضعها في مهدها و غطى جسدها الرقيق بالغطاء ذو النقوش الطفولية لازهار و ارانب...عاد الاب الى حجرة المعيشة حيث رفعت الام عينيها عن المجلة التي بين يديها قائلة"هل نامت؟"ابتسم الاب في حنان و هو يقول"كالملاك"بادلت الام الاب الابتسام..جلس الى جوارها و نظر اليها و قال:"ما رايك لو نذهب الى المطعم لتناول العشاء؟"ابتسمت الام في دلال قائلة:"سأذهب لتغيير ملابسي"............الساعة:العاشرة مساءا
عاد الوالدان و هما يتبادلان الدعابات و تتعالى ضحكاتهم..فتح الاب باب الشقة التي استأجروها فاندفعت الام الى الداخل قائلة:"سأذهب للاطمئنان على مادلين"..تابعها الاب بنظره حتى غابت عنه و هو يجلس على المقعد المجاور للباب قائلا"كانت سهرة جميلة"...و..جاوبته صرخة مدوية...هرع الاب الى غرفة مادلين ..الام منهارة على ارضية الغرفة..احتضنها و دار بعينيه في ارجاء الغرفة كان فراش مادلين فارغا و النافذة كما هي..اندفع الاب نحو الفراش يقلبه بعنف غير مصدق اختفاء ابنته ...و...تعالى نحيب الام ....

اليوم:الجمعة...الوقت:الثانية عشر ظهرا...التاريخ:4/5/2007

تناقلت الصحف الاوروبية خبر اختفاء مادلين في ذعر...اعلنت السلطات حالة التأهب و قامت بنشر ملصقات بصورها....و توالت الحملات للدعوة للبحث عن مادلين...فموقع شهير
"e-bay"يعلن عن جمع تبرعات لدعم حملة المساعدة في البحث عن مادي
..وناشد نجمي كرة القدم الانجليزي ديفيد بيكهام و البرتغالي كريستيانو رونالدو كل من يعلم شىء و لو بسيط ان يدلي به و ان يتكاتف الناس في البحث عن مادلين...و ناشد الاعلام الناس بوضع صورتها في المتاجر و على المدونات..و انشأ والديها موقعا على شبكة المعلومات لمناشدة الناس من جميع انحاء العالم مع وضع صور الطفلة و السماح لمن يزور الموقع بادلاء تعليق للتعاطف مع الوالدين...................................................و لا يزال البحث مستمرا في امل للعثور عليها حية..






اليوم:الثلاثاء...الوقت:التاسعة صباحا...التاريخ: 7/5/2007

"يالا يا بنات..عايزة اشوف طابور اتنين اتنين"..صاحت المعلمة موجهة حديثها لمجموعة من الطالبات في الحادية عشر من عمر الزهور...تقافزت الطالبات فرحا بضياع الحصة و اسرعن للاصطفاف كما امرتهن المعلمة...و..."هنروح فين يا ابلة؟"...نظرت المعلمة الى الطالبة التي طرحت السؤال قائلة:"بابا الوزير جاي و لازم نقف نستقبله و نرحب بيه يا أميرة"..لم تفهم الطفلة لماذا عليها الترحيب بالوزير هي و صديقاتها..لم تعرف من هو الوزير اصلا او ماذا تعني كلمة وزير!؟..و لكن عقلها الطفولي لم يكترث لتساؤلاتها طويلا مادام اليوم الدراسي ضاع و انتهى قبل ان يبدأ و لن تحمل في حقيبتها اي واجبات منزلية...
اصطفت الطالبات خارج المدرسة و هن يتداعبن و يتبادلن الاحاديث الجانبية و الضحكات و تعالت اصواتهن مع محاولات المعلمات ترتيبهن و مع اشتداد حرارة الشمس و ازدياد التوتر بقدوم الوزير...و ضجيج الطالبات..قامت احدى المعلمات برفع صوتها بتنبيه عال للطالبات"شوفوا يا بنات اول ما تلاقو عربية الوزير هنقولكوا سقفوا..مش عايزة اسمع نفس واحدة فيكم..ولا واحدة تقولي اروح الحمام ولا المح واحدة بتتكلم مع اللي جنبها و الا هعاقبها و اذنبها طول اليوم...كل واحدة تقف هادية لحد ما الزيارة دي تعدي على خير فاهمين؟"....عم الهدوء الحذر المتوجس بين الطالبات...............
تقلص و جه اميرة من شدة ضوء الشمس ..و تململت في وقفتها...لقد آلمتها ساقيها النحيلتين من الوقوف ..فتمتمت"الوزير ده اتأخر اوي انا تعبت"...تبادلت نظرات الضيق مع صديقاتها و لكن لم تجرؤ احداهما على تحريك شفتيها خوفا من العقاب....كانت حرارة الشمس تزداد و الوقت يحبو...احست بحلقها يجف...كانت تحلم بكوب ماء بارد او ظل الشجرة التي اعتادت ان تلهو تحتها مع اقرانها يوم الجمعة...نظرت الى مدخل الشارع على أمل ظهور سيارة توحي بمرور الوزير....الشمس تشتد..رفعت اميرة يدها فوق وجهها في محاولة لحجب اشعة الشمس الحارقة...تلاحقت انفاسها من التعب و العطش...تابعت المعلمات بنظراتها و هن يتحركن جيئة و ذهابا في توتر..."عطشانة اوي"...حولت اشعة الشمس حركة المعلمات الى اطياف من نور تلاحقهم..تابعتهم بنظرها مرة اخرى حتى دمعت عيناها.."راسي وجعاني اوي..الدنيا حر"...مدت كفها الصغيرة تمسح به العرق الغزير على جبينها..."انا مش قادرة اتنفس..اقول للابلة؟"تعالى صدرها صعودا و هبوطا في محاولة لالتقاط الانفاس الصغيرة...."انا دايخة ..تعبانة"..تصاعد لهاثها.."انا صدري واجعني"...تصبب عرق غزير من جسدها الصغير.."انا.............."............................"أميرة!!!؟؟؟".........صرخت المعلمة و هي تجد تلميذتها تسقط على الارض مغشيا عليها...هرعت اليها مع المعلمات الاخريات في محاولة لافاقتها...ساد الذعر بين صديقاتها...و"الوزير وصل"اسرعت بعض المعلمات في تهدئة الطالبات المذعورات و اعادة ترتيبهن فيما حملت اميرة الى داخل المدرسة.....

اليوم:الأربعاء...الوقت:الواحدة ظهرا...التاريخ:8/5/2007

"الله اكبر"...تصاعد النداء من مئذنة مسجد القرية مختلطا بنحيب المصلين..."الله اكبر"....صلاة الجنازة..."الله اكبر"...جنازة اميرة......تعلقت عينا الأب المفجوع بنعش ابنته الصغير و قد اضفت الدموع عليه تلألؤا يليق بالملاك الراقد فيه....وتعلق قلبه و لسانه بالدعاء....و............حملت اميرة على الاعناق عقب انتهاء الصلاة...كان والدها يربت على النعش و يقول"مع السلامة يا أميرة...هتوحشيني يا بنتي"......تعالى نحيب النسوة لدي خروج النعش من السجد...و سار الموكب حتى وصل الى المقبرة..........فحملها والدها بحنان و نزل الى قبرها وو ضعها في لحدها و غطى جسدها الرقيق بالتراب...........
تناقلت صحيفة او اثنتين ممن تنهج نهج الشفافية خبر وفاة أميرة.........و أجبرت السلطات والدها على التوقيع على اقرار بوفاتها قضاءا و قدرا و انه لا يتهم أحدا في التسبب في وفاتها........و طالبت المدرسة بصورة من شهادة الوفاة حتى ترفع اميرة من سجلاتها.........

رحمة الله الوحيدة القادرة على اعادة مادلين الى والديها سالمة فتقوم السلطات بأخذ حقهم ممن روعهم....
رحمة الله الوحيدة القادرة على زرع الصبر في والدي أميرة و أخذ حقهم ممن روعهم......
فقط

اثبات شخصيتك=ملابسك الداخلية

استضاف الاعلامي الرائع عمرو اديب في برنامج القاهرة اليوم في حلقة يوم 7/5 الاستاذ عصام صقر رئيس مجلس ادارة المرصد المدني لحقوق الانسان و ذلك لمناقشة احوال اهالي قلعة الكبش الذين احترقت منازلهم-عفوا-عششهم في اواخر مارس الماضي و ظلت احوالهم كماهي الارض فراشهم و السماء غطاؤهم و لله دعاؤهم و لمساكن الحكومة طال انتظارهم...كما اذاع فيلما تسجيليا قامت باعداده مخرجة نشيطة يوضح الواقع المرير الذي يعيشه هؤلاء البشر...و عندما سأل عمرو اديب عن سبب بقاءبعض المتضررين في الشارع الى يومنا هذا مع وعود الحكومة بتقديم مساكن بديلة في منطقتي النهضة و دار السلام بل و تسلم البعض لهذه المساكن؟
كانت اجابة الاستاذ عصام مثيرة لمزيج من الحزن و الاستغراب و الصدمة ايضا..فببساطة ان كل من يريد تسلم وحدة من المساكن المذكورةيجب ان يحمل اوراقا تثبت و جوده في المنطقة منذ فترة و لكن توقفت عملية التوزيع لوفود غرباء و مدعين و بلطجية في المنطقة طمعا في المسكن و تقرر تسليم الوحدات السكنية لمن قام الحي بتعدادهم و حصرهم و لا عزاء لمن يملك اوراقا تثبت حالته... و قد تفتق ذهن العاملين بالحصر على حيلة لتعداد سكان قلعة الكبش-لصعوبة ذلك- و التأكد من استقرارهم في المنطقة الا و هي كالتالي :عند دخولهم اي عشة للتعداد يقومون بمطالبة سكانها بعرض ملابسهم الداخلية لاثبات شخصيتهم و مكوثهم في العشة و بالتالي يتم عدهم و منحهم عقود الوحدات
السكنية!!!!!!!!!!؟؟؟؟
لا اعلم كيف قامت السلطات بتعدادشعب مصرنا المحروسة اذا كانت تعجز عن عد منطقة عشوائية صغيرة!؟....و اذا كانت قد نجحت في ذلك فسيكون عدد سكان هذه المنطقةمعروف و مثبت في التعداد الرسمي المعلن و لا دول مش من عامة الشعب و كانوا غرباء و مدعين و بلطجية تدفقوا الى مصر وقت التعداد فلم يتم عدهم!!!؟؟؟على اية حال انا من الناس اللي مجالهومش التعداد و هنا يأتي السؤال لمن اتاه:هل طالبك احد بعمل عرض حي لملابسك الداخلية انت و المدام و الاولاد لاثبات اقامتك في الشقة!؟اليست هذه تفرقة"داخلية"بين الشعب؟و ما فائدة الرقم القومي اليس مخترعا من البداية لمعرفة الشعب فيه كام راس؟؟و هل سيأتي يوم يذهب فيه كل من اتم السادسة عشر من عمره الى القسم التابع له ليستلم طقما كاملا من الملابس الداخلية عليه كود بالكومبيوتر ؟و اذا وقف احدهم في لجنة اشهر فانيلته مع الرخص فيعدي!!!؟؟
لماذا تهدر كرامة المواطن المصري لمجرد انه فقير؟هل للكرامة قيمة بالمال؟هل لانه معدم لا يؤخذ حتى بأوراقه الرسمية؟هل لا تستطيع الدولة التصدي لشرذمة البلطجية؟هؤلاء الناس ارتضوا الفقرفي وقت جهنم الاسعار فيه تستعر و يسمع شهيقها...حمدوا الله على عشة تسترهم و تحمي اعراضهم في الليل من الحيوانات البشرية الضالة..تقوم الحكومة تفضحهم..تطالبهم بالملابس الداخلية..اتألم لشعور رب اسرة يعرض ملابسه الداخلية امام اولاده و يقدمها لموظفي الحي او ارملة تعرضها على استحياء و مهانة حتى لا يكون مصيرها الشارع المقفر...هؤلاء البشر بعضهم لا يملك قوت يومه و قد يكون قد خسر الوحدة السكنية لعدم امتلاكه ملابس داخلية..يجب اعادة النظر في الموضوع هناك اسر في العراء و اعراض تنتهك حرمتها واطفال تعيش حياة الشوارع بين اهلها..هؤلاء الناس فقدوا العدم للعدم و لم يعد لهم سوى الله

اول تاج في حياتي التدوينية

مرر لي اخي الحبيب"والذي اعتز بأخوته و افخر به على الصعيدين الشخصي و التدويني" صاحب البوابة هذا التاج..بصراحة الراجل مش مقصر بيزور مدونتي و مبيبخلش عليا برأيه و كمان تاج ده خمس نجوم اللي بيحصل ده و الله
:-)

بسم الله الرحمن الرحيم

#احب شخص الى قلبك في الدنيا؟
بعد حبيبي رسول الله هو ابي الغالي

#انسان مستعد تضحي بحياتك _ركز في كلمة حياتك_عشانه؟

صعبة انسان واحد...
اي انسان اثق فيه و اؤمن برسالته...يستحق حياتي لو تطلب الأمر فرسالته ستصبح رسالتي و لن اتخلى عن قناعاتي شريطة توافر هذين الشرطين..و افراد اسرتي بالطبع

#انسان كرهته لدرجة الجنون و تمنيت لو تمسك سكينة و تنقض عليه و تغرزها في قلبه تقتله و تقف تبص على جثته و تشفي غليل قلبك؟
مادام كرهت الشخص يبقى مايستاهلش حتى الفكرة دي كفاية اني لم و لن اسامحه الى ان يتوفاني الله فللاسف لا املك هذه الخصلة كما ان عندي ثقة كاملة بأن سبحانه و تعالى سيأخذ حقي و يثأر لي و شفتها كتييير

#ما هو اسم اجمل كتاب كتبه بشرقرأته و محتفظ به حتى الآن؟
احتفظ بكل الكتب و لكن اجمل كتاب هو رباعيات صلاح جاهين


#اسم كتاب_كتبه بشر برضه_انت متعلق بيه و بتقراه كل فترة؟
رباعيات صلاح جاهين برضه

#اهم جهاز منزلي متعلق بيه اوبتستخدمه كتير؟
mp3 player& my pc

شىء تحس بالراحة النفسية عندما تنظر اليه؟
البحر

#مكان تحس فيه بالحنين الى شىء لا تدري ما هو و ذكريات جارفة الى لا شىء؟
مدينة 6 اكتوبر و اغلبها مش ذكريات سعيدة


#مكان تحس بالراحة عندما تدخله؟
البيت طبعا..و لكن المكان الذي دخلته و احسست براحة لم اشعر بها في حياتي هو المسجد الحرام

#اجمل مدينة زرتها داخل مصر؟
للاسف عمري في مصر قصير جدا لا يتعدى سنوات الدراسة الجامعية فلم ازر اي مكان بخلاف الساحل الشمالي الذي اعشقه و لكن اجمل مدينة بشكل عام دبي

#اجمل مكان طبيعي رأيته داخل مصر؟
مفيش غير النيل في مصر و بشكل عام العين الفايضة و العيون الكبريتية اسفل جبل حفيت في العين


#شخصية كرتونية تحبها؟
donald duck

نوع هاتفك المحمول؟
nokia N80

سرعة بروسيسور جهازك؟
pentiumIV 2.4GHz

حجم ذاكرة _هارد_جهازك؟
80G

المساحة التي تشغلها المساحة الاسلامية على جهازك؟
5.7G

نفس الاجابة السالف ذكرها في قلبك_الاجابة لنفسك عشان الرياء يا اخوانا_؟
قلبي اكبر من 80 جيجا و مساحة الدين في قلبي صعب احصرها بالارقام و يارب تزيد دائما


#أهم هدف انت واضعه لحياتك الآن؟
ان يكون لي شأن في المجال الذي اخترته الا و هو الهندسة و ان لا اتوقف عن الحلم او الطموح


#مواصفات فتى الاحلام بالنسبة لي؟
ان يكون رجلا...ان يكون قلبه عامر بتقوى الله فمن يخشى الله اتقاه في جميع اقواله و افعاله و التزم بالفرائض..يحبني لنفسي..ذو شخصية قوية..صاحب رأي و فكر خاص..مثقف ومتفاهم..طموح..جميل الروح..يعتذر اذا اخطأ..هادىء النفس...لا يدخن


#صف ما يأتي:شعورك لما بتسمع كلمة مصر؟
بحس بحنين حتى و انا عايشة على ارضها و بتألم لما و صل اليه حالها


#لما بتسمع كلام عن اليهود؟
في حالة الاسرائيليين بزعل على العرب اما اليهود بشكل عام فأشعر بعدم الراحة


#شعورك لما بتشوف ضابط شرطة؟
بفكر هو اهان كم واحد النهاردة و لا ضرب كام واحد النهاردة للاسف دي اول حاجة بتيجي على بالي


#شعورك لما بتشوف الكناس العجوز في الطريق؟
الاجلال ..فيه ناس شريفة لآخر العمرلا تمد يدها بالسؤال مادامت تحملها اقدامها حتى لا تأتي نكتة في وجوهها يوم القيامة


#افكارك اتجاه شاب ماشي في الطريق يلبس جلابية بيضاء قصيرة و عمامة و له لحية و بجيبه السواك و في يده المصحف؟
مش كل واحد يلبس كدة يبقى متدين في منهم للاسف من هو ابعد ما يكون عن الدين على الاقل في التعامل التدين حاجة خاصة بين العبد و ربه لا يعلم مقدارها الا الله لانه العليم بما في الصدور و لا احب ان تتحدد بالمظهر


#احساس يراودك في اشارة مرور مغلقة بسبب مسئول كبير؟
احساس بالعجز

ملحوظة:مرر لي الاخ شادي فايد مشكورا نفس التاج

نايم في .............الشارع!!!!!!!؟

بيقولوا النوم سلطان....بس مفيش سلطان بيجي لواحد في الشارع الساعة اربعة العصر يوم الخميس قدام سيتي ستارز!!!؟؟اي والله...انا شفت المنظر ده و السيناريوهات اشتغلت في دماغي...الراجل ده باين من هدومه انه عنده بيت و شغل مش متشرد يقوم يقلع الجزمةو يحط ازازة مية جنبه"عشان لو جاله كابوس ولا صحي عطشان" و ينام كدة في الشارع قدام مخاليق ربنا المصريين و الاخوة العرب و السياح الاجانب!!؟؟ مفتكرش ان فيه حاجة ولا مشاكل في بيته مثلا عشان بصراحة كدة جاب منين هدوء الأعصاب و الروقان في وسط شارع السيارات ريحة جاية فيه و ناس ماشية بتعدي عليه و قطط بتشمشم فيه و زيطة في الشارع يوم خميس بقى...لأ مكنش مغمى عليه و لا حد قتله...يا جماعة الراجل ده كان نايم و بيتقلب كأنه نايم في سريره!!؟؟...طيب ده مش خايف يتسرق ولا كلب ضال يعضه؟!..مهما كان تعبان اوي مينمش في الشارع..الحلو كمان انه عساكر المرور اللي كانوا واقفين يكلبشوا السيارات المخالفة محدش فيهم عمل حاجة...و الله حاجة حلوة قوي

المصري و ثقافة التعذيب

مش عارفة ليه بقى التعذيب جزء من التكوين الثقافي للمصري...متقولش انه نفسيا تشبع باللي بيشوفه في الأخبار و التليفيزيون و بقى العنف عنده شىء عادي...ده مبرر بس مش كفاية...أشكال التعذيب كثيرة جدا و لا تنحصر في التعذيب الجسدي فقط...فمثلا الموظف اللي مش قادر يقضي مصلحة انسان زيه غلاسة او عشان مش عاجبه شكل الغلبان اللي جاي يقضي المصلحة او مزاج سعدته مش رايق او بيفطراو يخليه يروح يختم الورقة تاني عشان الختم مش واضح او دمغة من آخر الدنيا زيادة تأكيد او..او..و فالآخر الكلمة الشهيرة"فوت علينا بكرة"...ده بيعذب الانسان ده فالبيروقراطية شكل من اشكال التعذيب...قال عليه افضل الصلاة و السلام:"من نفس عن مؤمن كربة من كرب الدنيا نفس الله عنه كربة من كرب يوم القيامة،و من يسر على معسريسر الله عليه في الدنيا و الآخرة".. بلاش ده...عربجي ماسك عصاية و بيضرب في الحمار بغل اوتلاقي شاب محترم واقف بياكل السندوتش المتين و جت قطة هلكانة تنو نو جنبه يقوم ضاربها بالشلوت..ده تعذيب...ما هو التعذيب مش مقتصر على الانسان بس..قال رسول الله _صلى الله عليه و سلم_"دخلت امرأة النار في هرة حبستها فلا هي أطعمتها و لاهي تركتها تأكل من خشاش الأرض"...بلاش ده كمان...تلاقي شاب تاني واقف في حتة برضه يجيله طفل تاهت ملامحه من الغلب و الأوساخ يبيع مناديل يقوم زقه او ضاربه...!؟...اديك مثال تاني..سواق الاتوبيس اللي يشوفك واقف في المحطة في عز الحر او في المطرة و يسيبك و يمشي!!...ما ده تعذيب برضه... والعمال الغلابة اللي بتظاهروا عشان عايزين حقهم.. اللي بياخدوه قليل بس كانوا بيدبروا زي اي بيت مصري و المهم الستر بس دلوقتي الدنيا غليت و هم مش عايزين يشحتوا و عندهم كرامة ...الظلم شكل من أشكال التعذيب...والناس اللي اتحرقت عششها و بقت في الشارع و محدش سائل فيها..اللا مبالاة شكل من اشكال التعذيب...المية الملوثة و الاغذية الملوثة و اكياس الدم الملوثة..انعدام الضمير تعذيب..المعاكسات و الكلام القبيح بيسبب ألم نفسي و ده تعذيب...كليبات التعذيب اللي من كترها حاسة ان في قناة كليبات ليها هتطلع قريب..الاستخدام السىء للسلطة الممنوحة و الفقر و القهر نوع من التعذيب...ايه الرسالة من اهدار كرامة و عرض انسان محدش يقبل يتعمل فيه كدة..استعير من صلاح جاهين و اقول:أنا كل يوم اسمع فلان عذبوه....اسرح في بغداد و الجزاير و اتوه..ما اعجبش م اللي يطيق بجسمه العذاب...واعجب من اللي يطيق يعذب أخوه....الاهمال كمان شكل من اشكال التعذيب ...و ابلغ دليل حوادث الطرق و حادثة العبارة الشهيرة ناس عايشين في جحيم بسسبه...احنا مكناش كدة..ايه حصلنا؟..التعذيب بقى هو لغة التعامل..الأديان مبتقولش كدة..كل يوم الحوادث يطلع معظمها تعذيب و الضحايا من رضع الى عجزة... راحت فين التربية و الأصول و الدين و السلوك..فين المتعة في اني اعذب انسان او حيوان او حشرة بالكلمة او المعاملة او باليد او بالنظرة...مين انا عشان احكم بعذاب انسان او نعيمه..ياانسان ان الله يعذب من يعذبون الناس في الدنيا..انا لم احصر كل اصناف التعذيب طبعا..ياريت كل واحد يراجع نفسه مش شرط تكون شرير عشان تتسبب في عذاب شخص او كائن حي.....فكر و حاول انلا تطمس انسانيتك

لن تعود

لن تعود........يا من سلبت قلبي عذريته...لم يعد في ظهري مكان لم ينغرس فيه سكينك....رأيتك واحة في صحرائي...فكدت اموت من الظمأ..رأيتك وطنا صمدت ببسالة من اجله في معركة خاسرة امام قدر مكتوب...فقلدت بالدمع عيوني و داويت جراحي بأشواك الخيانة...رأيتك في ملامح أطفال نائمون وبغلالة المستقبل يتدثرون...فقصفت بيتنا و وأدت اطفالنا...رأيتك نورا...فتركتني لهلاوس الظلمة أسيرة...رأيتك دربا لن اضل بعده...فوجدت نفسي تائهة في مستنقعات عقول الناس...رأيتك شموخا و كرامة لي...فوجدت نفسي كسيرة كدمعة طفل يتيم........................يا من عشقتك................لقد بصقت مرارة الخذلان و تحررت من تعويذة حبك و اضأت الشموع على مشاعر واراها الثرى....لهذا فأنت............................لن تعود

حاجة تكسف

اكتب

اعتدنا في الآونة الأخيرة على الدعوة الى القراءة،كماتقدم المحافل والمؤتمرات الثقافية ومعارض الكتاب دعوة صريحة لذلك..و لكن ماذا لو لم يكتب احد!؟
الكتابة هي توأم القراءة فكما ان عدم القراءة جهل فعدم الكتابة جهل أكبر..
بالكتابةجمعت آيات الله و سنة نبيه من صدور الصحابة و التابعين..بالكتابة خطت التشريعات و القوانين..و حفظت حقوق المدينين و الدائنين..بالكتابة تواصل سليمان ببلقيس من آلاف السنين..و صحيفة اعمالك تتلقاها مكتوبة يوم الدين...فالكتابة توثيق و ارث و حفظ من الاندثار..الكتابة خلود في الدنيا و ابدية الافكار..الكتابة شجاعة،فمن اجرأممن يكتب ما يدورفي نفسه و يذيل ذلك بتوقيعه..الكتابة سلاح و هجوم و صرخة مظلوم..الكتابة تاريخ..الكتابة خيال ابصر النور وواقع ملثم بالأحلام..الكتابة صوت من عقد العشق لسانه..الكتابة روح على ورق و رئتان من حروف..الكتابة عين تحول ما لا يقرأ الى مقروء،فكم من رحالة شاهد و سجل و كم من عالم خط نتاج تجاربه و كم من شاعر ترجم الطبيعة الى كلمات تعبق بسحرها.......
اكتب....فالكلمات دموع مكتوبةو ضحكات مسطورةونزوات ممنوعة و اقوال مأثورة و مخاوف محبوسة و سينفونية معزوفة....اكتب...فالميلاد كتابة..والقدر كتابة..و الممات كتابة....اكتب.....اكتب احلامك..اكتب احساسك..اكتب ماضيك و حاضرك..اكتب ذكرياتك..اكتب مخاوفك و اشباحك..اكتب اخطاءك..اكتب حبك..اكتب فرحك و حزنك..اكتب جروحك..اكتب صراخك و صمتك..اكتب حريتك..اكتب اسمك..اكتب فكل شيء تحياه مكتوب..ولكن..اكتب...

كلام مجنوووون...لكن منطقي!!

(1)

اكتشفت بعد 6 سنين في مصر أن انتمائي لهاواناعايشة بعيد عنها كان للأسف اقوى..وكان على رأي احمد بدير في مسرحية ريا وسكينة"وكتاب الله اللي يقولي يا سكيننة اخزق عينيه"يعني مبستحملش عليها الهوى..دلوقتي اللي يقولي يا سكيننة هابوس راسه و اقوله "حقك عليا"اصل مصرملهاش ذنب..كنت بحبها بأهلها بس دلوقتي بحبها و بخاف وبزعل على و من اهلها

(2)

بدلا من ان تلعن الظلام..اضئ شمعة".....المشكلة انه من شدة ما ضلمت....مش عارفة اروح اجيب الشمعة من درج المطبخ!؟..

(3)

ايمانا مني بنجاح التجربة الصينية في مصر بدءا من-ولامؤاخذة-الشباشب و الملابس الداخلية مرورا بالفوانيس و السبح و سجاجيد الصلاة و الفاكهة و كحك العيد اللي بطعم و ريحة السمن البلدي و رنجة شم النسيم المليانة بطارخ انتهاء بعمليات زراعة الكلى و الكبد...مش هستغرب لو الصينيين عملوا كعبة محندقة كده الناس تعرف تروح تحج و تعمل عمرة بالاسعار المناسبة من منطلق ان الاعمال بالنيات و التيسيير على عبادالله و ان من حقهم
يشوفوا بيت ربنا...!!؟

(4)

من اقوال القادة التي خلدها التاريخ:
الرئيس جمال عبد الناصر:"تؤمم الشركة العالمية لقناة السويس شركة مساهمة مصرية"
"لقد قررت ان اتنحى"
الرئيس السادات:"ساذهب الى الكينيسيت ذاته"
الرئيس مبارك:"تعديل 34 مادة من مواد الدستور"

(5)

(1975)"يارب نجحه وابعد عنه الشيطان و اديني العمر لحد ما اشوفه دكتور"دعاء ام محمد بتاعة الخضار لابنها

(2007)"يا رب الهيه عن مذاكرته باللعب و حب الكورة واجعله زي ميدو و ابوتريكة"دعاء ام محمدبرضه بتاعة الخضار لابنها!؟

(6)

"حرية الرأي و التعبير مكفولة للجميع و لا مساس بها"ده كلام اي مسئول..حد يقولي ليه وائل الابراشي وابراهيم عيسى ابطال فيلم"محكمة رايح جاي"؟وليه جماعة الاخوان بيسموها "الجماعة المحظورة"؟ولا حرية الرأي و التعبير جت لحد عندهم و قالت خلاص مش لاعبة؟وليه بتوع حركة كفاية مجرد ما يقفوا من غير حتى ما يفتحوا بقهم بيتخدوا؟يمكن اللون الاصفر عيب!؟وليه الناس بتخاف تروح الانتخابات و الاستفتاءات ولا حتى تنزل الشارع اليوم ده!؟
يظهر ان التعبير عن الرأي بقى عامل زي الفعل الفاضح الذي يخدش الحياء...نسأل الله لنا و لكم الستر و العافية

(7)

بعد الاعلان عن نتيجة الاستفتاء على التعديلات الدستورية افتكرت مشهد من فيلم "صايع بحر"واحمد حلمي واقف تحت شباك خطيبته الخاينةوبيقولها معايرا:"يااللي امك مبتقولش لأه..وخالتك مبتقولش لأه..و عيلتك مبتقولش لأه"!؟